«ЭРЬ ВАСТСА ДОЛЖЕТТ РАБОТАМС ПРОФЕССИОНАЛХТ—И «МОНЬ МОРДОВИЯЗЕ» КАДРОВАЙ ПРОЕКТСЬ ЛЕЗНИ ТЯНЬ ЭСА»

Мордовиянь Оцюнять аф лама пингс тевонзон тиендисна Артём Здунов 21 майста Москуса примась участия «Россия—страна возможностей. Истории успеха в лицах» дискуссияса, кона ётась «Новое знание» образовательнай марафонть рамкаса.

Лятфтасаськ, тя марафонць ётась 20 майста сявомок 22 майти молемс, сон арась ушетксокс «Знание» российскяй обществать, кода федеральнай охватонь тяниень пингонь высокотехнологичнай платформань, работань од форматонзонды. Марафонца примасть участия Россиянь 8 ошт: Москусь, Санкт-Петербургсь, Казанць, Нижняй Новгородсь, Сочись, Владивостоксь, Новосибирскяйсь, Калининградсь. Марафонть программасонза ульсь 100 лама дискуссия, лекция, интервьют, панжада урокт, мастер-класст. «Знание» российскяй обществать Наблюдательнай советонц 2021 кизонь 12 майста ушедсь вятемонза Россиянь Президентть администрациянц оцюнянц васенце заместителец Сергей Кириенко.

Артём Здунов дискуссиять пингста азондсь «Монь Мордовиязе» проектть колга, мезе эздонза учендови и пингта ингольдень результаттнень квалма. Республикань вятись китькстазе, што «Россия—страна возможностей» платформать уликс технологиянза макссть етафтомс конкурсть объективнайста. Конкурссь водендаф од поколениянь управленецнень муманкса, конат кармайхть работама качественнай од уровеньца. Тя—сембода важнайсь.

«Максомс региононь эряйхненди качественнай государственнай услугат ули кода аньцек профессиональнай и эсь тевонь кельги ломаттненди,—мярьгсь Артём Здунов.—И тейнек эряви тердемс ня ломаттнень меки регионозонк—тя минь задачаньке. Минь азоськ, што учендсаськ сембонь, кие лувондсы Мордовиять емла родинакс, кинь мялец работамс од амбициознай командаса. Сятнень, кие кармай сяськондема, активнайста участвовандама конкурсть эса, минь путсаськ ответственнай вастс. Эрь вастса должетт работамс профессионалхт—и «Монь Мордовиязе» кадровай проектсь лезни тянь эса».

Мордовиянь Оцюнять аф лама пингс тевонзон тиендисна стане жа азозе, што кадровай проектсь лездсь мумс ломаттнень, конат азсть мяль улемс полезнайкс республикати, нльне апак арак конкурсонь участникокс: «Ушедсть мушендовома ломатть, конатнень тяда инголе минь афи содаськ. Синь тусть республикаста лама кизода тяда инголе, сатсть оцю профессиональнай сатфкст и тяни мярьгондихть: минь аф участвовандатама кадровай проектть эса, но минь сембе сяка тинь мархтонтама, минь тясотама, минь кода машттама карматама кирнемонза Мордовиять ширенц. Миньцонк праймеризса, кепотьксонди, участвовандайхть тяфтама ломатть. Синь мархтонк, и мон няян тянь эзда польза».

Тяфта, кода китькстазе Мордовиянь Оцюнять аф лама пингс тевонзон тиендисна, кадровай проектсь лезни пуроптомс марс землякнень республикать инголе ащи задачатнень решандаманкса.