ВАНФНЕСАЗЬ СИРЕ ПИНГОНЬ МОКШЕНЬ МОРОТНЕНЬ

Кода ни пачфнеськ газетаньконь тяда ингольдень номерсонза, 14-17 октябрьста Саранскяйса ётафтовсь «Финно-угорский транзит»  искусствань и народнай творчествань международнай фестивальсь. И.М.Яушевонь лемса музыкальнай театрав гала-концертс пуромкшнесть эрь кодама финно-угорскяй народонь творческяй коллектифт странаньконь ламоц региононзон эзда. Сембонь синь ёткстост пяк лац няевсь Зубово-Полянскяй райононь Мокшень Кужа велеста «Мокшаваня» народнай ансамбльсь. Моросна, щамсна, сцена лангса прянь вятемасна—сембось салась мяль.

«Мокшаваня» коллективсь эвондась 1986 кизоня. Сонь пуроптыец ся пингть Мокшень Кужа велень клубть вятиец  Валентина Дмитриевна Пинясова. Ансамбльти сувась кеветиешка мокшава. Ётксост ульсть учительхть, библиотекарьхть, почтань, велень хозяйствань покодихть и лият. Ансамбльсь курокста арась эсь лацонь визитнай карточкакс аф аньцек велети, но и марнек Зубово-Полянскяй районти. Коллективсь якась концерт мархта велеста-велес, лисендсь райцентрань сценать лангс. Ломаттне пара мяльса кулхцонкшнезь сире пингонь мокшень моротнень, конат лама вастова пцтай юкстафтольхть ни. «Абрамонь Маланясь», «Илькань Ягорась», «Нюрямонь мора», «Илюжень Феданясь», «Гароень Марясь»—ня и ламоц лия моротнень «Мокшаваня» коллективса морсихне кулезь-содазь нинге эсь бабаснон-щаваснон эзда и ванфтозь синь. Эрть эса—ломанень целай эряф. Синь и тонафтыхть, и смузьши максыхть. Улихть коллективть репертуарса и сиде моронят.

Ансамблень мокшаватнень пяк мазыхть щамсна. Синь сатовсть теест тядяснон эзда. Сят сташендозь наряттнень эсь кядьсост. Тя мазышить анокламац—тевсь аф тёждя, аф эрти сафтови, сяс щамснон артисткатне ванфнесазь оцю козяши лаца. А вов мазоптомбяльсна тяниень пингоннет. Бисерста, ожнаста крганятнень-меснень коллективса морсихненди тиендьсыне велень школань тонафтысь Е.А.Елисеева.

2017 кизоста сявомок ансамбльть вятьсы Н.М.Елисеева. Тяда инголе Надежда Михайловна лама киза морсесь коллективса, а тяни арась теенза художественнай руководителькс.

«Мокшаваня» народнай ансамбльсь няфнесы эсь маштомошинц эрь кодама пуромксса. Эрь кизоня улендихть «Шумбрат, Мордовия!» Народнай творчествань республиканскяй фестивальса, «Шумбрат!» национально-фольклорнай праздникса. А мзяра илада ётафневи районца, эсь велесост! Но сембода мяляфтовикс коллективти арась «Шумбрат, Финно-угрия!» финно-угорскяй народонь Международнай васенце фестивальсь, кона ульсь 2007 кизоня республиканьконь столицаса—Саранскяйса. Лия регионцовок улендсь ансамбльсь, кепотьксонди, нилексть якасть Москуву, няфнезь творчестваснон Рязанскяй областьса и лия вастса.

«Мокшаваня» коллективсь пуроптозень эсь культурань, коень-обуцянь ванфни мокшаватнень, конат пяк кельгсазь морамаснон. Морось теест кода лихтибрянь эше ведня. Кда колаф мяльсна—лезды кеподемс сонь, сизефста—ваймафты. Аф ваномок сянь лангс, што эрть ёткстост сонцень работац, семьяц, кудонь, пирьфонь тевонза, морамати пинге мушендыхть фалу. Репетициянза ансамбльть улендихть пцтай эрь шиня. То велень клубу пуромихть, то библиотекав. Виде, лувкссна морсихнень тяни ламода кирсь. Но сят, кит тячивок коллективсот, тиендьсазь тевснон пяк маштозь. Пандемиять сюнеда тяниень стака пингть лангс аф ваномок, макссихть концертт кода эсь велесост и районца, стане и республиканскяй сцена лангсовок.

О.ЕВДОКИМОВА.