Землетрясения

Алясь мон виде ваймонян. Мезе азыхть, сянь путса прязон. И афолине няе рахсихнень-кичкоряйхнень. Стапнень эзда монь фкя ялгазе—Ягабабкин. Афи сяшкава ялга, да мархтонза покодян фкя учрежденияса. Монь шразе кеветиеце кабинетса, соннесь кемгафксувоцеса. Улхка шобдава сань работама вастозон, каяйне плащезень, валхтыне шляпазень, ёрайне шяярьнень сеендемс, да лядьсь мялезон—прязон ашезь ляда ни фкявок шяярь. Кизунян ни, няйсасть.
Лисень кабинетста, сувань Ягабабкинонь шири... шумбракстома. Сувань, а сон, Ягабабкин, ащи шранц ваксса—кургсонза сиянь пеенза пиндолдыхть. Инголенза озаф аф содаф аля. Кядень люпштазь шумбракстонь кафцьконь мархта. Ягабабкин корхтась аф содаф аляти:
—Тячи шобдава азозь радиоса. Монць кулине. Эпицентрась кармай улема вокзалть маласа...
—Да?!—тейне-арам, эвотьфста абонгодсь алясь.—Стама зиян минь ширесонк нинге ашель...
Мон стяфтыне пиленень. Мезе, шта, радиоса азсть? Кодама эпицентра кармай улема вокзалть маласа? Вдь ся маласа монга эрян. И кизефтень:
—Мезе азсть тячи шобдава радиоса?
—Саранскяйсонк учсеви землетрясения. Али тонга ашить куле?—корхтазевсь тейне Ягабабкин.—Сембода вии трнатома-комболдома вастоц кармай улема машина кинь станциять маласа. Монь рьвязе кудса петфнезень ни сембе вальмятнень кагодса, каба афольхть лопие клянцекне. Питни паршиеньконь кяскавга мараськ. Лихтьсаськ ушу.
«Вона мезе учсеви!—абонгодонь монга.—Хуш минь тястонь моданьконь эса аш аф нефтат, аф вулканонь магмат-месть и сякокс... землетрясения... Стихия!»
Эстокиге маладонь телефонти, кочкайне эсь квартирастон иомерть.
—Да-да,—маряйне тоста рьвязень вайгяленц.
—Петровна, кулят?
—Кулома аф срхксян. Тон мес тяшкадокиге ёрасамак кулофтомс? Али од аваня эстейть муть?—изгордозевсь тона песа Петровназе.
Аватне хуш аф сембе фкя лацот, но лама эздост изгордомань кельгида. Синь кяльсна шинек-венек аф сизсихть: мтор-изгор, мтор-изгор. То тя аф мялезост, то ся аф стане ащи. А моннесь вчёк стапнень ёткста и нинге коль пеленди—муян эстейне лия рьвя. Сякось кяльбрясонза: «Няйса, мон тонь мяльцень мольфтине! Арьсят, кода пезень сатфтомс!»
—Кизефнете: кульсамак али аф?—пешкодонь трубкати.
—Кульхте, кульхте. Нинге мезе азат?
—Тон од орозень, костюмозень и лия питни паршихнень кочкайть кяскавс,—тндян.
—Тон эсь ёньцотат?! Синь шкафса ащихть лац-ряц.
—Сявомс эрявихть. Кочкайть синь кяскавс!
—А-а! Вона мезе! Тон срхкать монь эздон тумс? Муть эстейть—кодамонь колга кунаркиге арьсекшнят? Ну и архт, а мон тейть кодамовок кяскав аф максан... кяскавса лапотьф!
—Тон кульхть!—тага пешкодонь мон.—Ягабабкин азондозе...
Но Петровназе сяда тов ашезь карма кулхцондомон, сонць снавкс почердазень валонзон:
—Ах, монь ни лемнесамак яга-бабакс?! А тонць кият? Кащей! Уфам пря! Мзяра киза-тяла тейть муськондень, пицень-панцень! И вона кода пандсак па... парозень. А... афтерькс, улефтярят!—уркодозевсь Петровназе.
—Лоткак уркодомда!—тага пешкодонь трубкати.—Ягабабкин ялгазе мярьгсь—тячи ули землетрясения.
—Мон—яга-бабан, а тон туят Ксенияти?! Ну и архт!—мярьгсь-гавкстсь Петровназе и шлепадезе трубкать.
Мезе тейне ляткшнесь? Нинге весть абондозь варжакстонь Ягабабкинонь лангс и эрязста лисень. Эсь кабинетсон щайне плащезень, щафтыне шляпазень и ласькозь—куду.
Пачкодень, панжине кенкшть, а тяса ни, ванан, «землетрясениясь ушедсь». Кияксса колсеф-тапсеф кядьгонят. Щапне-месне тарксефт шкафста и ёряфт кода-повсь. А Петровназе ащи киякс кучкаса, кяденза люпштафт тифтень бокованза и ваны лангозон кашанготф тигракс. Сяльде кодак рназеви:
—Ах, тон сать паршихнень инкса! Сявить!—няфтсь киякс кучкаста тарелка да банка пялькснень лангс.—И сявк тяста эсь шотценьге! Аертт баба-ягать эзда! Архт Ксенияти!—азозень ня валонзон Петровна, варжакстсь тумбочкать шири, тоста няезе панчфу кукшеннять, конань тейне казендезе шачема шистон профкомсь, фатязе кафта кядьса, цят!—мастору. Сявок срадсь пяльксонь пялькс.
—Лоткафт. Сетьмок. Кулхцондомак.
А сон афи кули. Стаки грохии. Веляфтозе шрать. Цяткофтозень мастору стенаста часттнень, сяльде фатясь миле, эрьхтезе люстрать—ледерьгодсть сянь хрустальнянза. И милень кеподезь Петровна врьгятсь монь лангозон.
—Лоткак! Сетьмок!—пешкодонь мон и савсь нолдамс тевс алянь вийсь. Кундайне кяденц.—Кулхцондомак!
И кода-аф кода азондыне сянь, мезе ёрань ёфтамс нинге телефонца. Ванан, Петровназень шамац ушедсь валдомома, а сяльде кодак рахазеви:
—Эх, тон, таяфтф ломань!—корхтась ни ляпоняста.—Няк, содасазь, конашкава тон виде ваймонят и рахсихть лангсот. Ся Ягабабкинць рахсемга стане азозе, а тон афкукс прязт путыть валонзон.
Кали васькафтомань? Ули али аф землетрясения? Да тейне сон тяни афи пелькс. Бльшем, монь Петровназе сонць землетрясениянь эпицентра.

Михаил МОИСЕЕВ.