МАЗЫХТЬ МОКШЕНЬ СТИРЕНЬКЕ

Кельгома мокшень стиреньке! Пара мяльса пачфнесаськ теенть, што сяда тов мольфтеви газетасонк азф конкурссь, коса эрти ёткстонт ули кода примамс участия. Лятфтасаськ, тянкса теенть эрявкстыхть мокшень щамса фотографиянте. Синь можна кучемс редакциязонк тяфтама адресc коре: Саранск ошсь, Советскяй ульцясь, 22№ кудсь. Или электроннай почтазонк—mokshane-13-rm@yandex.ru Кда мяленте, сада редакциязонк и тяса фотографиятнень тисыне минь фотокорреспондентоньке. Фотографиянь тиеманкса ладяйхть кода сире пингонь мокшень щапне, стане и тяниень стилизованнай национальнай нарядсь. Кизоть песта тиевихть итокт конкурсти, сяськихненди казевихть казнет.
А тяни содафттядязь тячиень участницаньконь мархта.
Мокшень стирсь Мария Кузьмина шачемас коре Атюрьевскяй райононь Кяшал велеста. Тястоннет сонь тядянза-алянза—Людмила Васильевна и Николай Николаевич, тяса эряйхть щавац и щятяц—Мария Васильевна и Василий Алексеевич. Мзярда Машати ульсь кафта кизонят, семьясна ётась эряма Московскяй областень Воскресенскяй райононь Федино вели. Тяса героиняньке и касозе серенц. А кизонь каникулатнень най сашендсь Кяшалу. Да и тячивок сонь седиец фалу уски тя аймаку. Аф стак школать шумордамда меле сон сась тонафнема Мордовияв. Маша пуропни содамошит Н.П.Огарёвонь лемса МГУ-нь экономическяй факультетса «Экономическая безопасность» специальностьс коре. Тядде стирсь шумордазе васенце курсть.
Тячиень конкурсантканьке школаса няфнесь оцю сатфкст тонафнемаса, сембе предметтнень коряс сявондсь аньцек «ветет». Эсь содамошинзон Маша сидеста няфнезень предметнай олимпиадатнень эса. Школать стирсь аделазе зрнянь  медаль мархта.
Маша Кузьминась кассь сятяв шабанякс, но тяка пингть ашезь визне няфнемс прянц эрь кодама мероприятияса. Нинге идень саду якамста ушедсь примсема участия эрь кодама иласа, коса, ванат, кштий-морай, коса стихотвореният азонды. Садонь воспитательхне лямбоста лемнелезь сонь «ёмла тяштенякс». Школаса мокшень стирсь сядонга оцю мяль кармась шарфнема кштимати. Лама киза сон сувсесь «Сувенир» народнай кштимань коллективти, а сяда эзрайста кштишендсь «Инфлайм» тяниень пингонь кштимань коллективса.
Тячи героиняньке лама пингта максси тонафнемати, но тя аф корхтай сянь колга, што сон аф мушенды ётка лия тевонди. Кепотьксонди, Маша машты гитараса морама. Хуш тя инструментть сявондьсы кядезонза аф сидеста, но лисенди сонь пяк лац. Тяда башка, стирсь мусь пинге тонафнемс автошколаса, тунда сон получась водителень прават. Сонцень машинац Машать мзярс аш, сяс сон пара мяльса озси алянц автомобиленц руленц ваксс и вятьсы техникать, эряви азомс, оцю опыт мархта водительхнень коряс аф сяда кальдявста.
Конкурсантканьке пяк кельгсыне кудонь животнайхнень. Сонь ули Артик лемса ёмла пиненяц. Саранскяйса тонафнемста Маша аф азовомшка лажаткшни теенза, сяс васедемста ктморясы-палсесы сонь мала ломань лаца.
Тяни героиняньконь молихть кизонь каникуланза. Ваймама шитнень стирсь тага ётафнесыне Кяшал велеса. Тяса сон аф аньцек ваймоси, но и лезни щаванцты эрь кодама тевса: кочки-валонды панденят, урядай куд. Фотографиятнень эзда няйсасть Машать щаванц мокшень щамсонза, кона Кяшалса лемневи кафтонькрдакс. Тяфтама панарса Кяшалонь мокшаватне якайхть стакшистовок. Героиняньковок пара мяльса щашендсы сонь кудъёткса.
Кода ни азоськ, М.Кузьминась касозе серенц Моску алдонь Воскресенскяй районца, руз ёткса, но, аф ваномок тянь лангс, сон пяк лац корхтай мокшекс. Тя и шарьхкотьф, вдь семьясост най корхнесть и корхтайхть аньцек родной кяльса. Людмила Васильевна и Николай Николаевич синць мзярдовок ашезь сёпонда-визне кяльснон, тякоти водендазь идьснонга (героиняньконь нинге ули ёмла дуганняц Кирилл).
Вов тяфтама сон, мокшень стирсь Мария Кузьмина. Сафтсы аф аньцек тонафнемаса, но и лия эрь кодама тевса, шарфни мяль национальнайти.  Редакциянь коллективоньконь эзда арьсетяма теенза оцю сатфкст эряфса!
О.ЕВДОКИМОВА.