СЕМБЕ ВАСТСА КЕНЯРТЬФТИ ПОЛАФТКСТ

«Богдановское» ООО-сь кизоста кизос кемоста арси ряцок инголи моли хозяйстватнень ёткс аф аньцек Старошайговскяй районца, но и марнек республикаса. Тя и шарьхкотьф, хозяйстваса няевиста кассь лофцонь лувксонь потямась, сиволень мишендемась, тяса най пяшксет сёроса утопне. Тяддень кизоти путфт аф сяда ёмла задачат и синь пяшкодемасост аш кодамовок кизефкст, тянди водендафт сембе вийхне. И фермаса, и паксяса, и тинголангса ломаттне покодихть кепотьф мяльхть, оцю сатфксонь сатнезь.
«Богдановское» ООО-нь директорть Степан Степанович Якомаскинонь мархта ардоме сёронь паксяв, коса  ингольдень кизотнень кочксесть аф 10-15 центнерда сяда лама сёра эрь гектарста. Тядде тя участкаса арьсихть кочкамс 40-50 центнеронь. Мезьса туфталсь, кода тя сатовсь?
—Туфталсь фкя—тя модати путоме оцюдонга-оцю труд,—ушедсь азондома Степан Степанович.—Инголи тя паксяса касондсь аньцек сор тише, равжа модать вастс ульсь шувар, кой-кона вастова «кепсезь» пряснон келунятне. Вов и саме мяльс, макстама ня васттненди од эряф, полафтсаськ плодородиять, усксетяма тяза мзяра эряви назём, ётафттама лия агротехническяй работат и тевсь, кода корхнихть, тусь вастстонза. Виденц азомс, монцень седисон  пяк лад, мзярда ванан тя паксяса касфтф урожайть лангс, аф стак путоме тяза тняра вий-эрьгя.
Директорть, Степан Якомаскинонь, мархта кенярдеме касфтф козя урожайть инкса и миньге. Мяленьколь содамс кода тядде мольфтеви сёронь урядамась, кода ладяфт тефне тинголангса? Ня кизефкснень лангс тяфта жа кулеме курокстонь ответт и эсь сельмосонк няеськ, кода хозяйстваса мольфтеви урожайть инкса «тюремась», кода шамондыхть паксятне и касыхть сёронь мархне тинголангса. Сембе вастова ломаттне покодихть оцю ответственностень марязь, васенце вастса сявондеви мяльс качествась. Нежедеме од комбайнёрти Евгений Максимкинонди. Сон  тяса покоди колмоце кизось и эрь сезонцта сатни оцю сатфкст. Комбайнац аф од, но работай апак лотксек, кода частт. Тя сяс, мес техникась цебярь азоронь кядьса, цёрась мельганза ваны, кода эсь личнай машинанц мельге.
—Лиякс аш кода, эрь техникась, кода сембось живойсь, кельгсы мельганза ваномать, эсь пингстонза семботь тиеманц, синнефть петеманц,—мярьгсь Евгений.—Монь мялезе тяддень сезонцта тялямс 7-8 тёжянь центнер сёра. Урожайсь цебярь. Мезе эряви агрономическяй, инженернай службатнень, сонцень директорть Степан Степановичень ширде, семботь тиендьсазь курокста и эсь пингстонза. Простямасть, ламос аш пингозе корхнемс, паксясь учи...
Кулхцондат тяфтама од цёрат, сёронь касфнихть и гордостень марязь мярьгат: ули странаньконь вандыец, ули кинди  кеподемс велень хозяйствать, кинди пяшкотькшнемс продовольственнай программать.
Ся шиня, мзярда анокласьк --тя материалть, сёрось  хозяйстваса урядафоль ни 200 гектар лангста. Ушеткссь тифоль аф кальдяв, эрь шиня темпне касфневихть. Шинек-венек ладяф работась и тинголангса. Тя участкаса покоди кеветиешка ломань и эрть колга директорть эзда кулеме аньцек шнамань валхт. Юрий  Иванович Сарайкин покоди зерносушилкаса операторкс. Тя тевть сон тиендьсы аф васенце кизось ни, сяс лац содасы, кодама температураса косьфтамс сёроть, мзярс кирдемс ёмкость потмоса, кодама утомс прважамс анок продукциять. Усксесы сёроть тинголангса од водительсь Евгений Лошкарёв. Сонь ГАЗ-53 машинац ши шишка тевса, мархтонза ускси сядот тонна сёра. Ся пингти тинголангса ульсь ни 400-ть малава тонна кочкаф од урожай.
—Оцю работа тиендихть аватне, синь сёроть нолясазь сортировальнай машина пачк, анокласазь сонь утому прважамс, а кона эряви—аноклави нолдамс косьфтама,—сяда тов азонды Степан Якомаскин.—Сембонди оцю спасиба работаснон инкса, арьсян шумбраши, кеме вийхть.
Степан Степанович анок эрть колга азомс лямбе валхт, аньцек аф эсь колганза. Тяфтама ни сон ломанць—сяда лама пара тевда тиемс лиятненди, а эсь прянь шнафтомась тя аф сонне. Тячемс минь сонь содасаськ кода скромнай, пара тевонь тиенди, шнама ломанень. Тяфтамокс и лятт, Степан Степанович. Шумбраши тейть и лама кизонь эряф!
Н.Лобанов.