Поиск по сайту: 
 

Архив
 май 
 2022 
пн вт ср чт пт сб вс
      1
2345678
9101112131415
16171819202122
23242526272829
3031     

 
 

 

Здоровье

Коронавирусть коряс оперштабсь: «ПЕЛЬКС ИНФЕКЦИЯТЬ КАРШЕС ТЮРЕМАНЬ ИНЬ ГЛАВНАЙ НАПРАВЛЕНИЯСЬ—ВАКЦИНАЦИЯСЬ»

МР-нь Оцюнять аф лама пингс тевонзон тиендисна Артём Здунов 10 июньцта видеосвязень вельде ётафтозе коронавируснай инфекциять инголдаманцты и келемоманцты кить персеманц коряс региональнай оперативнай штабть заседаниянц. Ванондовсть эпидемиологическяй уликс ситуациять, COVID-19-ть эзда вакцинациять, региональнай здравоохранениянь системать тевонь мольфтемать, санитарно-эпидемиологическяй вешфкснень мельге контролень вятемать коряс кизефксне.

 

Региононь руководительсь отмечазе, што коронавируснай инфекциять келемоманц коряс обстановкась лядонды сякокс. «Цебярь шири оцю полафткст мзярс минь аф няйхтяма,—мярьгсь Артём Здунов.—Конешна, эрь шинь урмаськодомань од случаень касома минь сяшкава аш, но тянь лангс сетьмофнемс пря аф эряви, сяс мес ковиднай стационархнень эса пациенттнень лувкссна ванфневи 400 ломанти, а «якстерь зонаса» урмаськодыхнень недялянь лувксснон коряс ащихть 10 муниципалитетт».

 

Пелькс инфекциять каршес тюремань главнай направлениясь—вакцинациясь. Республикаса прививочнай кампаниясь ётафтови планц коре, тянь колга азондсь вице-премьерть аф лама пингс полафтыец Галина Лотванова. Тяконь мархта пачфневи вакцинань объёмтне мярьгондихть касфнемс прививкань объёмтнень и ванфтомс ломаттнень эряфснон.

 

МР-нь здравоохранениянь министрть аф лама пингс полафтыец Олег Маркин азондсь оперативнай штабти ситуациятнень колга, конатнень мархта васьфнихть врачне ковиднай госпитальхнень эса.

 

«Миньцонк лама примерда, мзярда реанимацияса ащихть фкя семьяста пациентт. Фкясь кулси, омбоцесь пчкафневи. И кода сяльде ломаттне каендайхть, што ашесть тифте прививка синць и ашезь кошарда тянь тиемс мала ломаньцнон, конатнень синь юмафтозь!—мярьгсь Олег Маркин.—Кда ломанць ашезь тифте прививка, сон урмаськоды. Кда тинь надиятада, што тинь ни сярядеде ковидса и тяни ни аф сярятьксстада, тя аф тяфта! Коронавирусса сярядихнень 10 процентсна—нят омбоцеда сярядихть, нльне улихть случайхть—пачкотькшнихть реанимацияти и кулсихть. Вакцинась жа аралай коронавирусть эзда. Скептикне, инь пяк оттне, мес-бди арьсихть, што урмать ётафтсазь тёждяста. Но теест аф эряви юкснемс родительснон колга, конатненди каннихть пелькс. Минь вакцинаньке—инь цебярсь мирса. Араламань оцю виензон минь няйсаськ эсь примерсонк».

 

Эксперттне лувондсазь, што самай тячи, сёкседа  инголе, сась пингсь тифтемс прививка коронавирусть эзда. Сёксенда ушедови гриппть эзда вакцинациясь. Штоба афольхть пова инфекциятне марс, ня прививкатне тиемат аф фкя пингоня. Оперштабонь заседаниянь нинге фкя важнай темакс арась отпускнень пингста безопасностень эрявикс мератнень ванфтомасна. Башка мяль шарфтома идень ваймама пингти. Ответственнай руководительхненди марса Мордовия Республикать эзга Роспотребнадзоронь Управлениять мархта эряви обеспечендамс кизонь кампаниять ётафтоманц пандемиянь условияса эрявикс профилактическяй сембе мератнень ванфтозь.

