КАНЬФКУЖ ВЕЛЕСЬ

Каньфкуж велеть лемоц эвондась «каньф» и «кужа» валхнень эзда, конат рузкс ётафневихть: «конопляная поляна». Тя лемсь путфоль сяс, мес тяса инголи пяк  шачель-касоль ни каньфсь. Мянь тячиень шис перева касы стама каньф, конань   потмоса аф        няеви сери ломанцьке. Сяс и путозь тяфта лемонц.

Васендакиге велеть вастса эрясь козя татар. Ульсть сонь солдатонза, войскац. Ламоль сонь козяшидонза, модац. Вирдензовок ламоль. Витцекшнесь   сон каньфке. Лемоц ульсь Каньшир князь. Сядынгольдень народсь ульсь бойка. Сяс сон кирдсь войска, а  сяльде тись-марась эстеенза и крепость, штоба кивок афолезе токсе.     Тя Каньшир князсь кармась эстеенза салсема ломатть, коста-коста нльне башка велет. Ся велетнень и ломаттнень ёткс угадявкшневсть и мокшетка. Тевсь пачкодсь тоза, што сон ёразень эстеенза сявомс мокшень велетнень: Вяльдярьмоть и Синдруть. Эста ни кафта велень мокшетне арьсесть шавомс или панемс Каньшир князть и строямс сонь вастозонза. Синь стане и тисть. Срхкасть Каньшир князть лангс. Но молемс видеста ашель ки: сембе вастова ульсть болотат и туста вирьхть. Фкя пингоня пуромсть Азор велень мокшетне и срхкасть князть лангс панттнень прява, каряснень ланга. Починка велеть пачк мольсть мокшетне. Пачкодсть сонь владениянзон малас, Каньширсь лихтезень войсканзон и лама ломань юмафтсь мокшетнень эзда. Ламоксть тяфта тюрендсть мокшетне князть мархта, но ваныхть—тяфта тевсь аф лиси. Эста арьсесть мирнайста корхтамс князть мархта и самс эряма. Стане и тисть. Васенда тяза строясть ниле кутт Синдру велеста эряйхне и кота кутт Вяльдярьманнетне. Арась сембоц кемонь кутт. Ламос тя кемонь кудонь мокшетне тюрсть Каньшир татаронь князть мархта. Но мокшетнень лувкссна кизоста кизос кассь и панезь татаронь князть. Кармасть тяса эряма-ащема, а велеть лемонц кати-коста сявозь:           или «каньф» валть эзда, кона тяса пяк шачи, или татарть лемонц эзда—Каньшир князь.

Сявф «Народть

мяляфтомац пефтома» книгаста.