ЛЯМБЕ СЕДИ, ПАРА ВАЙМЕ ЁЖКЕРЯЙ

Тячи ёран азондомс лувихненди Ковылкинскяй райононь Ёжка велень колхозникнень—Великай Отечественнай войнань инвалидть Фадей Фадеевич и Вера Лукьяновна Тремаскиттнень семьяса войнада меле шачф-касф цёраснон Акимонь колга.

Одкс пингстонза Аким морсесь гармонияса, весялгофнезень велень эряйхнень. Путнесь пеетьфти сценкат клубса, меле сонцьке тяштсь эздост кафта: «Фана атянь свадьбац» и «Пенгянь лазондыхть». Синь печатлафтольхть «Мокшень правда» газетаса.

1963-1968 кизотнень сай пингонь учителезе тонафнесь университетса, эсь группасонза сембонь коряс сяда лац. Ульсь научно-исследовательскяй асувоц, ламоксть примсесь участия научно-практическяй конференциятнень эса, коса тиендсь доклатт. Тянкса казьфоль лама грамотаса и дипломса.

Маштозь аноклаф дипломнай работанц инкса теенза Н.П.Огарёвонь лемса МГУ-нь филологическяй факультетть деканатоц Научнай советса макссь аспирантурав «Мордовское языкознание» специальностьс коре поступаманди рекомендация.

1968 кизоня, мзярда работась ни завучекс и родной кялень учителькс Морд.-Коломасовскяй  школаса, поступась заочна МНИИЯЛИЭ-в аспирантурав.

Аньцек киза работась лия велеса, а седиец-ваймоц фалу усксь шачема-касома Ёжка велезонза, коса школать сёлгомс—37 киза сон покодсь родной кялень учителькс, завучекс.

Лац мяляфтса монга, кода директорть Ю.А.Кузнецовонь пингста Аким Фадеевич школазонк тердезе содаф писательть, Ёжка велеса шачфть, эсь маластонь раднянц Михаил Лукьянович Сайгинонь (учительть тядянц брадонц). Эста ванондоськ писательть лисьф «Давол» романонц. Аф весть кизефнине книгань сёрмадыть романцта тя или тона пакшть колга. Содайне, што авторсь ётазень войнань толу-качаму китнень и сонць танканц мархта пачкодсь мянь Берлину и кядьса тяштьф валхнень кадозень Рейхстагть стеназонза.

Ниле кизот школать сёлгомда инголе Аким Фадеевич ульсь Ёжкань начальнай школань заведующайкс и учителькс. Ёжкать историяс сувась, кода велень школать мекольце учителец. Школась сёлкфоль 2006 кизоня.

Аким Фадеевичень пяк кельгозь школаса тонафнихне.

Учительсь тонафнихнень мархта  тиендсь родной кялень и литературань пяк цебярь кабинет и велеть историянцты лемтьф музей, коза кочксевсь пяк лама экспонат, скульптура. Тяда башка, Ёжка велень Великай Отечественнай войнань участникнень лемс тифоль цебярь альбом, кона пяк лездсь Аким Фадеевиченди «Мордовия моя! Ежовка—наша малая Родина»  книганц сёрмадомста.

Аким Фадеевич Тремаскин аф аньцек  цебярь воспитатель, а нинге цебярь учитель-методист, кода корхнихть, Шкайть эзда учитель.

Сёрматкшнесь методическяй статьят и методическяй разработкат, конат печатлакшневсть «Мокшень правдаса» и «Мокша» журналса, корязост ётафневсть аф класснай мероприятият: мокшень кялень и литературань недялят, литературнай илятть и инсценировкат, мокшень фольклоронь шит, сценкат, спектакльхть и стак тов.

Районнай учительхнень секционнай  метобъединенияснон эса лувондсь доклатт, тиендсь выступленият педагогическяй конференциятнень эса.

Аким Фадеевич лац содаф и кода велень аф штатнай корреспондент  ковылкинскяй «Голос Примокшанья», «Мокшень правда» газетатнень эса, «Мокша» журналса.

Кода аф азомс и сянь, што сон учениконц Андрей Веряскинонь мархта сёрмадсь и нолдась эсь шачема-касома велеснон колга  «Мордовия моя! Ежовка—наша малая Родина» и «Ежовка—село наше родное» кафта книгат. Книгатнень инкса ярмакнень сембонь максозь велень калмотнень перямс.

Школаса работамста и тячемс сонь фалу кочксесазь велень Советонь депутатокс, кафта созыфт кочксезь Ковылкинскяй райсоветонь депутатокс.

Аким Фадеевич Тремаскин пяк лама цебярь тев тись родной веленцты и велеряензонды депутатокс улемстонза. Сонь лезксонц вельде добувафоль Ёжкань велень Совету транспорт, ётафтф од зданияс медпунктсь, анаф велеряйхненди маршрутнай автобус, оцюнятнень инголе эняльтькшнесь оцю кить строяманкса  и стак тов. Ламоксть лезнесь велеряензонды личнай тевснон эса.

Тянивок примси участия велень мероприятиятнень эса, нинге эрьгав, вестевок аф ащекшни тевфтома кудсовок.

Цебярь тевонзон инкса ламоксть казьфоль Ковылкинскяй райононь администрациянь,  РОНО-нь Почётнай грамотаса, Благодарственнай сёрмаса.

Аким Фадеевич пяк лажнай шачема веленц инкса, кельгсы сонь. Сидеста тянь колга сон сёрматкшни газетав.

«Учителями славится Россия. Ученики приносят славу ей. Не смейте забывать учителей!» Ня валхне азфт сембе учительхнень лемс. А монць эсь эздон азолень ингольдень учителезти вов мезе: эряк ламос шумбрашиса, тяфта жа седи ваксста кельк шачема-касома Ёжка веленьконь! Сюкпря тейть, Учителезе. Юбилейцень мархта!

А.Ф.Тремаскинонди 2 октябрьста топодсь 75 киза. Миньге, редакцияса работайхне, арьсесаськ теенза сембе цебярть!

Василий Лазарев,

журналист, Внутренняй

тевонь министерствать

отставкаса

подполковникоц.