ЁТАСЬ ЭРЯФОНЬ АФ ТЁЖДЯ КИ

Ламоц лувихненди лац содаф мокшень прозаиксь, драматургсь, публицистсь и критиксь Александр Иванович Завалишин и сонь творчествац, кона вииякшнесь 20-30-це кизотнень. Художественнай валонь оцю мастерть лемоц аш кода явфтомс аф аньцек мордовскяй, но и рузонь марнек литературать эзда. Сонь произведениянза нолявсть мокшень и рузонь кяльса.

Шачсь А.И.Завалишин Челябинскяй областень Варнинскяй райононь Кулевичи велеса 1891 кизонь 30  июньцта. Тядянза-алянза ульсть сокай-види мокшень ломатть, конат ётасть тяза эряма Пензенскяй губернияста. Тонафнемс теенза савсь пяк кржас, аньцек колма кизот. 12 кизоса ни постуфоль, батраколь. Сёрмадома тонафнесь сонць, сяльде якась ликбезонь кружокс.

1910 кизоня А.И.Завалишинонь сявозь военнай службас Оренбургскяй Казаконь войскас. Эсь автобиографиясонза тяштсь: «Военнай тевти аф прафтоманкса васенда  фкя кизос нолдамазь службаста, а мекпяли мянень эздонза прокс».

1911 кизоня «Северный труд» сборникса лиссь А.И.Завалишинонь «Душегуб и ведьма» васенце азксоц.  1913 кизоня сон арась ялгакс содаф учёнайть, исследовательть и писательть Н.А.Рубакинонь мархта. Сон тонафтозе од писательть сёрмадома и мярьгсь, штоба произведениянзон афоль эряскода печатламс. И, кода няйсаськ сяда тов, Александр Иванович сявозень ня валхнень-корхтаматнень мяльс. Сяда меле лама киза ашезь васьфнев сонь лемоц газетатнень и журналхнень эса.

1915 кизоня эряфсь вятезе мокшень цёрать Москуву, коса сон примафоль тонафнема Шанявскяень лемса Народнай университету.

Кудста лезкс ашель, сяс тонафнемада башка сон работась Земельнай Союзса экспертокс.

1917 кизоня А.И.Завалишин тусь Оренбургу, коса кочкафоль Оренбургскяй войсковой правительствав секретарькс, а 1918 кизоня Александр Ивановиченди савсь тумс Нарымскяй краи, коса ушедсь тюрема белогвардеецнень каршес.

1920 кизоня сон мрдась Кулевичи вели, тяса арась РКП(б)-нь членкс. Сяда тов кочкафоль велень Совету, тоса волости, а мекпяли Челябинскяй губернскяй Совету губисполкомонь членкс. 1922 кизоня Александр Иванович тертьфоль работама     ВКП(б)-нь ЦК-ть мордовскяй секциязонза, тоста кучфоль «Беднота» газетать редакциязонза, коса работась 1931 кизоти самс.

1939 кизоня Завалишин аш мезенксонга арестовандафоль и кулось ащема вастса. Челябинск ошть фкя ульцяц тяни каннесы Александр Иванович Завалишинонь лемонц.

А.И.Завалишин кармась сёрмадома 1911 кизоня. Но сяда кемоста кярьмодсь тя тевти 1920 кизоня, мзярда лиссь революционнай темать коряс «Бывшие» пьесац. Тя пингста сявомок «Советская правда» челябинскяй газетаса фалу васьфневсть очерконза, фельетононза, статьянза, театральнай рецензиянза. Ся пингонь ламоц произведениянзон сёрматкшнезень «А.Мордвин» псевдоним ала.

Васетькшнесь     А.И.Завалишин и А.М.Горькаень мархта. Содаф писательсь лама азондсь мокшэрзятнень историяснон колга, лездсь печатламс кой-кона произведениянзон.

1925 кизоня лиссть писательть «Скуки ради» и «Не те времена» азксонь васенце книганза, конат лемтьфтольхть ся пингонь эряфти. Александр Иванович лац содазе велень эряфть Советскяй властень васенце кизотнень. «Беднота» газетаса работамста теенза савсь лувондомс лама сёрма, конат азондсть  велень эряфть колга.

Эсь азксонзон эса авторсь оцю мяль шарфни покоди ломанть потма ширенцты, оржа конфликттнень няфтемаснонды, конат васьфневсть велень эряфса гражданскяй войнань мельдень кизотнень, мзярда сире койхне арсесть каршек од эрямань полафтксненди. Тя няеви «Прогадал», «Ночное дело», «Семейная радость» азкснень эса.

