Поиск по сайту: 
 

Архив
 март 
 2024 
пн вт ср чт пт сб вс
    123
45678910
11121314151617
18192021222324
25262728293031

 
 

 

ПОЮ ВЕЛЕСЬ ПОЛАФНЕСЫ ШАМАЛИКОНЦ

Мордовиянь Народнай поэтсь А.П.Тяпаев «Алят» содаф поэмасонза сёрмады: «Монь шачема велезе Алякс, эрь тага кибрязон тон листь, мзяра цёра касфтоть алякс, мзяра аля лихтеть кис…». Тяни Пойвелесь и Алякссь—фкя веле. Явфнесы аньцек проулканя. Инголи эрь велеть сонцень колхозоцоль, тяни сембось марстонне—и велень Советсь, и «Возрождение» ООО-сь, и школась. Калмаланкневок фкя перяфксса перяфт, но сякокс—Пойвелень эряйхне эсь  кулсиснон калмосесазь эсь ширезост, аляксэряйхе—синценнети. Престольнай праздникневок аф фкат—Аляксса—Миколась, Пою велеса—Михалусь.

 

—Веленьке фкя инь оцюсь марнек районца,—азонды Кадошкинскяй райононь Пою велень поселениянь оцюнясь В.П.Келин.—Миньцонк лувондови вете сятть малава куд. Кой-конат, ужяленди, пякснефт, сраткшнихть-калаткшнихть, но оцю пялькссна тифт-петьфт, кода корхнихть, тячиень вешфкснень коряс. Мярьголень стане, велесонк мольфтеви строительнай бум. Финцне—кудбрятнень полафнесазь, ташта шиферть вастс путневи профиль, металлочерепица, омбонцне—строяйхть-кеподихть од картт, банят, лиятне—путыхть од перяфкст, вятихть кой-кодама кудонь тефт.

 

Строясть кутт, картт, перяфкст Пою велеса сембе пинкнень. Но кода кярьмодсть тя тевти мекольце вете-кота кизотнень, тяфта нинге ашель. Фкя-фкянь лангс ванозь, ломаттне бта ладязь састь мяльс полафтомс велеть шамаликонц, мрдафтомс сонь ингольдень славанц. И мезсь нинге сяда кеняртьфти тя тевса—«крьвязсть» оттне. Ламонцнень ашет ни шиса тряйсна-касфтысна, а синь сякокс аф максыхть юмамс шачфтомань кудти, тиендьсазь семботь, штоба сон сяда товга эряль, васьфнель инжихть, итть, унокт.

 

—Лама семья мрдась меки вели эряма Саранскяйста, Рузаевкаста, Ковылкинаста, Инсарста, улихть нльне стамотка, конат састь Москуста,—сяда тов азонды Владимир Петрович Келин.—Мезе эряви тиемс минь ширденк,—лездомс пропискать мархта, кочкамс эрь кодама документт кудть собственностьс ётафтоманц квалма, ётафтомс куду газ, ведь, сембе  ня тефнень минь тиендьсаськ курокста, пингонь аф юмафнезь. Монь лездыезе велень поселениянь специалистсь Лариса Валерьевна Митина ши шишка заняф аньцек тянь мархта. Ломаттненди максси советт, азондсы кодама документт кочкама, коста синь мумат. Аньцек мекольце кафта-колма кизотнень вели мрдась эряма ведьгемоньшка семья. Эрсь эздост васьфтьфт кода радня ломатть.

 

Пара сявок, што кой-кит эстеест мушендыхть и работа. Хуш и тянь ширде Пою велеса аф тёждя, но сембе сяка ламонцненди мувсь работа «Изолайн» велень предприятияса, лиятненди «Возрождение» ООО-са. Кие содасы, пади, аф лама пингонь ётазь велеса панжевихть и од фермат, кярьмодихть жуватань касфнема. Корхнемат тянь колга вятевихть и надиятама тяфта и кармай, вдь нинге аф юкстафт ся пинкне, мзярда Пою  велень ферматнень эса тефне лаказь-лакасть, тястонь «Дружба» колхозсь най ульсь васенцетнень ёткса лофцонь, сиволень, алонь мишендемаса. Мрдафтомс ба тянь семботь, вельмофтомс ня тефнень, максомс од эряф ферматненди!

