И кштий-морай, и сиде моронят сёрмады

Тячиень героиняньке, мокшавась Александра Николаевна Мелёшкина, шачемас-касомас коре Темниковскяй райононь Конак веленне. Тя тяни тоса сидеста азорондай сетьмошись, а Александра Николаевнань идькс пингстонза ульсь меколанкт: сетьмошить колселезь горняй мокшэрзянь моротне, гармониянь коряс кштиматне.

Кельгозь морамаснон Асташкиттнень семьясовок. Мирттне-рьвятне Николай Павлович и Дарья Ивановна морофтома ашесть ащекшне фкявок минута. И паксяса тишень урядамста, и переса-садса работамста—мокшень кувака моротне най мархтостольхть. А илять, стака тевда меле, кудснон инголи пуромкшнель цють аф сембе велесь, морась гармониясь, ару лихтибрянякс «шудесь» мокшаватнень вайгяльсна.
Асташкиттне шачфтсть-касфтсть кафкса итть—сисем стирьхть и фкя цёра—и сембе эсь лацост кштий-морай ломатть. Тячиень героиняньке, кепотьксонди, нинге ёмла класса тонафнемста ульсь  артисткакс. Фкявок ила, фкявок пуромкс ашезь ётне соньфтемонза. Морсесь сон аф аньцек школаса, сявонделезь и Темниковав, и шабрань велетненди выступандама. Эста тяфта ладяфоль, самодеятельнай      артисттне яксельхть велеста велес, няфнелезь фкя-фкянди маштомошиснон, асушиснон. А кодама весяласта ётнельхть илатне! Ломаттне кштизь-моразь яксельхть кудста кудс, мархтост най гармониясель. Од стирсь Александра аньцек марялезе народнай тя инструментть вайгяленц, пильгонза ускозь усксть коряванза дробиень шавома. Кржа кинди сафтовсь  лацонза. Аф стак, аньцек кулелезь-няелезь, эзк тернельхть фкя-фкянь: «Санда морай, Санда морай, сада ваномонза!»
Александра Николаевна нинге одста содась пяк лама сиде мороня. А сяльде сонцьке ушедсь арьсекшнема-сёрматкшнема тяфтамот. Кодама праздник афоль ётафтов Темниковаса, пуроптыенза най эняльтькшнихть Мелёшкинати арьсемс сиде моронят. Мокшавась сёрматкшнесыне синь и мокшекс, и рузкс.
Мзярда Конак велеса пуроптфоль тяфтама жа лемса ансамбль—«Конак»—Александра Николаевна васенцекс тертьфоль тяза морсема. А пингонь ётазь арась теенза вятикс. Мелёшкинать пингста коллективти максфоль «Народнай ансамбль» лемсь. Ансамбльсь шарфтсь мяль эсь лангозонза козя репертуаронц мархта. Эзонза сувафтфоль лама сире пингонь морода. Кочкайсна—Александра Николаевна. Мокшавась, эряви азомс, пяк лац содасы мокшень фольклорть. Сонь вдь кштиманзовок эсь лацоннет, тяфта нинге кунара кштишендсть Конак велень аватне. «Вов сиредян, стирькай, лоткан сцена лангс лисендемда, и тя кштимась юмай»,—пичедезь мярьгондсь Александра Николаевна Елена стиренцты. Сяс ушедсь саворне тонафнемонза, штоба улель тевонь поладыец. Аф фкя киза тядят-стирьхть марса кштишендсть-морсесть «Конак» коллективса. Няфнезь пряснон пяк лама оцю иласа—«Шумбрат, Финно-угрия!» фестивальса, Мокшэрзянь народть Российскяй государствань нароттнень мархта ладязь эрямаснон 1000 кизонь топодеманцты лемтьф праздникса, ламоксть улендсть «Шумбрат, Мордовия!» Народнай творчествань республиканскяй фестивальса. Концерт мархта якасть Сарову и лия ошненди.
Тяни героиняньке пенсияса. Лафча шумбрашиц аф максси ингольцекс сидеста лисендемс сценать лангс, но морамда сон аф лоткси. Пуроптсыне мокшава ялганзон перьфканза и тага кайгозевихть Конакть вельхксса седиень токай моросна. Нльне рузонь моротненьге мокшекс ётафнесазь.
Аф ваномок эряфкшу кизонзон лангс, Александра Николаевна аф кельгсы стак ащекшнеманц. Тяфтама ни сон ломанць, стака тевда ёфси аф пели. Эсь трудовой кинц, кепотьксонди, мокшавась ушеткшнезе Темниковса Мокша ляйть туркс седть строямста. Колма кизот покотьфоль тя объектса. Сяльде трудендакшнесь велень колхозса дояркакс. Тяни сонь лама кудъётконь тевдонза-заботадонза. Кирди жуватат, пересонза касфни эрь кодама перень сёрот. Касфтфонц эзда аф фкя лацонь ярхцамбяльхть аноклакшни тялотивок. Ингольцекс, шуфтонь парняса, салыяфни куярхт, лопафни марьхть.
Тячиень героиняньке павазу тядя, щава, баба и сире баба. Сонь колма идьтонза, кафкса уноктонза, идень кафта уноктонза. Аф ваномок сянь лангс, што эряйхть синь лия ошса, ширезонза сашендыхть сидеста. Нльне шабраванза кайсихть лангозонза сельме, конашкава, кле, кельктядязь, кудцень ингольде машинатне афи машнихть. Семьянц пуромомац Александра Николаевнанди оцю праздник. Эста сонь аш покоец, аньцек мезень танцтиня аф стряпшай. Сембонди пяк кельговихть модамарень пяряканза, конатнень Конак велеса лемнесазь курникокс. А мзярда сембе марса озсихть шра ваксс, седикс-ваймокс корхнематненьшовор ушеткшнихть мокшень мора, а кой-коста и сиде моронят.
О.ЕВДОКИМОВА.