Удалаза кице, Артём Алексеевич!

Мордовия Республикань Оцюнякс кочкаф А.А.Здунов
Республикасонк кочкама сашендсь сембе избирательхнень 65,13 процентсна. Эздост 66 процентсь максозь вайгяльснон «Единая Россия» партиять инкса.
Мордовия Республикань Оцюнянь вастти кочкамста кандидаттнень ёткста сяськсь Артём Здунов. Сонь инксонза максозь вайгяльснон кочкайхнень 78,26 процентсна.
И вов кочкамада ингольдень агитациясь лядсь фталу. Састь кочкамань шитне. Синь кошардомазь эздонк кажнайть сяда оржаста варжакстомс перьфпяльти, эрь шинь эряфть, странасонк мольфтеви политическяй и экономическяй политикать лангс, нинге весть семботь ункстамс, максомс эрявикс оценка и примамс решения. Шарьхкотьф, корхтамась мольфтеви васендакиге Российскяй Федерациянь Государственнай Думав депутатонь кочкаматнень колга. Тяда башка, миньцонк республикаса тяка пингть кочкавсть Мордовия Республикань Оцюня, Мордовия Республикань сисемце созывонь Государственнай Собранияв, а стане муниципальнай образованиянь представительнай оргаттненди депутатт. Лиякс мярьгомс, савсь кирдемс аф тёждя экзамен сембе избирательхненди. Вдь ня кочкаматнень эзда ламода ащи сяда товолдонь эряфоньке, вандыень шиньке. Аф стак кочкамань шитнень ламоц избирательхне оцю ответственностень марязь маладсть эсь гражданскяй долгснон пяшкодеманцты, тага няфтезь эсь смюзьшиснон. Предварительнай даннайхнень коряс, республикасонк кочкаматнень эса примасть участия избирательхнень 65,13 процентсна.
…571№ избирательнай участкав, кона Саранск ошень 7№ лицейса, сайхть и сайхть ломатть. Торжественнайста и мазыста наряжафт кабинеттне. Шратнень ваксса ащихть избирательнай комиссиянь члеттне. Фкя-фкянь мельге малаткшнихть теест избирательхне. Сембе синь маскасот и перчаткасот, тяда башка, кажнайти макссеви ручка. Получамок паспортонь няфтемда меле бюллететть, ломаттне ётнихть  тайнайста вайгялень максома кабинатненди. Тяса ваномок-тиемок бюллететтнень, нолясазь синь электроннай техникать пачк, конат ащихть ряцок.
Вов пяшкодезе эсь гражданскяй долгонц Раиса Ивановна Абросимова.
—Кие республикань Оцюнянь вастти кандидаттнень эзда сяда мялезт?—кизефнесаськ сонь.
—Артём Здунов. Ломанць сон минцень, од, эрьгав, сембе ширде лац аноклаф. Ули кода лангозонза надиямс,—азозе сон.—Политическяй партиятнень ёткста Абросимовась кирдезе «Единай Россиять» ширенц.
Вайгялень максомда меле корхнетяма нинге фкя избиратель мархта.
—Кочкаматне—тя минь конституционнай праваньке, минь общественнай долгоньке,—мярьгсь пенсионерсь, трудонь ветеранць Н.П.Трушин.
—Кда аф секрет, кинь инкса максыть   вайгяльцень?—макссетяма кизефкс теенза.
—Мезеньге секрет тяса аш. Вайгялезень максыне Россиять и Мордовиять сай пингснон инкса, ломаттнень эряфснон сяда цебярьгофтоманкса,—отвечась сон.
Киньге ширде кодамовок люпштама избирательнай участкаса ашезь няев. Сембось мольсь сетьмоста, стане, кода и эряви. Сельмос повсь васендакиге избирательхнень активнайшисна.
Активнайста мольфтевсь вайгялень максомань Государственнай рузонь драматическяй театраса, коса панчфоль 547№ избирательнай участкась. Тяса 19 сентябрьста пяшкодезе эсь гражданскяй долгонц Мордовия Республикань Оцюнять аф лама пингс тевонзон тиендисна А.А.Здунов.
—Настроениясь тячи рабочай, ну и, конешна, праздничнай,—мярьгсь сон тяса корхтамста,—минь кочксетяма сай вете кизос касоманди-виияманди ки. Лувондса, што эрь ломанть улихть праванза и обязанностенза, а тя случайста минь тевс нолясаськ эсь праваньконь. Вайгяльсь эряви максомс, сяс мес Россиянь эрь гражданинць—тя оцю процессть участникоц.
Республикать вятиец стане жа азсь лямбе валхт избирательнай комиссиятнень эса покодихненди.
* * *
Саранск ошень округонь 599№ избирательнай участкась, кона панчфоль Ремзавод посёлкань  школаса, кода и кочкамань сембе  васттне, панжезень кенкшензон 17 сентябрьста 8 частста шобдава. Пцтай эстокиге тяза эрьгавста ушедсть сашендома тя аймаконь эряйхне. Сембоц участкать мельге кемокстаф 2200-та лама ломань. Нят и тястонь эряйхть, и сят, кит максозь вайгяльснон открепительнай удостоверения мархта. Кит сувсесть избирательнай участкав лавкав молемстост, ульцяв якама-шяяма лисемстост, а кит макссть тя тевонди башка пинге—анцесть пря покодема вастстост. Ёткшиста вайгялень максыда цють сяда кржаль, а кочкамань мекольце шиня, 19 сентябрьста, сайда сяда ламоль. Сашендсть и тифтень, и семьянек, ялгань келеса. Аф кржаль од ломаньда. Кепотьксонди, Сураевонь-Королёвонь лемса ульцянь эряйсь Ольга Волкова васенцеда примась участия кочкаматнень эса и тянкса пяк пара мялезонза. «Прязень маряса оцю ломанькс, касфнесы мялезень, мес сай пингонь эряфоньконь кочкамаса ули моньге кядезе»,—азозе стирсь.
А вов Ремзаводонь эряфкшу авать И.В.Сусловать эряфса тя ни аф васенце кочкаматне. Мзярс, кле, мяляфтса прязень сашендан вайгялень максома, тя эрь ломанть гражданинонь долгоц. «Кода фалу, тячивок сань избирательнай участкав оцю надияма мархта,—азозе Ирина Васильевна.—Учендан и надиян аньцек цебярь полафткс лангс».
Кода азозе 599№ избирательнай участкать председателец М.А.Ушакова, кочкаматне синьцост ётафтовсть законц коре, кодамовок коламат ашельхть. Ашезь юкстав эпидемиологическяй безопасностень вешфкснень колгавок—сембе сайхненди       макссевсть маскат, перчаткат, ручкат. Оцю очеретть урнатнень ваксса ашесть пуромкшне. Участкаса кочкаматнень мольфтемаснон мельге ванцть наблюдательхне.