 

Азомс, што Пою велеса аш прябалат, ули аф виде. Мзяра киза ни велеряйхне муцяйхть кальдяв китнень инкса, лама вастова тунда, сёксень пизему шитнень тяса прокс аф ётават. Фкя пингть бта велесь ульсь сявф кинь водяма планц. Усксесть аф лама щебёнка, шувар и тя сатсь аньцек ветешка сятт метрас, сяда тов велеса кинь петемась повесткаста валхтфоль, юкставсь лама кизос. Аф шуроста тяса лисендихть прябалат и ведть мархта. Фкя ведень башнясь тяшка веленди аф сатни, сидеста ведаркатне шавот. Велень поселениянь оцюнять  валонзон коряс, маластонь пингть нолдави стройс омбоце резервнай башнясь. Тя тевса надияфтсь лездомс «Изолайн» предприятиясь, коса вятикс эсь велень мокшалясь Г.Г.Палаев.

 

Мезень колга нинге  аш кода аф лятфтамс-азомс. Пою велеса сембе пинкнень кельгозь книгань, журналонь, газетань лувомать. Лама сёрматфнихть изданияда и тячиень пингть. Инь кельгови газетась—«Мокшень правдась». Минь пара мялезонк, мес тя мокшень велеса аф юкснесазь эсь кяленьконь,  сире койхнень-обуцятнень, шнакшнесазь и ванфнесазь семботь минценнеть. Спасиба теенть, Пою велень эряйхть, сембонди шумбраши и паваз!

 

Н.Лобанов.

 

Фототне авторть.

 


 

 
НОВОСТИ
 

МОРДОВИЯСА ЛОТКАФТФ МАСКАНЬ КАННЕМАНЬ РЕЖИМСЬ

09.06.2022  № 22
 

НАЦПРОЕКТТНЕНЬ—ЭРЯФС!

Мордовиянь Правительствась сяда тов мольфтьсы работать национальнай проекттнень эряфс ётафтоманкса, конатненди ки макссь странань Президентсь Владимир Путин. Республикань Оцюнять ширеса совещанияса корхтафоль основной федеральнай и республиканскяй программатнень эряфс ётафтомаснон колга. Мольфтеви работать квалма азондсть вице-премьерсь Игорь Чадов, МР-нь строительствань и архитектурань министрсь Алексей Гришакин, МР-нь транспортть и дорожнай хозяйствать коряс Госкомитетть председателец Валерий Кандрин, МР-нь велень хозяйствань и продовольствиянь министрсь Александр Кечайкин, МР-нь вирень, охотничьяй хозяйствань и природопользованиянь министрсь Алексей Ларькин.

 

Мордовиянь Оцюнясь путсь задача кирдемс кеме контроль ала строямань графикнень пяшкотькшнемаснон. Васендакиге корхтамась мольфтевсь социальнай инфраструктурань объекттнень колга. Тяфта, ванфтольхть кизефксне, конат сотфт Саранскяйса Кировонь ульцяса 250 вастонди идень садть и Тавлинскяй набережнайса 1450 вастонди школать строямаснон шумордамасна.

 

09.06.2022  № 22
 

ЁТАФТОВСЬ АНТИКРИЗИСНАЙ ШТАБТЬ ЗАСЕДАНИЯЦ

2 июньцта Мордовияса ётафтовсь экономикать ширенц кирдеманц и кемошинц ванфтоманц коряс антикризиснай штабть заседанияц, коса ванондовсть республикаса уликс тефне. Азфоль, што Россиянь Правительствась сяда тов мольфти работа санкциятнень эзда экономикать араламанц коряс законодательнай базань тиеманкса. Региоттнень ширень кирдемасна и синь финансовай кемошиснон кемокстамасна—главнай направлениятнень эзда фкясь. Путф подпись РФ-нь Правительствать постановлениянц алу, кона максси возможность кирьфнемс пандоматнень бюджетнай кредиттнень коряс, конат сявфт дефицитть пяшкодеманкса.

 

Майста нолдаф тевс важнай продукциянь импортёрхнень специальнай льготнай кредитованиянь программасна. Тянкса федеральнай бюджетста нолдаф 37 миллиардта лама цалковай. Тяфтама ширень кирдемать сюнеда бизнести ули кода меки  ладямс товаронь рамсемать, конат мзярс аф нолявихть Россиять территорияса, и сяда тов мольфтемс сембе пингонь работать.
 

09.06.2022  № 22
 
 

Одкстоптови общественнай транспортсь

28 майста Саранскяйса Советскяй площадьса Мордовиянь Оцюнясь Артём Здунов ванозень пассажирскяй од автобуснень, конат работайхть газса. Мордовияти тя общественнай од видонь транспорт, кона арьсекшневи нолдамс тевс республикань транспортнай предприятиятнень подвижнай составснон одкстоптоманкса.

Автобусонь ноляйхне няфтезь средняй и оцю классонь техникать. Артём Здунов ванозень автобуснень эса тяниень пингонь салонть и водителень кабинаса оборудованиять.

