МОКШЕНЬ ГАЗЕТАСТА УШЕТФ КИГЕ

«Мокшень правда» газетаньконди топодсь 100 киза. Ня кизотнень пингста тяса кассь лама пяк цебярь журналистскяй кадрада, конат кадсть эсь мельгаст лямбе пильгокит. Аф кржась синь эздост сяльде тусь оцю литературати, арась содаф писателькс и поэтокс. Тячи аш кода аф лятфтамс асу журналистть и поэтть А.Ф.Ежовонь, конанди ня шитнень топодель 80 киза.

Анатолий Фёдоровичень лемоц лац содаф минь шачема-касома крайсонк. Сонь статьянза, очерконза, юморесканза, рассказонза кельговсть мокшень лувити. А инь цебярь стихонза тонафневихть школаса, печатлакшневсть аф аньцек Мордовияса, но и Москуса, ламоц республикань журналхнень и коллективнай сборникнень эса.

Шачсь А.Ф.Ежов Зубово-Полянскяй райононь Польдяз велеса 1941 кизонь 10 октябрьста. Тяса аделазе школать, тяса тяштезень васенце стихотворениянзон, конатнень эса моразе тядянь-алянь ширеть мазышинц.

«Мокшень правдав» Анатолий Ежов сась 1961 кизоня. Тяза сон сявфоль литсотрудникокс Мордовскяй госуниверситетть аделамда и цебярь стихотворениянь конкурсса сяськомда меле. Тяса ся пингть работасть мокшень писательхне С.Самошкин, П.Левчаев, А.Тяпаев, М.Кяшкин и лиятне. Синь мархтост васьфнесь эрь шиня, кулхцонкшнезень советснон, замечанияснон.

Анатолий Федорович аф весть корхнесь: кле, эста ульсь кинь эзда тонафнемс. Оцюволь сёрмадомань асусна и сяда оттнень: Юрий Кузнецовонь, Павел Вельматовонь, Михаил Ковнинонь, Василий Каргинонь, Григорий Пинясовонь. Сембе пяк кельголеськ якаманьконь командировкас. Сатама командировкаста, блокнотсонк пяшксе тяшнефта. Рабочай шида меле озсетяма башка комнатава и каракшатама пяле вешкас. Сяльде пуроптама марс, лувсаськ фкя-фкянди тяштьфоньконь—мезе шнави, а мезе сялдови. Но тя пяк лезнесь тевти.

Аф стак аф лама пингонь ётазь од журналистть Ежовонь перанц алда кармасть лисендема профессиональнай оцю уровеньца сёрматф статьят, очеркт, лия жанрань публикацият. Курокста тя няйфоль, сявфоль мяльс. 1963 кизоня Анатолий Ежов серьгядеви культурань и бытонь отделонь вятикс Сире Шайгавонь «Трудовая правда» районнай газетав. 1964 кизоня сон арай Краснослободскяй райононь «Знамя труда» газетав редакторонь заместителькс, а тоса—Лямбирень «Призыву» редакторкс. 1971 кизоня А.Ф.Ежов—МАССР-нь Министронь Советть видеса Телевидениять и радиовещаниять коряс комитетса радиовещаниянь главнай редактор, 1973-1988-це кизотнень—Телевидениять и радиовещаниять коряс МАССР-нь государственнай комитетть председателенц васенце заместителец. 1988 кизоня кемокстафоль «Якстерь тяштеня» идень журналти главнай редакторкс, а 1993-1998-це кизотнень сон—Мордовия Республикань печатень и информациянь министр. И коса афоль труденда Анатолий Фёдорович, сембе вастса эсь прянц няфнезе тевонь кельгикс и тевонь лац содайкс, порядочнай и обязательнай ломанькс. Сон кельгозе дисциплинать и сембоса порядкать, седиец фалу панжадоль ломаттненди и шарьхкодезе лиянь сярятьфть, най аноколь лездомс кажнайти.

Эсь литературнай кинц А.Ф.Ежов ушедозе 1960 кизоня. А сембоц сон нолдась 23 книга, стихонь и ёфксонь сборник. Сембе синь—инь ёмла лувихненди. Произведениянза сёрматфт простой кяльса, поэтическяй мазы валса, сяс и курокста мяляфтовихть, токсесазь ёмла лувихнень седиснон, кошярясазь арьсема, пара тевонь тиендема.

А.Ежовонь «Ялганязе варманясь», «Касы веленязе», «Тяштенят—сиянь пяштенят», «Лесной базар», «Мой сад», «Почему пришла весна» и лиятне арасть шра лангонь книгакс школьникненди. Ламоц произведениянза ётафтфт рузонь, чувашскяй, марийскяй и лия кяльс.

Писательсь сембе пинкнень кирдсь кеме соткст республикань газетатнень, журналхнень редакцияснон, радиоть и телевидениять мархта.

Мокшэрзянь литературать виияфтомаса оцю сатфксонкса А.Ф.Ежовонди максфт    МАССР-нь культурань Заслуженнай работниконь и Мордовия Республикань Заслуженнай писателень лепт, сон казьф «Знак Почёта» орденца.

И.ЛУШКИН.