«НАЦИОНАЛЬНАЙ ТЕМАСЬ ЛИХТЬФ ТЕАТРАТЬ РЕПЕРТУАРС!»

Мордовия Республикань И.М.Яушевонь лемса музыкальнай театрать директороц,
Республикань искусствань Заслуженнай деятельсь В.И.Шарапов:
—Владимир Иванович, кодама работа тяниень пингть вяти Мордовия Республикань И.М.Яушевонь лемса музыкальнай театрась?
—Тяддень 28 июльста, лисемок отпускста, минь ётафтоськ театрань актёронь коллективть марстонь пуромксонц,  коса  ваноськ, мзярда и кодама спектакльса тейнек эряви панжемс театрать 86-це сезононц. Тяфта жа кепсевсть гастролень ётафтомань, од постановкань путомань и лия творческяй кизефксне.
Актёронь коллективть марстонь пуромксонц итогонза тяфтапт. Мордовия Республикань И.М.Яушевонь лемса музыкальнай театрась тяддень театральнай 86-це сезононц панчсы 4 сентябрьста И.Штраусонь «Цыганский барон» опереттаса, конань аноклазе Мордовиянь Заслуженнай артистсь Александр Челышев. А 5 сентябрьста театрань сценать лангса зрительхне няйсазь Мордовиянь Народнай артисткать, Россиянь содаф композиторть Нина Кошелевать «Алёна Арзамасская» одкстоптф балетонц премьеранц. Сонь аноклазе-путозе Мордовиянь Заслуженнай артисткась Наталья Атитанова.
25 сентябрьста зрительхненди арьсекшневи няфтемс «Сильва» балетнай спектакльть премьерац.
Тяда башка, театральнай од сезонца поладсы эсь работанц «Театральная атмосфера»  творческяй проектсь, кона цебярьста ушедозе эсь работанц меля. Проектть рамкаса театрань симфоническяй оркестрсь Ёмла залса и Яушевскяй гостинайса кармай ётафнема классическяй музыкань концертт.
Тяфта жа, театральнай 86-це сезонть панжемда инголе, минь ёратама ётафтомс «Темниковса кизонь театральнай сезон» фестивальть.
Сон ётафтови васенцеда, но ули мяленьке тиемс сонь эрь кизоннекс.
—Кода эвондась «Темниковса кизонь театральнай сезон» фестивальсь? И кодапт тя творческяй проектть эсь лацонь ширенза?
—Тяфтама фестивалень тиемань-ётафтомань колга мяльхне-арьсематне кунара ни шарсть И.М.Яушевонь лемса музыкальнай театрать эряфса. И вов сась пинге, мзярда синь сувафтовсть фестивалень форматс.
Тя культурнай проектть инь оцю идеяц ащи вов мезьста. Музыкальнай театрать репертуарса лама постановкада, конат путфт мировой и странань классическяй произведениятнень лангс.
Но кирдемок мяльса, кинь лемонц каннесы музыкальнай театрась, минь ушедоме сувафнема театрать репертуарс постановкат, конат путфт Мордовиянь композиторхнень и культурань лия деятельхнень произведенияснон лангс. И кода няфнесы статистикась, Мордовиянь авторхнень произведенияснон лангс путф спектакльхне и симфоническяй музыкань        концерттне пяк тушендыхть зрительхнень мяльс.
Тяфта жа, койсон, зрительхненди шарьхкодеви, мес тя фестивальти ётафтомань вастокс минь кочкаськ Темников ошть. Койсон, историческяй сяда козя и марнек  странаса содаф васта республикаса аш.
Тяни фестивальть репертуаронц колга. «Темниковса кизонь театральнай сезон» фестивальса зрительти няфтевихть Нина Кошелевать «Алёна Арзамасская» балетоц и «Мокшэрзянь легенда» ёфкссь-балетсь.
