Трускляй велень школаса сембось тиф, арьсеф иттненди

Рузаевскяй райононь Трускляй велень школась фкясь инь цебярьхнень эзда марнек республикаса. Сонць школась аф од, но сембось, мезе тяса тиендеви, сотф тячиень и вандыень шить мархта. Трускляень цёранятне и стирнятне сявондихть васенце и омбоце вастт эрь кодама олимпиадатнень и пялькстоматнень эса, школаса ётафневихть семинархт, васедемат мокшень кяльть и литературать сяда тов вельмофтемаснон коряс. Тяса афкукс ванфнесазь минцень коеньконь-обуцяньконь, школань музейса кочкаф велеть сембе историяц. Тянь ширде оцю работа тись школань тонафтысь Ф.Ф.Полынов, кона казьф «Патриот России» медальса. Тя сон шабатнень мархта якась велеряйхнень кудга, кизефнесть, кочксесть сире пингонь кядьгонят, щапт-каряпт, котфонь кодама станокт, самовархт, утюкт и лама лия мезе. Тяни сембе тя паршись мазопнесы велень школань музейнай комплексть. Лиякс аф азсак, сяс мес тяса кочкафт сядот экспонат.

—Мон ба мярьголень тяфта, школасонк сире пингонь эряфсь васедсь, сотовсь сяда тов аськоляй тячиень и вандыень эряфть мархта,—ушедсь азондома Трускляй велень школань директорсь, Российскяй Федерациянь общай образованиянь Почётнай работниксь Л.П.Иляева.—Видец, минь школасонк тяни ули сембось, штоба шабатне афолезь юксне сянь, коста молихть синь юрсна, мезькс и мезьса работасть синь атянь-атясна, кода ингольдень койхнень-обуцятнень сотомс тячиень эряфть мархта. Школасонк тонафнихть мокшет, руст, лия национальностень шабат, но сембе синь васенце вастса кирдьсазь фкя-фкянь шарьхкодемать, ялгаксшить. Мокшень цёранятне и стирнятне мяль вельде, кода маштыхть, тонафнесазь лия кялень шабатнень содамс минь кяленьконь. И ванат, аф лама пингонь ётазь пцтай аруста корхтайхть мокшень кяльса. Тяфта ульсь школаса исяк, тячи и кармай вандывок.
Няевиста, лац ладяф школаса патриотическяй воспитаниясь. Тяса сидеста ётафневихть васедемат войнань участникнень и тылонь труженикнень мархта, шабатне кепотьф мяльса примсихть участия военнай темас лемтьф слёттнень эса. Школать видеса аф васенце кизось ни лац работай «Наследие» поисковай группась. Шабатне вешендихть од фамилият, даннайхть сятнень колга, кие ашезь мрда фронтста, школав каннесазь синь фотографияснон, фронтста кучф сёрмаснон. Тянкса теест сюконяйхть аф аньцек воиттнень-боецнень мала ломаньцна, но и марнек велеряйхне.
—Минь школаньке лама мероприятия ётафтсь 9-це майда инголе и Победань шиня,—сяда тов азонды директорсь Любовь Иляева.—Вятсть вахта войнаса шавф воиттненди путф памятникть ваксса, озафнесть панчфт, урядазь перьфснон, архнесть, тисть лама лия тев. Школасонга Победань шити панчсефт уженят фронтовикнень фотографияснон мархта, сембе шабатне якасть георгиевскяй лентаня мархта, азондсть стихт, морасть войнань темас морот.
Мяленьке нинге азондомс сянь колга, кода школаса ётафневи эряфс «Точка роста» Российскяй программась. Сембось тя няеви и шарьхкодеви специальнай тя темас панчф класса. Целец тя программать сянь эса, штоба и велень шабатне афольхть ляда ширеса тячиень тонафнемань процессти однянь сувафтомаса. Тя класса мезе аньцек аш, фотографиятне тянь колга лац азондыхть. Латцефт тяниень пингонь программа мархта од компьютерхт, ётафневихть эрь кодама налхксемат, козя спортивнай инвентарсь, иттне заняфт шахматса, шашкаса. Сембось тя азонды аф аньцек иттнень содамошиснон кемокстамаснон, но и сяда лац эсь пряснон анокламаснон колга вандыень эряфти, профессиянь кочкамати. Ня занятиятне ётнихть интереснайста, иттне тяза сашендыхть оцю мяль вельде, эрь шиня. Аф эрь школась шнафты пря тяфтама класс мархта, Трускляень шабатненди тянь ширде удалась. И синь сюконяйхть сембонди, кие лездсь тя классть панжемаса, тяза тняра оборудованиянь, налхксемань инвентарень путомаса.
Н.ЛОБАНОВ.