Поиск по сайту: 
 

Архив
 май 
 2022 
пн вт ср чт пт сб вс
      1
2345678
9101112131415
16171819202122
23242526272829
3031     

 
 

 

Здоровье

коронавируснай инфекциять каршес вакцинациять колга

Коронавирус. Минцьке ашеме талакода кода тя валсь сувась эряфозонк. И, улема, арась корхтамаса инь сидеста васьфневихнень эзда фкясь. «Надиян, корона прясот ашель?»—кизефтемань телефон вельде содафонень эзда фкясь. Павазонди, улема, ашель. Мес, улема? А сяс, што кой-кинь организмаса тя урмась ётни прянь апак няфтть—рузкс азомс, симптомфтома. Сяс ламотне, молемок антителатнень улеманкса анализонь максома, результатть получамдонза меле сотцесазь, што кой-мзярошкас прясост коронать каннезь ни. И бта семботь коронавирусть колга содасаськ ни, а кизефкст сембе сяка эвондакшнихть. Ответт лангозост ули кода получамс уликс пси линиятнень, тя темас тиф официальнай сайтть вельде. Мекольдень пингть лама кизефкста уленди вакцинациять колга. Коль сяда кели информация тянь колга максф стопкоронавирус.рф сайтса.
Коса ули кода ётамс вакцинациять? Вакцинась пачфневи Россиять субъектонзон медицинскяй сембе организациянзонды. Медицинскяй организациятнень, конатнень эса ули кода тифтемс прививка, адресснон азсазь Здравоохранениянь региональнай эрь министерстваса. Ули кода пря сёрматфтомс госуслугань порталть вельде.
Мезе тиемс, кда вакцинацияда меле кеподсь оцю температура? Вакцинацияда меле эрь ломанть организмац вятьсы прянц эсь лацонза. Вакцинать нолдамдонза меле колмошка шинь потмоста кой-кинь кепси 37,5 С° молемс температурац. Кда сон сяда оцю, ули кода примамс нестероиднай противовоспалительнай препаратт. Кда прививкада меле прянтень марясасть кальдявста сисемшка шида ламос, пшкядеда лезксонкса враченди.
Кодама документт эрявихть вакцинациянди? Вакцинацияс сявость мархтонт паспортть, ОМС-нь полисть и СНИЛС-ть (эряви госуслугань порталса электроннай сертификатть получаманц инкса).
Эряви-аф ащемс самоизоляцияса коронавирусть эзда прививкать тифтемдонза инголе и меле? Роспотребнадзорть рекомендациянзон коряс, самоизоляцияса сяда пара ащемс вакцинацияти анокламста. Вакцинацияда меле самоизоляция аф эряви.
Кда улихть антителат, ули-аш кода тифтемс прививка коронавирусть эзда? Кда антителатнень титрасна сери, и ломанць аф кунара сярядсь тя урмаса, маластонь пингть вакцинань тифтема ули кода аф якамс.
Кодапт показаниятне вакцинань тифтемс? Тиеви сон 18 кизода оцю ломаттненди од коронавируснай инфекциять профилактиканц инкса.
Кода анокламс прививкати? COVID-19 каршес вакцинациять ётафтомдонза инголе, мзярда теенза ляды фкя ши, аф симома спиртной симомбяльда, прививкань шиня аф якама баняв, бассейнав, саунав, вельф аф кельмосема. Тяфта вятема прясь и вакцинацияда меле—кафтошка ши.
Кда ломанць тифтсь прививка гриппть, корьть, гепатитть и лия урматнень эзда, ули-аш кода ётамс вакцинация од коронавируснай инфекциять каршес? Тянь ули кода тиемс. Прививкатнень ёткса ёткти улема 28 ши. Аф сяда кржа.
Ули-аш кода ётамс вакцинация пеки аватненди? Пеки и мяштьса анды аватненди прививка тифтемс аш кода.
Материалть аноклазе Т.АЛЬШИНА.

20.05.2021 №19
 
 
 

 
НОВОСТИ

Зубово-Полянскяй райононь оцюнясь В.А.Поршин:«Эрь тевсонк васенце вастса ащи ломанць!»

Зубова Полянась васенцеда лятфневи 1680 кизоста сявомок Керенскяй засечнай чертань служилай ломаттнень Зубофнень фамилияснон коряс, синь тя ширеса азорхтольхть. Лемть омбоце пяльксоц пачфни, што тяса кужель, вирьса шуфттнень эзда ароптф вастоль. Сире пинкнень тияк ётнесть Шацк-Спасск алашань кись, Зубова Полянань почтовай станциясь. Машина кить строямста посёлкась вишкста кассь. Тяниень пингть Зубово-Полянскяй районца улихть оцю предприятият, конат лезнихть виияфнемс марнек Мордовиять экономиканц. Кепотьксонди, «Плайтерра» фанерань нолдай компаниясь и Вышинскяй деревообрабатывающай комбинатсь. Лама киза Зубова Поляна посёлкаса ноляй электроннай оборудования «Радиодеталь» заводсь. Оцю тефт тиендихть наказамань ётамань учреждениятне. Пцтай эрть эса улихть стамань цехт, шуфтонь и металлонь обработкать коряс производства. Аф кржа рабочай васта максси «Талина» компаниясь, кона мольфти районца аграрнай бизнес. Инголи моли технология мархта ня предприятиятне сявондихть работама сембе ширде аноклаф, квалифицированнай ломатть, сянкса зарплатавок пандыхть цебярь.
 