 

«Исяк мон ваныне пришкольнай лагерьхнень эзда фкять. Кода минь корхнеме инголи, иттненди эряви ётафтомс тя пингть пользань кандозь, мумс кодама-бди компетенцият. Тяса ули кода лездомс МЧС-ти, волонтёрхненди, медикненди—тонафтомс иттнень, кепотьксонди, макссемс васенце лезксть. Тяда башка, эряви обеспечендамс цебярьста и гигиеническяй норматнень ванфтозь иттнень андомаснон и кизонь лагерьхнень эса иттнень улемаснон. Тейнек эряви курокста мушендомс лисема васта эрь случайста»,—мярьгсь МР-нь Оцюнять аф лама пингс тевонзон тиендисна.

 


18.06.2021 №
 
 
 

 
НОВОСТИ

Зубово-Полянскяй райононь оцюнясь В.А.Поршин:«Эрь тевсонк васенце вастса ащи ломанць!»

Зубова Полянась васенцеда лятфневи 1680 кизоста сявомок Керенскяй засечнай чертань служилай ломаттнень Зубофнень фамилияснон коряс, синь тя ширеса азорхтольхть. Лемть омбоце пяльксоц пачфни, што тяса кужель, вирьса шуфттнень эзда ароптф вастоль. Сире пинкнень тияк ётнесть Шацк-Спасск алашань кись, Зубова Полянань почтовай станциясь. Машина кить строямста посёлкась вишкста кассь. Тяниень пингть Зубово-Полянскяй районца улихть оцю предприятият, конат лезнихть виияфнемс марнек Мордовиять экономиканц. Кепотьксонди, «Плайтерра» фанерань нолдай компаниясь и Вышинскяй деревообрабатывающай комбинатсь. Лама киза Зубова Поляна посёлкаса ноляй электроннай оборудования «Радиодеталь» заводсь. Оцю тефт тиендихть наказамань ётамань учреждениятне. Пцтай эрть эса улихть стамань цехт, шуфтонь и металлонь обработкать коряс производства. Аф кржа рабочай васта максси «Талина» компаниясь, кона мольфти районца аграрнай бизнес. Инголи моли технология мархта ня предприятиятне сявондихть работама сембе ширде аноклаф, квалифицированнай ломатть, сянкса зарплатавок пандыхть цебярь.
 
 

Корреспондентоньке аф кунара васьфнесь Зубово-Полянскяй райононь оцюнять Владислав Алексеевич Поршинонь мархта и кизефнезе, кода Мордовиянь инь оцю районца ётафневихть эряфс национальнай проекттне.

12.05.2022  № 18
 
 
 
 

МОРДОВИЯНЬ ОЦЮНЯСЬ ПОЗДРАВЛЯНДАЗЕНЬ ВЕТЕРАТТНЕНЬ

Шуваланяста, 5 майста, Артём Здунов васетькшнесь Мордовиянь ветеранскяй активть мархта. Васедемаса примасть участия республикань райононь ветеранскяй организациянь председательхне и члеттне.

 

Тяддень мартста организацияти топодсь 35 киза. Мордовиянь Оцюнясь азозе, што Ветеранонь советть оцю значенияц регионца, сон путни сатомшка оцю путкс од поколениять воспитандаманцты. Корхтафоль памятниконь тиемать коряс Военно-историческяй обществать мархта марстонь работать и Сурскяй рубежень строяйхненди музеень панжемать колга.

 

«Кда аф тинь советонте, тейнек улель стака ламоц важнай задачатнень пяшкодемста. Башка мяль тячи, конешна, эряви шарфнемс од ломаттнень воспитандамаснонды, сянди, мезе тиендеви школатнень эса. Интернетса лама аф видексонь информацияда, конань вельде ули кода тиемс кальдяв од ломаттненди, сяс кадондомс мялень апак шарфтт тя категориять аш кода»,—мярьгсь Артём Здунов васедемать панжемста.
 