Фестивальса зрительхненди тяфта жа няфтеви симфоническяй музыкань оцю концерт, коза сувасть Мордовиянь композиторхнень инь содаф произведениясна.
Фестивальсь кармай молема кафта шит—21 и 22 августста. Сембе мероприятиятне ётафтовихть ульцяса, панжада менельть ала. И тянди улихть туфталхт. Кепотьксонди, «Алёна Арзамасская» балетсь зрительхненди няфтеви ся вастса, коса XVII векста ульсь плхтаф народнай героинясь.
Надиян: «Темниковса кизонь театральнай сезон» фестивальсь аф аньцек туй зрительхнень мяльс, но и нолдай ётафтома вастса крхка юрхт. И, тяда башка, надиян: сай кизоня фестивальса няфтьсазь эсь инь цебярь постановкаснон Россиянь лия региононь музыкальнай театратне. Эста фестивальсь регионнайста кеподи Всероссийскяй уровеньц!
—Театральнай од сезонцта, Владимир Иванович, кодама од постановкаса кеняртьфтьсы зрителенц И.М.Яушевонь лемса музыкальнай театрась?
—Коронавируснай пандемиять пингста ладяф ограничениятнень инкса, азса видеста, зрительть тердемс спектаклень ванома арась сяда стака. Сяс ваныхнень лувксснон аф прафтоманкса театрась ушедсь ноляма тевс аф фкя лацонь акцият.
Кепотьксонди, спектакльда инголе театрань фойеса няфневихть симфоническяй музыкань нюрьхкяня концертт. И, тяда башка, театрать сайтса эрти ули кода онлайн форматса ваномс тяда ингольдень постановканьконь, конатнень коряс сяда лац шарьхкодеви музыкальнай театрать художественнай уровенец.
Но сембода пяк театрав зрительхне сашендыхть од балетонь, оперань, водевилень, музыкальнай спектаклень ванома. Тянь цебярьста шарьхкодемок, мекольдень ниле кизотнень театральнай эрь сезонцта минь нолятама вете-кота од постановка.
Тяддевок минь арьсетяма сяда тов мольфтемс тя цебярь койть. Колма од постановкатнень, конатнень премьерасна ётафтовихть сентябрьста, лемснон мон ни азондыне тяда инголе. Нят—И.Штраусонь «Цыганонь барон» опереттац, Н.Кошелевать «Алёна Арзамасская» балетоц и «Сильва» балетнай спектакльсь.
Синдедост башка, аноклавихть П.И.Чайковскяень «Евгений Онегин операц, Ц.Кюинь «Красная шапочка» оперась-ёфкссь и «Кармен» оперась.
Надиян, ингольдень постановканьконь лаца синь тяфта жа туйхть сембе возрастонь зрительхнень мяльс.
—Владимир Иванович, шарьхкотьф, пандемиять инкса омба мастору гастрольсь театрась тядде аф молеви. Пади, удалай ётафтомс гастрольхть Россиянь кодамовок регионца?
—Тядде тейнек удалась сатомс грант, пялькстомок странань лия театратнень мархта Россиянь Культурань министерствань государственнай программаса. Ня ярмакнень лангс И.М.Яушевонь лемса музыкальнай театрась октябрьста ётафты оцю гастрольхть Смоленскяйса и Киров ошса.
Пингстост тостонь оцю зрительхненди минь няфттяма балетнай спектакльхть, а иттненди—музыкальнай ёфкст.
Тя гастрольхнень, азса видеста, минь лувсаськ оцю сатфксокс. Сяс мес пандемиять пингста анокламс синь тейнек ульсь сатомшка стака. Но минь надиятама, сяка сай пинге, мзярда коронавируснай инфекциясь машфтови. И минь тага карматама покодема ограниченияфтома.
Кепотьксонди, кода 2019 кизоня, мзярда И.М.Яушевонь лемса музыкальнай театрась,—фкя кизоста!—якась гастрольс омба масторонь кота странас.
В.НЕСТЕРОВ.