35 КИЗА—МЕДСЕСТРАКС

М.М.Полькина шачсь-кассь Атюрьевскяй райононь мокшень оцю и мазы велеса, конань лемоц Кяшал. Сонь шназе и моразе эсь стихсонза А.С.Малькин. Тядянза-алянза, Максим Иванович и Мария Васильевна, трудонь кельги ломатть. Синь трудендасть васенда «Партизанский», тоса «Кишалинский» совхозса. Алясь передовой механизатороль. Казьфоль лама оцю казнеса. Авась содаф дояркаль. Пенсияс тумдонза карша ётнесь покодема Стрельникавонь кшинь пидема заводу. Велень шнама ломаттне касфтсть вейхкса итть. Сембе синь арасть цебярь ломанькс, прянь шнафтома вастокс. Сембонь эряфсна-ащефсна, семьясна.

Мария Максимовна аф кальдявста тонафнесь школаса. Васенце учителькс ульсь В.И.Руськина, класснай руководителькс—И.Г.Руськин. Синь макссть аф аньцек цебярь содамошит, но и тонафтозь улемс честнай, порядочнай ломанькс. Аделазе Кяшалонь средняй школать. Ётай веконь кафксогемонце кизотнень ушетксста велень стирнятне и цёранятне классонь тушендсть фермав работама. Мария Максимовнаньге ялганза азсть мяль лядомс велень хозяйствав.

—А тядязе ашемань нолда,—виденцясь од мокшавась.—Кле, фермав мзярдовок аф поздаса, а вов образования эряви получамс. Шачфтыезти-касфтыезти каршек молема ашень карма.

Эстонь кизотнень медсестракс Атерень больницяса покодсь велеряец Анна Лебина (Блашкина). Сон лама азонкшнесь эсь профессиянц колга. Корхнесь сянь квалма, кода аралакшнесазь ломаттнень эряфснон, стакаста сярядихнень кепсесазь пильге лангс. Лангозонза ванозь Мариявок кочказе медиконь тевть. Тусь тонафнема Темникавонь медицинскяй училищав. Аф кальдявста аделазе. Прважазь покодема Оцядувонь участковай больницяв. Но тоса работась ёфси аф ламос. Атерень районнай больницянь главнай врачсь А.А.Стерлигов сявозе Мария Максимовнань поликлиникань идень консультациянь патронажнай медсестракс. Тя ульсь 1986 кизоня. Тянемс тязк и работай. А 1990 кизоня ётафтозь прививкань тиендема. И вов ни 35 киза заняф кельгома тевсонза. Шнасазь коллективса. Мушенды марстонь кяль иттнень, синь тядяснон-аляснон мархта.

35 кизода инголе сотозе эряфонц Атерень цёрать, П.Я.Полькинонь, мархта. Сон стане жа оцю семьяста. Родителенза, Мария Павловна и Яков Васильевич, сембе эряфснон лемдезь Атерень районти. Касфтсть цебярь итть. Кельгомань цятконясь од ломаттнень ёткса крьвязсь пяк вишкста—Пётр Полькин пингть тарксема ашезь карма. Кучсь кудат. Стирсь ашезь атказа. И вов ни мзяра киза эряйхть павазуста. Касфтсть кафта итть. Цёрасна, Сергей, аф кальдявста аделазе Атерь велень 1№ средняй общеобразовательнай школать. Тонафнесь Н.П.Огарёвонь лемса Мордовскяй госуниверситетонь Медицинскяй институтса. И 2012 кизоста сявомок трудендай больницяса хирургокс. Киза покодсь Пензенскяй областень Сердобск ошса, вете кизот—Торбеевань межрайоннай больницяса, кафта кизот—Сергиев Посадса. Тяни эряй-ащи, покоди Люберцань больницяса. Касы Андрюша цёраняц. Теенза ниле кизонят. Сонь пяк кельгсазь Полькиттне. Стирьсна, Мария, тусь тядянц киге. Сон аделась медицинскяй училища. Работась медсестракс Сире Шайгавонь районнай больницяса. Тядде лиссь рьвакс. И мирденц мархта эряй-ащи Москуса.

Мария Максимовна и Пётр Яковлевич Полькиттне нинге отт. Авась трудендай поликлиникаса, алясь—индивидуальнай предпринимателень ширеса. Мархтост эряй Пётр Яковлевичень тядяц, Мария Павловна. Сиредембяльхть трудонь кельги мокшавась, лама идень тядясь лядсь шава куду. А ськамот эрямась пяк стака. Сяс Полькиттне сявозь эсь пялост. Тяса сиренясь сельминголе, симтьф-антф, муськф, щаф-каряф. Эрявксты медицинскяй лезкс, вакссонза кельгома рьвяняц.

—Мзярда минь строяме, авозезе сембоса лезнесь,—корхтай Мария Максимовна.—Ашезь лисенде пялдонк. Тянивок Мария Павловна семья ёткса, сельминголе.

Полькиттнень оцю хозяйствасна: тракссна, вазнясна, ведражсна, тувосна, куднармоньцна. Аньцек кенерькшнек. Мария Максимовна аф пели кодамовок тевда.

—Тяфтома аш кода,—корхтай од мокшавась.—Эрят велеса и аф кирдят жуватат, аф путат пере, коза тя кондясти. Да и иттневок ошсот. Кудонь лезкссь аф шоряй.

Вов тяфта и эряйхть Полькиттне. Эряйхть и мезеньге лангс аф пеняцяйхть.

И.ВЕШКИН.