Поиск по сайту: 
 

Архив
 июль 
 2022 
пн вт ср чт пт сб вс
    123
45678910
11121314151617
18192021222324
25262728293031

 
 

 

Наши мокшанские сыновья и дочери

АШ АВАНЬ СТАМА КЯДЬТЕВ, КОНАНЬ СОН АФОЛЕЗЕ МАШТА

Авань кядьтефнень ёткс сувси пяк ламось: сюреса, ёмла ожнаса сёрмадомась, кодамась, лентаста, лама  мезьста лияста мазы паршиень и поделкань тиемась. И арась  тонатфокс, што тя или тона мастерицась сяда прафты и шарфты башка мяль тя или тона кядьтевти. Кда ни  моразь-морайхть кядьсонза вндернятне, эста сон сяда оцю сатфкст сатни кодамаса, кда сяда лац сидестонь и эрязстонь аськолкскат тиенди салмокссь, эста стамати или сюреса, ёмла ожнаса сёрмадомати. Кинди тя арси кельгома тевкс, кинди—прянь тряма вастокс, лиятненди тянь вельде ули кода кеняртьфтемс маластонь ломаньцнон или ялгаснон, каземок тя или тона праздникста эсь кядьса тиф мазыши: пряруця, ёмла ожнаста тиф поделка или нинге мезевок.

 

Но улихть ломатть, конат фкя пингть пяк лац маштсазь семботь: кодайхть кячкаскаса и вндерняса, спицаса мезе аньцек аф стайхть, сёрмадыхть сюреса—гладьса, крёскаса, а стане жа лентаса, ёмла ожнаняса, тиендихть мялень салай мазы паннот.

 

Тяфтапнень ёткс сувси и Тамара Николаевна Савельева—ломанць, кона марнек эряфонц лемдезе авань кядьтефненди. Ламотнень эзда савсь кулендемс, што сонь шачемстонза Шкайсь касомти палазе и бславазе кельгома тевонзон тиендема.

 

Нинге шабакс Тамара Николаевна башка мяль шарфнесь эсь кядьса тиф мазышити: сюреса сёрмадомати, кодамати, щамонь стамати. И мзярда сась пинге кочкамс профессия, кочказе модельероннеть.

 

Шумордамок Кировскяй технологическяй техникумть конструктор-модельер специальностть коряс, Тамара Николаевна ламос работась Бытонь кудса экспериментальнай цехса, коса заняфоль щамонь эскиснень тиендемаснон мархта. А ётка пингонц лемнезе стамати, сюреса сёрмадомати, кодамати… И эсь кядьса тиф эрь паршиец лисендсь аф ингольденнеть лаца, лия, сяс мес мастерицась путнезе эзонза седиень псинц, ваймонь лямбонц.

 

Т.Н.Савельева—Рузаевскяй райононь Мокшень Пишля велень рьвяня. Мокшень тя велеса шачсь-кассь мирдец Иван Фёдорович. Савельефне эрясть Саранскяйса, тяни кафцьке пенсиясот, сяс пцтай фалу эряйхть велеса. Путнихть перень сёрот, якайхть садть  мельге. Да кали кржа тев велеса?

 

Тяни Т.Н.Савельева, кода ни азфоль, пенсияса, но ваймамакс тянь лемдемс аш кода. Меколанкт, самай мекольдень кизотнень сон шарфни сядовок оцю мяль авань кельгома кядьтефненди. И мзярдовок аф атказай, кда лезксонкса пшкятькшнихть од ломаттне. Сембонь, кинь мяльсна, Тамара Николаевна тонафтсыне салмоксть и сюреть мархта работама.

 

Сонць мастерицась мезе аньцек аф тиенди. Кодай кячкаскаса, вндерняса, стай мезе мяльце—салмоксонь тодуняста сявомок котфонь пакшста одеялатненди и щапненди—тяконь лувксса и сценать лангс лисендеманнетненди—сценическяй костюпненди молемс, сёрмады ёмла ожнаняса, сюреса. Мокшень Пишля велеса кудонц перьф садське вайси эсь кядьса тиф мазышить потмос, кона лиссь Тамара Николаевнань маштыень кядензон алда.

 

Кода пара вайме ломань, сембе эсь работанзон мастерицась казендьсыне раднянзонды и ялганзонды. Кемоньшка кизода инголе Тамара Николаевна тись баяронь афкуксонь казне Мокшень Пишля велень клубти—мокшень щамса мазы няка. Някась ашезень када озадонь седихть ащема клубса работайхнень, тоза сашендыхнень, сяс сафоль мяльс ладямс Тамара Николаевна Савельевать мархта сяда кеме соткст и тердемс сонь клубу мастер-классонь няфнема. Ашезь атказа мастерицась, сась оцю мяльса. И вов тяфта клубть эвондась сонцень коллекцияц—15 няка-мокшава, конатнень эзда эрсь няфнесы Мокшень Пишлянь «Лихтибряня» самодеятельнай коллективть тя или тона участницанц.