Колма шит мельцек, 17, 18, 19 сентябрьста Лямбирскяй райононь Атемар велень Культурань куду и тястонь школав мольсть и мольсть ломатть. Тяса панчфтольхть кафта 402 и 403№№ избирательнай участкатне. Спискас коре ульсь кафта тёжятть кочкай. Васенце шинякиге эсь вайгяльснон инь достойнай кандидаттнень инкса максозь пцтай тёжянь ломань.
—Избирательнай участкань комиссиятне эсь работаснон ушеткшнезь кафкса частста шобдава и пяксневсть участкатне кафкса частста илять,—азонды Атемар велень администрациянь оцюнясь С.А.Шулепов.—Тяда инголе минь ётафтоме агитационнай оцю работа посёлкань эряйхнень ёткса.
Велень избирательнай участкатнень эса арьсефоль и тифоль сембось, штоба кочкайхнень инголе афольхть стяшенда кодамовок кизефкст. Помещенияв сувамста кажнайть ункснезь температуранц, кажнайти макссесть маска. Пандемиять пингста ня условиятне, вешфксне васенце вастсот.
А тяни малаттама кочкайхненди.
Ольга Фадеева, Атемар велень идень садонь воспитатель.
—Аф васенце кизось ни примсян участия кочкаматнень эса,—корхтай сон.—Содаса, кода минь нажяттяма тя эрявикс и пяк ответственнай тевти, стама и кармай сай пингонь эряфоньке. Мон кунара ни сань мяльс, кинь инкса максса вайгялезень. Ламонь надияфнись  мезевок аф тии, а вов кит кенерсть ни няфтемс пряснон цебярь ширде, кие афкукс арьси и пичеди ломаттнень инкса, сятнень инкса и вайгялезень      максса. Спискаса тяфтамот улихть.
Александр Кошелев, предприниматель.
—Тячи эсь вайгялезень максыне эряфса вандыень полафткснень инкса. Надиян, ся депутатонди кандидаттне, конатнень эстейне кочкайне, валснон кирдьсазь, тисазь семботь, штоба эряфоньке ётнель лац, сембоса улельхть сатфкст, кеняртьфти полафкст. Тейне колмогемонь ветие киза, заняфан велень тевса-заботаса. Мялезе, штоба кочкаф депутаттне сяда товга афолезь юксне велеть, примсельхть стама закотт, конат лездольхть тейнек и работаса, и идень касфтомаса, и ламоса лияса.

17-19 сентябрьста ётафтф кочкаматнень пингста 502№ избирательнай участкась работась Рузаевскяй муниципальнай райононь Мокшень Пишля велеса. Мокшень Пишляда башка, азф участкати сувсихть Булгаки, Тёпловка, Мокшень Полянка велетне.
Участковай кочкамань комиссиять председателенц Татьяна Ивановна Китаевать валонзон коряс, кочкаматне ётафтовсть санитарно-эпидемиологическяй уликс сембе вешфкснень мяльс сявозь.
17 сентябрьста спискатнень коряс 502№ участкаса ульсь 350 ломань. Васенце шиня вайгяльснон максома сашендсь кочкайхнень 41 процентсна, тя марстонь лувксть эзда 149 ломанць, эздост 62-сь тиезь тянь кудса.
Россиянь Государственнай Думань, Мордовия Республикань Государственнай Собраниянь депутаттнень и Мордовия Республикань Оцюнять пингта ингольдень кочкамаснон коряс вайгялень максомась Рузаевскяй районца 502№ избирательнай участкаса сембе колма шитнень ётась организованнайста.
Сонць участкась ульсь Мокшень Пишля велень Культурань кудса, сяс кочкайхненди ульсь кода содафтомс тя велень зрнянь кядь мокшаватнень и стирьхнень творческяй работань выставкаснон мархта.