«Научнай и общественнай проектоньконь вельде минь касфттама патриотт!»

Мордовиянь Правительствать видеса гуманитарнай наукань НИИ-ть директороц, историческяй наукань докторсь, профессорсь Г.А.Куршева:
—Галина Александровна, кодама работа вяти  тяниень пингть Мордовия Республикань Правительствать видеса гуманитарнай наукань НИИ-сь?
—Институтса научнай, издательскяй и сембе лия работаньке мольфтевихть тематическяй планоньконь коряс. Но фкять синь эздост тейнек удалась аф кунара ётафтомс тематическяй планда вельф. Мон корхтан фольклорно-этнографическяй и лингвистическяй комплекснай экспедициять колга. Сонь ётафтозь июнть песта  и июль ковть ушетксста институтонь и И.Д.Воронинонь лемса Мордовскяй республиканскяй краеведческяй музеень учёнайхне Татарстан Республикань Тетюшскяй муниципальнай районца.
Экспедицияв минь тернемазь Татарстан Республикань Наукань Академиянь Г.Ибрагимовонь лемса Кялень, литературань и искусствань институтсь. И тя научнай проектсь ётафтфоль эряфс Тядянь-алянь кялень и народонь марстоньшинь Кизоть рамкаса, конань ладязе эсь Указсонза Татарстан Республикань Президентсь Р.Н.Минниханов.
Оцю лезкс комплекснай экспедициять ётафтомста учёнайхненди макссть Тетюшскяй муниципальнай райононь оцюнясь Р.Ф.Свефиуллов, сонь заместителец Е.П.Курков, Тетюши ошса и районца Татарстан Республикань мокшэрзянь национально-культурнай автономиять представителец И.Н.Николаева.
Экспедициять составс, коса вятикс ульсь институтонь литературань и фольклоронь отделонь заведующайсь, философскяй наукань кандидатсь И.В.Зубов, тяфта жа сувасть институтонь литературань, фольклоронь и этнологиянь научнай сотрудникне И.И.Шеянова, Л.А.Гурьянова, Т.Н.Охотина и  И.Д.Воронинонь лемса Мордовскяй республиканскяй краеведческяй отделонь этнографиянь заведующайсь И.Н.Кудашкина.
Кода содаф, Татарстан Республикаса, Населениянь 2010 кизонь Всероссийскяй переписть даннаензон коряс, эряй 23702 мокшэрзя. Ламонцне эздост компактнайста эряйхть республикань 28 велеса. Комплекснай экспедициянь учёнайхне мокшэрзянь фольклоронь, этнографиянь и кяльхнень коряс исследованият ётафтсть вете велеса. Нят—Тетюшскяй райононь Бессоново, Урюм, Киртели, Кильдюшево и Кадышево велетне, коса эсь пингстонза ётафнесь тяфтама жа исследованият мокшэрзянь содаф учёнайсь М.Е.Евсевьев.
Тя комплекснай экспедициять итогонзон коряс институтонь учёнайхне тяштихть научнай трутт, коса максыхть ня даннайхненди питне. И, тяда башка, ванцазь, конашкава  полафтсть мокшэрзянь национальнай культурань памятникне ся пингста сявомок, мзярда колгаст сёрмадсь М.Е.Евсевьев.
Тематическяй планоньконь коряс тиф тевоньконь ёткса, конешна, инь няевикс вастса ащихть «Мокшэрзянь мифология» и «Мокшэрзянь эпос» энциклопедическяй трудоньке. Васенцесь эздост тяддеть ушетксста пачкодсь ни лувихненди. Омбоцеть нолдаманцты эряви миллионда лама цалковай. Сонь ули кода мумс-вешемс грантонь форматса культурань инициативань Президентскяй фондса.
—А кода латцеви институтть работац культурань инициативань Президентскяй фондть мархта?
