ИГОРЬ КОМАРОВ И АРТЁМ ЗДУНОВ ВАСЕТЬКШНЕСТЬ «МОНЬ МОРДОВИЯЗЕ» КАДРОВАЙ ПРОЕКТОНЬ СЯСЬКИХНЕНЬ МАРХТА

8 июльста ПФО-са Россиянь Президентть полномочнай представителец Игорь Комаров марса МР-нь Оцюнять аф лама пингс тевонзон тиендиснон Артём Здуновонь мархта васетькшнесть «Монь Мордовиязе» кадровай проектонь сяськихнень мархта.

Васедемась ётась лямбоста, «круглай шрань» форматса. Участникне азондсть регионть виияфтоманц коряс проекттнень колга, конат ни лихтьфт ваномс правительственнай уровеньц.

Лятфтасаськ, «Монь Мордовиязе» проектонь сяськихнень васенце заседанияса арьсефоль пуроптомс экспертнай клуб, коза сувсихть проектонь участникне и МР-нь Оцюнять Администрациянц и МР-нь Правительствать представителенза. Сонь целец—общественнай проекттнень ваномасна и пуроптомасна, грантонь ширде сяда товолдонь ширень кирдемась.

Игорь Комаров поздравляндазень сембонь сяськомать мархта и отмечазе, што экспертнай клубть тяфтама активнайшиц няфнесы од ломаттнень вешфксснон регионти результативнай работань кандоманкса. Стане жа сон отмечазе, што «Монь Мордовиязе»—тя ПФО-ть территорияса васенце кадровай проектсь, кона ётафневи «Россия—страна возможностей» АНО-ть ширень кирдеманц вельде.

«Тинь сяськоде эсь профессиональнайшинтень и целень сатомантень вельде. Тяфтама проектонь важнай целькс ащи региональнай и федеральнай социальнай лифтонь системать виияфтомац. Тя прябалась тячиень и ПФО-са, и Мордовияса. Тейнек эряви работамс карьернай лифттнень возможностьснон лангса, мзярда од и асу ломаттнень мяльсна вииякшнемс и каннемс польза. Минь мяль вельде примаськ Артём Алексеевич Здуновонь тяфтама проектонь ётафтомать коряс инициативанц. Надиян, што финалисттненди ули кода лездомс ся оцю задачатнень решандамаса, конатнень путозень республикать инголе Россиянь Президентсь В.В.Путин, экономикать виияфтоманц и эряфть качестванц цебярьгофтоманц коряс. Надиян, эрти эздонт ули кода няфтемс прянтень»,—мярьгсь ПФО-са Президентть полпредоц.

Кадровай проектонь финалисттне няфтезь васедемаса Мордовиять виияфтомаса кой-кона направлениятнень лангс эсь ванфснон-мяльснон. Предложениятне разнай планоннет и токсесазь социальнай сферать, ошень средать благоустройстванц, дополнительнай образованиять и культурнай сферать виияфтоманц. Артём Здунов отмечазе, што тняра лувксса активнай ломанень эвондамась, конат пичедихть эсь ёмла Родинаснон инкса, канды цебярь республикать сай пингонцты.

«Минь эстейнек отмечаськ, што марнек странать эзга эряйхть и мяльсна мрдамс ёмла Родиназост лама оцю классонь специалист. Мон эняльдян теенть работамс седи ваксста. Минь макстама кадровай проектонь участникненди компетенцияснон эзда ащи ответственнай постт. Карматама тиендема условият, штоба республикаса шачф-касф ломаттненди улель кода мрдамс тяза цебярь зарплата мархта работас и эряфонь цебярь уровеньц. Ламотне ни сатсть оцю сатфкст лия региоттнень эса. Тейнек важна, штоба  ня ломаттне эсь опытснон максолезь и минь республикасонк. Минь макстама теест тяфтама шанс. Кинди, кда аф теест, эряви работамс властнай структуратнень эса? Сембе сяськихне технологичнайхть, энергичнайхть и кельгсазь республикать. Инголе минь учсесамазь нинге лама назначения, тяконь лувксса и оцюфт. Тяни минь содафттама ня ломаттнень мархта. Тейнек эряви сатомс сянь, штоба эрсь эздост ащель-поволь вастозонза»,—отмечазе Артём Здунов.