 

Корреспондентоньке аф кунара васьфнесь Зубово-Полянскяй райононь оцюнять Владислав Алексеевич Поршинонь мархта и кизефнезе, кода Мордовиянь инь оцю районца ётафневихть эряфс национальнай проекттне.

12.05.2022  № 18
 
 
 
 

МОРДОВИЯНЬ ОЦЮНЯСЬ ПОЗДРАВЛЯНДАЗЕНЬ ВЕТЕРАТТНЕНЬ

Шуваланяста, 5 майста, Артём Здунов васетькшнесь Мордовиянь ветеранскяй активть мархта. Васедемаса примасть участия республикань райононь ветеранскяй организациянь председательхне и члеттне.

 

Тяддень мартста организацияти топодсь 35 киза. Мордовиянь Оцюнясь азозе, што Ветеранонь советть оцю значенияц регионца, сон путни сатомшка оцю путкс од поколениять воспитандаманцты. Корхтафоль памятниконь тиемать коряс Военно-историческяй обществать мархта марстонь работать и Сурскяй рубежень строяйхненди музеень панжемать колга.

 

«Кда аф тинь советонте, тейнек улель стака ламоц важнай задачатнень пяшкодемста. Башка мяль тячи, конешна, эряви шарфнемс од ломаттнень воспитандамаснонды, сянди, мезе тиендеви школатнень эса. Интернетса лама аф видексонь информацияда, конань вельде ули кода тиемс кальдяв од ломаттненди, сяс кадондомс мялень апак шарфтт тя категориять аш кода»,—мярьгсь Артём Здунов васедемать панжемста.
 

12.05.2022  № 18
 

СЕДИЕНЬ ТАКОЛДОМА И ОЦЮ КЕНЯРДЕМА КАННИ ТЕЙНЕК 9 МАЕНЬ ШИСЬ!

Победань шиня Саранскяйса и Мордовиянь райоттнень эса ётафтовсть мероприятият, конат лемтьфтольхть 1941-1945 кизотнень Великай Отечественнай войнаса Сяськомать 77 кизонь топодеманцты.

 

Саранскяйса Победань площадьса ётафтовсь торжественнай митинг. Ся кизонь пелькс событиянь участникненди и свидетельхненди сюконяма, сяськиень поколенияти спасибань азома, сембонь сятнень лятфтама, кит тяни ашет мархтонк, сашендсть ошеряйхне и Мордовиянь столицань инжихне.

 

Торжественнай митингть панжемста Мордовиянь Оцюнясь Артём Здунов поздравляндазень пуромфнень странаньконь историяса Великай шить мархта: 

 

«77 кизода тяда инголе Советскяй народсь аралазе родной Отечестваньконь,  нолдазе воляс фашизмать  эзда ламоц странатнень и нароттнень. Республикасонк шачф-касф ломаттне тиендсть героень тефт сембе фронттнень эса: Брестскяй крепостть араламста, Москуть, Ленинградть, Севастопольть инкса ащемста, Сталинградть ала и Курскяй дугать лангса тюремста, Украинань, Белоруссиянь союзнай республикатнень и сембе Европать воляс нолдамста. Тылонь труженикне, аф ваномок ашушить и вачашить лангс, сатнезь Победать станокнень ваксса, паксяса, Сурскяй рубежса и госпитальхнень эса. Марса аватнень и сире ломаттнень мархта тылса стакат-сталмот кирдсть шабатне. Вечнай толть ваксса минь сюконяфнесаськ пряньконь сембонь сятнень лятфтаманкса, кие ашезь мрда войнаста, кие эреклафнезе народнай хозяйствать войнада меле. Сембось тя тиф минь инксонк, шабаньконь, сяськиень сай пингонь поколениятнень инкса!»

 

 
12.05.2022  № 18
 

«Бессмертный полк России» ООД-ть Мордовия Республикань региональнай отделениянц штабонц руководителец Н.А.КРУЧИНКИН: «ТЯДДЕ "БЕССМЕРТНЫЙ ПОЛК" ШЕСТВИЯСЬ КАРМАЙ АСЬКОЛЯМА МАРНЕК СТРАНАТЬ ЭЗГА!»

05.05.2022  № 17
 
 

Касы коронавируснай инфекцияса сярядихнень лувкссна

29 апрельста ётафтовсь коронавируснай инфекциять инголдаманц и келемоманцты кить персеманц коряс региональнай оперативнай штабть  заседанияц. Сонь работасонза примась участия Мордовиянь Оцюнясь Артём Здунов.

 

«Коронавируснай инфекцияса урмаськодомать мархта тефне Мордовияса ашесть полафта—300-та лама пациент пчксихть ковиднай госпитальхнень эса. Ваномс, штоба Маень праздникнень пингста массовай пуромксне афольхть ара урмаса сярятькстыхнень лувксснон касомаснонды туфталкс»,—мярьгсь регионть руководителец.

 

МР-нь Правительствать Председателенц заместителец Галина Лотванова азондсь эпидемиологическяй  тяниень пингонь ситуациять и коронавируснай инфекциять эзда населениять вакцинациянц мольфтеманц колга.

 

Ётай недялять коряс 19 процентта кассь госпитализированнайхнень лувкссна, сяда лама арась стационарса пчкафневи идьта. Коллективнай иммунитетсь кирсь и тячиень шити сон арась 52,7 процент.

 

05.05.2022  № 17
 
 

 

 

Яндекс.Метрика Яндекс цитирования Rambler's Top100
Учредительхие:
Главнай редакторсь: И. С. Лушкин