 

Сяда тов ульсть мастер-класст сюреса сёрмадомать, котф пакшкятнень эзда сташендомать, кодамать коряс. И эрь мезне Тамара Николаевна сашендсь аф шавонь кятть, а казненди каннесь салмоксонь тодунят, вельхтердат, паннот, кодаф паршихть и лама мезе лия.

 

Т.Н.Савельева азонды оцю спасиба мирденцты Иван Фёдоровиченди, кона кудъётконь ламоц тефнень сявондьсыне эсь лангозонза, а рьванцты максси пинге авань кядьтевонь тиемс.

 

Стирьсна, Татьяна Ивановна и Анна Ивановна, эряйхть аф мала вастса, фкясь—Москуса, а омбоцесь—мянь ичкоздень Ирландияса. Синь фалу кирнесазь тядяснон ширенц, кеняртькшнихть сонь казнензонды, вдь  Тамара Николаевна путнесыне эзост ваймонц.

 

Савельефнень кудса бта музейса. Тяфта корхнихть сят, кит сашендыхть Тамара Николаевнань и Иван Фёдоровичень ширес Мокшень Пишляса. Тяса-тоса сюреса сёрматф картинат, салфеткат, тодулангакст, кодаф налхкшт, поделкат…

 

Аф весть тянь семботь Мокшень Пишлянь эряйхне няендезь выставкаса велень клубса. Тамара Николаевнань ламоц работанза ламоксть пялькстсть Рузаевскяй муниципальнай районть инкса «Шумбрат, Мордовия!» Народнай творчествань республиканскяй фестивальса-конкурсса.

 

Сонць Тамара Николаевна пяк скромнай, аф кельгсы эсь колганза азондоманц, фотоаппаратть инголе ащекшнеманц. Но тя ломанть колга «корхтайхть» маштыень кядьса тиф паршиенза, а эздост пяк и пяк лама.

 

 

Т.Альшина.

 

 


25.11.2021 №46
 
 
 

 
НОВОСТИ
 

МОРДОВИЯСА ЛОТКАФТФ МАСКАНЬ КАННЕМАНЬ РЕЖИМСЬ

09.06.2022  № 22
 

НАЦПРОЕКТТНЕНЬ—ЭРЯФС!

Мордовиянь Правительствась сяда тов мольфтьсы работать национальнай проекттнень эряфс ётафтоманкса, конатненди ки макссь странань Президентсь Владимир Путин. Республикань Оцюнять ширеса совещанияса корхтафоль основной федеральнай и республиканскяй программатнень эряфс ётафтомаснон колга. Мольфтеви работать квалма азондсть вице-премьерсь Игорь Чадов, МР-нь строительствань и архитектурань министрсь Алексей Гришакин, МР-нь транспортть и дорожнай хозяйствать коряс Госкомитетть председателец Валерий Кандрин, МР-нь велень хозяйствань и продовольствиянь министрсь Александр Кечайкин, МР-нь вирень, охотничьяй хозяйствань и природопользованиянь министрсь Алексей Ларькин.

 

Мордовиянь Оцюнясь путсь задача кирдемс кеме контроль ала строямань графикнень пяшкотькшнемаснон. Васендакиге корхтамась мольфтевсь социальнай инфраструктурань объекттнень колга. Тяфта, ванфтольхть кизефксне, конат сотфт Саранскяйса Кировонь ульцяса 250 вастонди идень садть и Тавлинскяй набережнайса 1450 вастонди школать строямаснон шумордамасна.

 

09.06.2022  № 22
 

ЁТАФТОВСЬ АНТИКРИЗИСНАЙ ШТАБТЬ ЗАСЕДАНИЯЦ

2 июньцта Мордовияса ётафтовсь экономикать ширенц кирдеманц и кемошинц ванфтоманц коряс антикризиснай штабть заседанияц, коса ванондовсть республикаса уликс тефне. Азфоль, што Россиянь Правительствась сяда тов мольфти работа санкциятнень эзда экономикать араламанц коряс законодательнай базань тиеманкса. Региоттнень ширень кирдемасна и синь финансовай кемошиснон кемокстамасна—главнай направлениятнень эзда фкясь. Путф подпись РФ-нь Правительствать постановлениянц алу, кона максси возможность кирьфнемс пандоматнень бюджетнай кредиттнень коряс, конат сявфт дефицитть пяшкодеманкса.

 

Майста нолдаф тевс важнай продукциянь импортёрхнень специальнай льготнай кредитованиянь программасна. Тянкса федеральнай бюджетста нолдаф 37 миллиардта лама цалковай. Тяфтама ширень кирдемать сюнеда бизнести ули кода меки  ладямс товаронь рамсемать, конат мзярс аф нолявихть Россиять территорияса, и сяда тов мольфтемс сембе пингонь работать.
 

09.06.2022  № 22
 
 

Одкстоптови общественнай транспортсь

28 майста Саранскяйса Советскяй площадьса Мордовиянь Оцюнясь Артём Здунов ванозень пассажирскяй од автобуснень, конат работайхть газса. Мордовияти тя общественнай од видонь транспорт, кона арьсекшневи нолдамс тевс республикань транспортнай предприятиятнень подвижнай составснон одкстоптоманкса.