—Тяниень пингть культурань инициативань Президентскяй фондса ванондови грантонди нинге фкя заявленияньке. Кда грантонь сатомань пялькстомаса минь листяма сяськикс, грантонь ярмакнень лангс арьсекшневи нолдамс башка книгаса М.Е.Евсевьевонь научнай трудонза, конат тяда инголе ашесть печатлакшнев. Тяфта жа тя книгати арьсекшневи сувафтомс мокшэрзянь содаф, оцю учёнайть дневниконза, конат сёрматфт мокшень и эрзянь кяльса.
Грантонь ярмакнень лангс тяфта жа арьсекшневи печатламс «Мордовиянь литературнай энциклопедия» трудть, конань институтонь учёнайхне аноклазь-тиезь колмогемоньда лама кизоста.
—Кода содаф, институтть видеса работай Россиянь военно-историческяй обществать Мордовскяй региональнай отделенияц. Сонь вельденза кодама проектт удалась ётафтомс тядде?
—Кода Мордовскяй региональнай отделениянь председатель, мон азса: тя кизонь инь оцю сатфксокс тейнек арась Советскяй Союзонь Геройти М.П.Девятаевонди Торбееваса памятниконь путомась. Тя проектть, минь предложенияньконь коряс, эряфс ётафтозе Россиянь военно-патриотическяй обществась. Тянкса памятникть панжемста  26 апрельста Мордовия Республикань Оцюнять аф лама пингс тевонзон тиендисна А.А.Здунов азсь оцюдонга оцю сюкпря военно-историческяй обществать руководителенцты, Российскяй Федерациянь Президентть помощниконцты В.Р.Мединскяенди.
М.П.Девятаевонди памятникть панжемда меле, 27 апрельста Москуса ётафтовсь В.Р.Мединскяень и А.А.Здуновонь рабочай васедемасна. Васедемаса, коса тяфта жа савсь улемс тейне и республикань культурань, национальнай политикань и архивнай тевонь министрти С.Н.Баулинати, ванондовсть колма кизефкст. Нят—«Сурскяй рубеж» мемориалонь проектть анокламац, рубежень строительхненди, тылонь лия труженикненди, памятниконь тиемась и сонь путомац, а тяфта жа Темниковскяй райононь Алексеевка велеса святой праведнай адмиралть Ф.Ф.Ушаковонь усадьбанц одукс тиемац.
Сембе ня проекттне арьсекшневихть ётафтомс эряфс 2022 кизоня культурань инициативань Президентскяй фондонь грантонь лангс.
Сембе эрявикс заявкатне тоза ни пачфтьфт.
Кода минь сембе лац шарьхкодьсаськ, «Сурскяй рубеж» мемориалсь и Федор Ушаковонь усадьбац, коса тяфта жа панжевихть профильнай музейхть, эсь духовнай потенциалснон вельде лездыхть касфтомс од ломаттнень  афкуксонь патриотокс.
Лиякс мярьгомс, кармайхть эсост касфтома стама ломанькс, конат аф аньцек кельгсазь  эсь Отечестваснон, но и, кда эрявксты, фалу араласазь сонь!
—Галина Александровна, республикань Общественнай одкстоптф палатать васенце заседанияса тон нинге кочкафат председателень заместителькс. Сяс пара улель  содамс, кодама общественнай работа кармай вятема институтсь сяда тов?
—Кода и тяда инголе, институтонь научнай сотрудникне кармайхть макссема экспертнай питне республикань общественнай организациятнень проектснонды, конатнень синь ёрайхть ётафтомс республиканскяй, межрегиональнай, Всероссийскяй межкультурнай, межнациональнай и межконфессиональнай сфераса.
Тяда башка, институтонь сотрудникне фалу лездыхть республикань общественнай организациятненди синь мероприятияснон ётафтомста. «Шумбрат», «Кургоня», «Волгась—ялгаксшинь ляй» и сембе лия межрегиональнай, региональнай, международнай мероприятиятнень эса минь сотрудниконьке фалу работайхть модераторкс.
Сяс тейне ули кода азомс: эсь профиленц коряс общественнай работать рамканзон институтсь кармай келепнемост сяда тов.
—Удалаза сембе арьсефонте.
—Сюкпря.
В.Нестеров.