ВЕЛЕСЬ, КОНА АСЬКОЛЯЙ ПИНГТЬ МАРХТА РЯЦОК

Инсарскяй райононь Исавелесь ся велетнень эзда коза ардат най мяль вельде, коса най васьфтят мезе-мезе одня и пряцень тоса марясак афкукс мокша ломанькс. Тяса ламось сотф народоньконь историянц, коензон-обуцянзон мархта, велеста лиссь лама содаф ломань. Сатомшка азомс учёнайть, драматургть, виднай общественнай деятельть Г.Я.Меркушкинонь лемонц, кона эсь цебярь тевонзон мархта кельговсь марнек республикань эряйхненди. Мокшень тя велеть эзда аф ичкозе ушедсы эсь кувака кинц Исса ляйсь, перьфпяле лугат, паксят. Аф стак тя велеть мазышинц колга сёрматфт стихотвореният, очеркт, аноклафт телевизионнай фильмат.

Велеть историяц ушеды 1800 кизоста сявомок, мзярда тяса строяфтольхть васенце куттне. Тяда меле панчсть церькав, эрь кодама ремеслань объектт. Ломаттне витцесть-соксесть паксят, касфнесть жуватат, перень сёрот. Ламось ётась тячиень шити. Тяни Исавелеса работай крупнай велень хозяйствань предприятия, кона кизонь потмоста мишенди государствати сядот тонна лофца, сиволь, тяса эрь гектарста получсихть 50 центнер сёра. Сембось тя лезды, кода и ингольдень кизотнень, строямс велеса од кутт, социальнай и культурань объектт, спортивнай площадкат. Ульцятне ацафт асфальтса, аруста кирдевихть войнаса шавф воиттненди путф памятниксь-обелисксь, церькавть перьфоц. Лама вастова озафнефт шуфтонят, панчфт.

Башка мяленьке азондомс велень школать колга. Сон аф од, но эсонза улемста каят сельме няйфти. Тяни тяса тонафни колмогемонь кота ученик. Кой-конат тяза усксевихть шабрань велетнень эзда.

—Школасонк ули сембось, штоба иттне лац тонафнельхть, получальхть цебярь содамошит, касольхть афкуксонь патриотокс, эсь шачема-касома ширень кельгикс,—мярьгсь Исавелень школань директорсь Наталья Николаевна Ломачкина.—Классне аноклафт тячиень вешфкснень коряс, сембе вастова латцефт нагляднай пособият, улихть компьютерхт, фильмань ваномс оборудования, лама лия мезе. Сембось тя стак аф ащекшни, иттне мяль вельде тяса тонафнихть од программат, анокласазь эсь пряснон сай пингонь эряфти, вандыень шити.

Оцю воспитательнай работа иттнень мархта вяти педагогсь Сергей Васильевич Сяськин. Шачемас коре сон Кадошкинскяй райононь Пою мокшень велеста. Школада меле тонафнесь М.Е.Евсевьевонь лемса педагогическяй институтса. Сонь аделамдонза меле кучфоль работама Исапря вели. Вятсь математикань и физикань урокт, тонафтсь иттнень эса улемс эсь ширень кельгикс.

—Аф каендан, мес эряфозень сотыне велень школать мархта,—мярьгсь Сергей Васильевич.—Монць велеса шачень, содаса кода аф тёждя кой-мзярда уленди иттненди тонафнемста, профессиянь кочкамста. Но кинь ули мялец лисемс кувака кис, поладомс эсь тонафнеманц вузса, колледжса, ся тянь колга арьси школастокиге. Минь задачаньке—лездомс иттненди ётафтомс эряфс арьсефснон. Монь пара мялезон, мес лама выпускникозе эсь лацон кочказь учителень тевть, покодихть тячиень пингонь технологиятнень вельде, лац содасазь компьютернай программатнень, лездыхть кепсемс эрь кодама заводонь, лия предприятиянь экономикаснон. Тязк азсаськ, Сергей Сяськин рьванц, Надежда Дмитриевнань, мархта касфтыхть кафта итть. Цёрасна Максим служай армияса, а стирнясна Мила тядде аделасы васенце классть. Велеряйхне тя семьять колга азондыхть аньцек шнамань валхт.

Исавелень школаса панчф музей, коса кочкаф велеть сембе историяц. Няеви вастса уженясь, кона азонды сире пингонь эряфть колга, тяса и  кядьгонят, щапт-каряпт, кептернят, кштирдемань станокт, самовархт, муськомань досканят. Мзяра вий, маштомоши эрявсь атянь-атяньконди, штоба семботь тянь тиемс и нолямс тевс. Тя целай искусства! Тязк ряцок уженясь, коса азондови Родинань аралайхнень колга, кит аф пелезь тюрсть врагть каршес. Финцне ашесть мрда фронтста, ламонцне ранендафтольхть, но кажнайть лемоц, подвигоц апак юкстак, синь сувасть историяв.

Велеть гордостец—Г.Я.Меркушкин. Тя музейса кочкаф лама экспонатт, конат лятфнихть марнек республикаса содаф ломанть колга. Тясот сонь пьесанза, вузонь публикациянза, печатламань машинкац, портфелец, лама лия паршиец. Сатомшка ваномс тя уженять лангс, эзкиге шарьхкодьсак, кодамоль тя ломанць, мезсь сонь пичефтезе, коза нолдафтольхть сонь виенза, эрьгац.

—Минь велесонк пяк мялень салайста ётни Тройцясь,—сяда тов азонды Н.Н.Ломачкинась.—Вели тя шиня кочксеви лама сядот ломань. Сашендыхть инжихть, ингольдень велень эряйхть аф аньцек Россиянь сембе уженятнень эзда, но и СНГ-ста, лия странатнень эзда. Велень сценать лангса кайгихть рузонь и мокшень морот, сиде моронят, ётафневихть спортивнай пялькстомат. Сашендыхть и Россиянь Народнай, Заслуженнай артистт. Кафта кизода инголе, кепотьксонди, Ярослав Евдокимов макссь оцю концерт, Надиятама и тяддевок илась удалай, вели сай лама ломань, конат васьфтевихть кшиса-салса, кайги мороса, лямбе валса.

Катк ули стане, кода арьсезь  илань ётафтыхне!

Н.ЛОБАНОВ.