Братт-гармонистт

Браттне-кафтасне Юрий и Владимир Келиттне кассть ся пингть, мзярда гармонистсь велеса ульсь инь кельгома инжикс. Тя инструментфтома ашезь ётне фкявок ила, а илять гармошкать перьфке пуромкшнесть пцтай сембе од ломаттне.
…Кадошкинскяй райононь Пою велень асу гармонистть Н.В.Шичкинонь мораманц мельге браттне ванондсть ёт ёмла шабакс улемстост. Озсесть мокшалять ваксс и панжадонь куркт кулхцонкшнесть эсонза, пяк оцюволь мяльсна тонадомс морама тяфта жа лац, кода Николай Васильевич. Эсь гармониясна эста ашель, да и кода рамасак сонь, вдь инструментсь пяк питниель. Аф фкя ков браттне кочксесть сюлекат, а мзярда инксост сявф ярмакнень лангс рамазь васенце инструментснон, кенярдемаснонды ашель пе. Эстокиге састь Николай Васильевиченди и эняльдсть, штоба ся ушедоль мархтост работама—тонафтолезень гармонияса морама. И цят кельмотнень пингста, и пиземста браттне эряскодсть мокшалять шири  маштомошиснон касфнема. Кудсовок ашезь кадонда кядьстост гармошкать, аньцек эвондакшнель ётка пингсна, эзк ушеткшнесть фкя-фкянь мельге пунятнень люпшнемост.
Васенце выступлениясна Келиттнень ульсь велень школаса. Ломаттнень мяльс пяк тусь браттнень морамасна. Шнамань валхне, мярьгат, макссть теест пацят, синь ушедсть старандама сядонга пяк.
Содафши браттненди-гармонисттненди кандсь «Мордовочка» морось, конань синь моразь Кадошкинань сценать лангса 1994 кизоня. Тяда меле Юрань и Володянь ушедсть тернемост районца ётафневи сембе пуромксненди-илатненди, а сяльде синь кармасть няфнема пряснон республиканскяйхнень эсовок. Тяни фкя гармониясь браттненди ашезь сатне ни, сяс рамафоль омбоцесь.
Фкя пингста кафта гармошкаса морамати Келиттнень тонафтозень Кадошкинскяй районца ся пингть содаф баянистсь Хайдар Турчаев. Кода виденцясть браттне, тя максовсь теест аф тёждяста, эрь мороть эса тонафнесть кемонень ши. Аф весть эвондакшнесь туфтал  кадомс тевть, но мяльсь арамс цебярь гармонистокс сяськсь.
Тячи браттне Келиттне лац содафт аф аньцек Кадошкинскяй районца и республикаса, но и лия вастсовок.    Гармонисттне примсесть участия лама фестивальса-конкурсса и лисендсть сяськихнень лувксс. Юра и Володя няфтезь пряснон нльне Г.Д.Заволокинонь лемса «Морак, гармония!» Международнай фестивальса. Тя ульсь 2012 кизоня. Тяса браттне занязь омбоце вастть.
Ломаттне тернесазь Келиттнень морама свадьбаса, юбилейса,  армияв солдатонь прважамста и лия иласа. И тя аф аньцек Мордовияса, но и шабрань региоттнень эсовок—Москуса, Нижняй Новгородса, Ульяновскяйса, Пензаса, Самараса.
Гармониясь браттненди бта пара ялга. Эздост синь пцтай кемонь. Ётксост и оцюфт, и сяда ёмланят, питнихть и аф пяк. Кда синневихть, Юра и Володя синць и петнесазь инструментснон.
Эряви азомс, браттне морайхть аф аньцек гармонияса, но и кургса. А мекольдень пингть ушедсть сёрматкшнема мокшень морот и латцема музыка. Ули Келиттнень синцень эстраднай ансамбльсна, лемоц «Мокшень алят». Гармонияда башка тевс нолясазь ударнай инструменттнень и бас-гитарать. Концерт мархта коллективсна уленди больницятнень, идень куттнень эса.
 —Пара мялезонк, мзярда мораманьке канни кенярдема ломаттненди,—азозь Келиттне.
Аф ваномок сянь лангс, што тячи кафцьке браттнень синцень тевсна, семьясна, идьсна, гармошкать колга синь мзярдовок аф юкснихть. Цебярь морось лезни теест и ваймамс, и седи петемс.
О.ЕВДОКИМОВА.