Автобусонь ноляйхне няфтезь средняй и оцю классонь техникать. Артём Здунов ванозень автобуснень эса тяниень пингонь салонть и водителень кабинаса оборудованиять.

«Газса работай техникась сяда ванфтсы экологиять и аф веши оцю карьхцьт. Тяфтама транспортть эвондамац максы инфраструктурати касома-виияма—ков сяда лама тяфтама видонь транспортта, тов сяда лама кармай заправочнай станцияда. Тянь мельге сай пингсь»,—китькстазе Мордовиянь Оцюнясь.

Сембе автобусне стане жа тифт усксемс физическяй ширде ограниченнай возможность мархта ломаттнень. Тяниень пингть Саранск ошса ули автомобильнай газонаполнительнай компрессорнай фкя станция.

02.06.2022  № 21
 

Ревакцинация COVID-ть эзда эряви ётамс сембонди

Мордовиянь Оцюнять Артём Здуновонь председательстванц ала 27 майста ётафтовсь Мордовияса коронавируснай инфекциять инголдаманц и келемоманцты кить персеманц коряс оперативнай штабть заседанияц.

Отмечафоль, регионца ванфтови ковидса одс сярядихнень лувксснон киремац—ётай недялять тя ульсь 30 ломань шити.

«Эряви сяда тов мольфтемс ломаттнень вакцинацияснон и ревакцинацияснон коряс работать. Тянь мельге ванома кода муниципальнай образованиянь оцюнятненди, стане и предприятиянь и бизнес-структурань руководительхненди. Тяниень пингть ётафтовихть ЕГЭ-тне, сяс инфекцияда инголдамань мератненди эряви шарфнемс башка мяль»,—мярьгсь региононь руководительсь.

МР-нь Правительствать Председателенц заместителец Галина Лотванова азозе, што республикань медицинскяй учреждениянь стационархненди тона недялять эрь шиня пачфневсь 20 малава ломань. Сёлкф нинге 50 ковиднай койка-вастсь, стационарса пчкси 203 ломань, конатнень эзда пялесна—60+ кизосот.

02.06.2022  № 21
 

Экономикать виияфтоманцты—башка мяль

Мордовиянь Оцюнясь Артём Здунов 27 майста ётафтозе республикань экономикать ширень кирдеманц и кемошинц ванфтоманц коряс антикризиснай штабть заседаниянц.
Региононь руководительсь мярьгсь, што Россиянь Правительствась сяда тов примси решеният, конат эрявкснихть тячиень аф тёждя пингть экономикать работанц лац ладяманцты.
 
«Васенце очередень тевонь мольфтемань федеральнай планти сувафтф нинге 23 кизефкс. Фалу эвондакшнихть од механизмат, од возможностть. Тейнек эряви синь сяда лац нолямс тевс,—мярьгсь Артём Здунов.—Кепотьксонди, Россиянь Правительствась дополнительнайста нолдай 3 миллиартт цалковай региоттнень эса спортивнай инфраструктурать виияфтоманкса. Эряви кенеремс тиемс заявка ня программатненди и получамс финансирования».

Тяфта жа арьсекшневихть отечественнай программнай обеспечениянь ширень кирдемань од механизмат. Республикань цифровой виияфтомань министерствати и региональнай IT-компаниятненди мярькф активнайста примсемс участия ня процесснень эса.

02.06.2022  № 21
 
 

Артём Здунов встретился с многодетными семьями

Глава Мордовии Артём Здунов провел встречу с многодетными семьями республики – её приурочили к Международному дню защиты детей.

Встреча состоялась в Доме Республики в теплой, почти семейной обстановке, за чашкой чая. В ней участвовали вице-премьер Галина Лотванова и министр социальной защиты, труда и занятости населения РМ Игорь Князьков.

«Я хочу от всей души поблагодарить всех многодетных родителей за ваш нелегкий труд, достойный глубокого уважения и общественного признания, - сказал Артём Здунов. – Вы взяли на себя большую ответственность. Понимаю, сколько дел в большой семье, какая у вас загруженность, но прошу вас, чтобы за этими делами вы не забывали разговаривать со своими детьми. Обсуждайте с ними, что происходит в мире, что было много лет назад. Нам важно, чтобы дети выросли настоящими людьми, чтобы любили свою семью и свою Родину. Это наша с вами общая задача. Вы выполнили и перевыполнили свою демографическую программу, спасибо вам за это, теперь дело за нами».

В Мордовии около 8 тысяч многодетных семей, в которых воспитываются более 25 тысяч детей.

25 мая Президент России Владимир Путин на заседании президиума Государственного Совета, посвящённого вопросам социальной поддержки, подчеркнул, что многодетная семья должна быть ценностным ориентиром для всего общества и поддерживаться государством. Президентом поставлена задача сделать всю систему поддержки семьи целостной, последовательной, понятной и эффективной.
02.06.2022
 

 

 

Яндекс.Метрика Яндекс цитирования Rambler's Top100
Учредительхие:
Главнай редакторсь: И. С. Лушкин