МИНЬ—МОРДВАТАМА!

Малаткшни населениянь Всероссийскяй переписсь
Аф лама пингта ляткшни Всероссийскяй переписть ушедоманцты. Тя пяк эрявикс и важнай событияти кода марнек странаса, стане и Мордовия Республикасонк мольфтеви оцю и лама ширдень аноклама. «Мокшень правдать» страницанзон лангса тянь колга азондовсь аф кржа. Тячи нинге весть мяленьке шарфтомс лувихнень мяльснон вов мезть лангс. 2002 кизонь переписень даннайхнень коряс, мокшэрзяда Россияса эрясь 843,4 тёжянь. 2010 кизонь переписень даннайхнень коряс—744,2 тёжянь.
Главнай туфталкс лувксонь киремати лувондови ся, што мокшэрзятне пяк ни явонтфт фкя-фкянь эзда странать разнай уженяванза и эряйхть тоса аф пяк ламонь.

Тяда башка, 2010 кизонь переписть итогонзон коряс, лама ломань «Национальность» графать ёфси кадозь шавоста. И ня ломаттнень ёткса аф кржа мокшэрзянь национальностень представительда. Аф кржа и стама мокшэрзяда, конат стаки сёпондсазь-кяшендьсазь афкуксонь национальностьснон. «Национальность» графать алу сёрматфнесть лия национальность.
Кда тяфта карматама тиендема сяда товга, то статистикать коряс, минь лувксоньке сядонга кири. Сяс пяк важна, штоба эрь ломанць шарьхкоделезе, што аш мезенди сёпондомс-кяшендемс эсь национальностцень.
Мезенди тя эряви?
Тя эряви сянкса, штоба лядомс лувксс коре странань инь оцю нациятнень ёткс, штоба ванфтомс и виияфнемс эсь кяленьконь, эсь лацонь культураньконь, традицияньконь.
А кда сёпондомать вельде кирьфтасаськ эсь лувксоньконь, эста, шарьхкотьф, кирьфтавихть образованияти, национальнай вииямань социальнай программатненди ассигнованиятне, аф кармайхть сатнема школьнай учебникне, книгатне, родной кяльса лия литературась. Эвондайхть стакат-сталмот национальнай культурать, национальнай прессать инголе.
Эрь народть, аф ваномок эсь лувксонц лангс, кона историческяй кувака и стака кинь ётамста ванфтозе эсь историянц, ули законнай правац марямс гордость эсь историянц, культуранц, пара коензон-обуцянзон инкса. Тянь правас коре ули кода азомс и мордовскяй народть колга. Сон ётась историческяй аф тёждя ки, аф весть няфнемок героизма и мезьдовок аф пелема Родинать инкса тюремста. Саты азомс, што Великай Отечественнай войнаса мужестванкса и героизманкса казьфоль 110 тёжянь боецоньке и командироньке. Эздост 124-ти максф Советскяй Союзонь Героень лем.
Тейнек, мокшэрзятненди, афкукс ули мезенкса и кинь инкса марямс гордость. Оцю слава народоньконди кандсть патриархсь Никон, историксь Ключевский, скульпторсь Степан Эрьзя, легендарнай летчиксь Михаил Девятаев и ламонцне лиятне.
Минь—мордватама. Тя лемть ала лама веконь кувалмоса содасамазь странаса и марнек мирса. И тейнек аш кода ащемс озадонь седихть народоньконь судьбанц инкса. Эрь ломанти, конань мокшэрзяннет юронза, путома эсь путксоц народонц ванфтоманцты-ламолгофтоманцты. Мяляфтость тянь населениянь Всероссийскяй переписть пингста.
15 октябрьста ушеды Всероссийскяй переписсь. Тернетядязь сембонь тинь аф виздемс, аф сёпондомс эсь национальностентень, и гордостень марязь сёрматфтомс переписень листкяти: мон—мордвин-мокшан, мон—мордвин-эрзян. Тя эряви тейнек, тя эряви минь шабаньконди и уноконьконди. Эрьда араласаськ и ванфтсаськ эсь юроньконь!