А.И.Завалишинонь эряфсонза и творчествасонза эсь лацост няфтсть пря мокшэрзянь литературать вииямань-касомань сталмонза. Кода писатель, сон пяк пичедсь мокшэрзятнень Россиява ёряфокс улемаснон инкса. Тя  няевсь «Сорок пять нацменов», «Крещение» азкссонза, а стане жа очерконзон и публицистиканц эса.

Ламоц азксонзон и пьесанзон эса А.И.Завалишин няфтезе, кода революцияда мельдень Россиять эряфозонза вишкста ушедсть сувсема видешинь колси ширетне (бюрократизмась, ломанть лангс мялень аф шарфтомась). Тяфтамот «Окунулся в массы», «Свет истины Христовой», «Семейная радость» и ламоц лия азксонза.

1927 кизоня писательсь нолдась Москуса нинге кафта сборникт, конатнень эса васенце вастса ащи велень ломаттнень эряфснон сембе ширдень няфтемац, лама национальностень ёткса сотксне, сире эряфть сюцемац и одти кинь панжемась. 1928 кизоня лиссь А.Завалишинонь «Пепел» азксонь сборникоц.

А.И.Завалишин оцю мяль шарфни гражданскяй войнань сталмотнень лангс. Тя темати аф кржа произведения лемтьф 20-30-це кизонь мордовскяй литературасовок. И синь ётксост тя азкссь ащи васенце вастса.

«Пепелть» мархта аделави Александр Завалишинонь творчестваса васенце этапсь. 1933 кизоть самс сон прозаса оду ашезь сёрмада, а кярьмодсь драматургияти. Тя жанрати писательсь шарфнесь мяль сяда инголивок. Нинге 20-це кизотнень ушетксста сон сёрмадсь пьесат народнай театратненди, художественнай самодеятельностти.  Челябинскяй театрать труппац васенцекс путозе писательть колма действияса «Бывшие» пьесанц. Пьесанзон печатлакшнезень «Беднота» газетась, а мекпяли синь нолдафтольхть башка книгаса. Сембоц А.И.Завалишин сёрмадсь кемоньда лама пьеса. Синь ётксост сембода содафт «Партбилет» и «Стройфронт».

1929 кизоня Революциянь Московскяй театраса путневсь «Партбилет» пьесац, кона шнафоль и азфтольхть пяк пара валхт.

А.И.Завалишинонь кизода кизос кассь маштомошиц. Сон кадондсы велень темать, оцю мяль шарфни васень пятилеткань стройкатненди. 1930 кизоня июльста А.И.Завалишин тусь Магнитогорскяи. Стройкань эряфсь макссесь авторти козя материал. Эсь народонц колга мялензон-арьсеманзон писательсь панжезень            «Стройфронт» пьесасонза, кона лемтьфоль Магнитогорскяй металлургическяй комбинатть строяманцты.

1933 кизоня Александр Иванович тусь МТС-нь политотделонь уполномоченнайкс. Тя тевса работамась макссь писательти козя материал. Кизода меле ни лиссь «Свежая борозда» повестец, коса тага кепсеви велень темась. Книгаса няфтевихть колхоснень пуроптомста сталмотне и тиф оцю тефне. Повестсь сувась писательть сборникозонза, кона лиссь куломдонза меле.

А.И.Завалишин кирдсь кеме соткст мокшэрзянь народть, мокшэрзянь газетатнень мархта, печатлакшнезень эсост пьесанзон. 1934 кизоня сашендсь Саранскяи. Корхтась седи ваксста валхт писателень собранияса. Сяка кизотнень ушедсь сёрмадома Советскяй Союзонь Маршалть С.М.Будённаень колга пьеса. Но ашезе адела, и материалхне сувасть «Хата Буденного» документальнай повестти, кона ащи тага фкя героическяй страницакс гражданскяй войнать историяста.

Сон сёрмадсь лама публицистическяй статья, очерк, рецензия.

Сон сёрмадсь рузонь кяльса, но ламоц произведениясонза няеви мокшэрзятнень эряфсна. Александр Иванович  эсь народонц сельмоса ванць эряфть лангс, касфнезе сонь духовнай культуранц, мархтонза фкя седиса кеняртькшнесь сатфксонзонды. Писательсь эсь творчествасонза няфнесь оцю тефт, ломанень кеме характерхт.

А.С.Пушкинонь лемса Национальнай библиотекань краеведческяй и национальнай литературань отделонь фондса кочкафт и ванфтовихть писательть произведениянза, эряфонь и творческяй кинц колга материал.

Александр Иванович Завалишин ётась эряфонь аф тёждя ки. Кадсь эсь мельганза лама цебярь произведения, конат лядсть эряфса и ломаттнень седиса.

Р.Аугустинавичус,

А.С.Пушкинонь лемса

Национальнай библиотекань национальнай и краеведческяй литературань

отделонь ведущай

библиотекарь.