«Газса работай техникась сяда ванфтсы экологиять и аф веши оцю карьхцьт. Тяфтама транспортть эвондамац максы инфраструктурати касома-виияма—ков сяда лама тяфтама видонь транспортта, тов сяда лама кармай заправочнай станцияда. Тянь мельге сай пингсь»,—китькстазе Мордовиянь Оцюнясь.

Сембе автобусне стане жа тифт усксемс физическяй ширде ограниченнай возможность мархта ломаттнень. Тяниень пингть Саранск ошса ули автомобильнай газонаполнительнай компрессорнай фкя станция.

02.06.2022  № 21
 

Ревакцинация COVID-ть эзда эряви ётамс сембонди

Мордовиянь Оцюнять Артём Здуновонь председательстванц ала 27 майста ётафтовсь Мордовияса коронавируснай инфекциять инголдаманц и келемоманцты кить персеманц коряс оперативнай штабть заседанияц.

Отмечафоль, регионца ванфтови ковидса одс сярядихнень лувксснон киремац—ётай недялять тя ульсь 30 ломань шити.

«Эряви сяда тов мольфтемс ломаттнень вакцинацияснон и ревакцинацияснон коряс работать. Тянь мельге ванома кода муниципальнай образованиянь оцюнятненди, стане и предприятиянь и бизнес-структурань руководительхненди. Тяниень пингть ётафтовихть ЕГЭ-тне, сяс инфекцияда инголдамань мератненди эряви шарфнемс башка мяль»,—мярьгсь региононь руководительсь.

МР-нь Правительствать Председателенц заместителец Галина Лотванова азозе, што республикань медицинскяй учреждениянь стационархненди тона недялять эрь шиня пачфневсь 20 малава ломань. Сёлкф нинге 50 ковиднай койка-вастсь, стационарса пчкси 203 ломань, конатнень эзда пялесна—60+ кизосот.

02.06.2022  № 21
 

Экономикать виияфтоманцты—башка мяль

Мордовиянь Оцюнясь Артём Здунов 27 майста ётафтозе республикань экономикать ширень кирдеманц и кемошинц ванфтоманц коряс антикризиснай штабть заседаниянц.
Региононь руководительсь мярьгсь, што Россиянь Правительствась сяда тов примси решеният, конат эрявкснихть тячиень аф тёждя пингть экономикать работанц лац ладяманцты.
 
«Васенце очередень тевонь мольфтемань федеральнай планти сувафтф нинге 23 кизефкс. Фалу эвондакшнихть од механизмат, од возможностть. Тейнек эряви синь сяда лац нолямс тевс,—мярьгсь Артём Здунов.—Кепотьксонди, Россиянь Правительствась дополнительнайста нолдай 3 миллиартт цалковай региоттнень эса спортивнай инфраструктурать виияфтоманкса. Эряви кенеремс тиемс заявка ня программатненди и получамс финансирования».

Тяфта жа арьсекшневихть отечественнай программнай обеспечениянь ширень кирдемань од механизмат. Республикань цифровой виияфтомань министерствати и региональнай IT-компаниятненди мярькф активнайста примсемс участия ня процесснень эса.

02.06.2022  № 21
 
 

Артём Здунов встретился с многодетными семьями

Глава Мордовии Артём Здунов провел встречу с многодетными семьями республики – её приурочили к Международному дню защиты детей.

Встреча состоялась в Доме Республики в теплой, почти семейной обстановке, за чашкой чая. В ней участвовали вице-премьер Галина Лотванова и министр социальной защиты, труда и занятости населения РМ Игорь Князьков.

«Я хочу от всей души поблагодарить всех многодетных родителей за ваш нелегкий труд, достойный глубокого уважения и общественного признания, - сказал Артём Здунов. – Вы взяли на себя большую ответственность. Понимаю, сколько дел в большой семье, какая у вас загруженность, но прошу вас, чтобы за этими делами вы не забывали разговаривать со своими детьми. Обсуждайте с ними, что происходит в мире, что было много лет назад. Нам важно, чтобы дети выросли настоящими людьми, чтобы любили свою семью и свою Родину. Это наша с вами общая задача. Вы выполнили и перевыполнили свою демографическую программу, спасибо вам за это, теперь дело за нами».

В Мордовии около 8 тысяч многодетных семей, в которых воспитываются более 25 тысяч детей.

25 мая Президент России Владимир Путин на заседании президиума Государственного Совета, посвящённого вопросам социальной поддержки, подчеркнул, что многодетная семья должна быть ценностным ориентиром для всего общества и поддерживаться государством. Президентом поставлена задача сделать всю систему поддержки семьи целостной, последовательной, понятной и эффективной.
02.06.2022