12.05.2022  № 18
 

СЕДИЕНЬ ТАКОЛДОМА И ОЦЮ КЕНЯРДЕМА КАННИ ТЕЙНЕК 9 МАЕНЬ ШИСЬ!

Победань шиня Саранскяйса и Мордовиянь райоттнень эса ётафтовсть мероприятият, конат лемтьфтольхть 1941-1945 кизотнень Великай Отечественнай войнаса Сяськомать 77 кизонь топодеманцты.

 

Саранскяйса Победань площадьса ётафтовсь торжественнай митинг. Ся кизонь пелькс событиянь участникненди и свидетельхненди сюконяма, сяськиень поколенияти спасибань азома, сембонь сятнень лятфтама, кит тяни ашет мархтонк, сашендсть ошеряйхне и Мордовиянь столицань инжихне.

 

Торжественнай митингть панжемста Мордовиянь Оцюнясь Артём Здунов поздравляндазень пуромфнень странаньконь историяса Великай шить мархта: 

 

«77 кизода тяда инголе Советскяй народсь аралазе родной Отечестваньконь,  нолдазе воляс фашизмать  эзда ламоц странатнень и нароттнень. Республикасонк шачф-касф ломаттне тиендсть героень тефт сембе фронттнень эса: Брестскяй крепостть араламста, Москуть, Ленинградть, Севастопольть инкса ащемста, Сталинградть ала и Курскяй дугать лангса тюремста, Украинань, Белоруссиянь союзнай республикатнень и сембе Европать воляс нолдамста. Тылонь труженикне, аф ваномок ашушить и вачашить лангс, сатнезь Победать станокнень ваксса, паксяса, Сурскяй рубежса и госпитальхнень эса. Марса аватнень и сире ломаттнень мархта тылса стакат-сталмот кирдсть шабатне. Вечнай толть ваксса минь сюконяфнесаськ пряньконь сембонь сятнень лятфтаманкса, кие ашезь мрда войнаста, кие эреклафнезе народнай хозяйствать войнада меле. Сембось тя тиф минь инксонк, шабаньконь, сяськиень сай пингонь поколениятнень инкса!»

 

 
12.05.2022  № 18
 

«Бессмертный полк России» ООД-ть Мордовия Республикань региональнай отделениянц штабонц руководителец Н.А.КРУЧИНКИН: «ТЯДДЕ "БЕССМЕРТНЫЙ ПОЛК" ШЕСТВИЯСЬ КАРМАЙ АСЬКОЛЯМА МАРНЕК СТРАНАТЬ ЭЗГА!»

05.05.2022  № 17
 
 

Касы коронавируснай инфекцияса сярядихнень лувкссна

29 апрельста ётафтовсь коронавируснай инфекциять инголдаманц и келемоманцты кить персеманц коряс региональнай оперативнай штабть  заседанияц. Сонь работасонза примась участия Мордовиянь Оцюнясь Артём Здунов.

 

«Коронавируснай инфекцияса урмаськодомать мархта тефне Мордовияса ашесть полафта—300-та лама пациент пчксихть ковиднай госпитальхнень эса. Ваномс, штоба Маень праздникнень пингста массовай пуромксне афольхть ара урмаса сярятькстыхнень лувксснон касомаснонды туфталкс»,—мярьгсь регионть руководителец.

 

МР-нь Правительствать Председателенц заместителец Галина Лотванова азондсь эпидемиологическяй  тяниень пингонь ситуациять и коронавируснай инфекциять эзда населениять вакцинациянц мольфтеманц колга.

 

Ётай недялять коряс 19 процентта кассь госпитализированнайхнень лувкссна, сяда лама арась стационарса пчкафневи идьта. Коллективнай иммунитетсь кирсь и тячиень шити сон арась 52,7 процент.

 

05.05.2022  № 17
 
 

 

 

Яндекс.Метрика Яндекс цитирования Rambler's Top100
Учредительхие:
Главнай редакторсь: И. С. Лушкин