НАРОДОНЬ ЭРЯФТЬ МОРАЕЦ

НАРОДОНЬ ЭРЯФТЬ МОРАЕЦ
А.М.Кудашкин М.И.Безбородовонди лемтьф «Портрет» стихотворениясонза сёрмадсь:
Ваны лангозон
Стенаста портретсь.
Мокшетнень эзда
Васенце поэтсь.
Кеме вайгяленц
Ламос аф юкстамс,
Книганц морафтомс
Инголен путан.
Морай моронзон
Миньцонк сиресь, одсь,
Кельгсы, морафтсы,
Шнакшнесы народсь.
Андрей Матвеевич Михаил Ильичень лувондсы эстеенза учителькс. Кой-кона стихонзон аф аньцек лувондозень, но и тонафнезень наизусть. Синь кепсесть мяль, макссесть пацят, вийхть тяштемань тевса. Михаил Ильичень произведениянзон вельде кассь лама содаф поэт. А.М.Кудашкинда башка М.И.Безбородовонь лувондозь эстеест учителькс А.С.Малькин, М.А.Бебан, М.Г.Имяреков, И.Н.Кудашкин, С.В.Кинякин, ламотне лиятне. Синь лемдсть мокшень васенце поэтти стихт, сёрмадсть эряфонц и творчестванц колга.
Содаф учёнайсь, литературоведсь М.Г.Имяреков М.И.Безбородовонди лемдсь аф фкя работа. «Велесь лятфнесы эсь ломаненц», «Фольклоронь традициятне М.Безбородовонь творчестваса», «Афкуксонь поэтсь—народнай»—тяфтама лем ала лисендсть материалонза «Мокшень правдаса». А «Улендсь шобда сире велесь» лем ала мекольце очеркоц лиссь газетаса 2007 кизонь 11 январьста и аноклафоль сон содаф земляконц 100 кизонь юбилеенцты.
—Лац содайне М.И.Безбородовонь произведениянзон эса морави         васттнень, вирьхнень, лугатнень, Сире Пиченьгужть перьфке козя и мазы перьфпяльть,—сёрмады Михаил Герасимович.—Поэтть веленц эзда ниле вайгяльбень вастса ащи монь Лепченка велезе. Ня кафта велетне сотфт фкя-фкянь мархта оцю вирьса, конанди мярьгихть Карпунь шяй. Велетнень крайге шуди Мокша ляйсь.
Гордостень марязь азса,  монга улень ня васттнень эса. Конашкава синь мазыхть, кеподихть мяль. Афкуксонь ёфксонь, поэтонь уженя. Ламоль тяса стихонь сёрмадыда, моронь латцида. Аф сембе синь арасть содафокс мокшэрзянь крайса. Но мезе кадсь М.И.Безбородов, кона сембоц эрясь 28 киза, ся мзярдовок аф юкстави, аф нардави мокшэрзянь литератураста. И мзяра нинге сёрмадоль, кда афоль ту ёфси одняста лия эряфс.
Васенцеда Сире Пиченьгужса, Лепченкаса, Мокшень Мазканяса улень 1985 кизонь июль ковста. Улеме М.Г.Имярековонь мархта фольклорнай практикаса. Михаил Герасимовичень пяк мялецоль няфтемс тейнек, студенттненди, эсь шачема-касома уженянц, Ельниковскяй районть. Лепченкаса шачсь-кассь сонць, Сире Пиченьгужса—М.И.Безбородов, Мокшень Мазканяса—А.М.Кудашкин, И.Н.Кудашкин. Лоткама вастокс тейнек ульсь Сире Пиченьгужсь.
Нинге Саранскяйста Ельникав ардомстонк автобусса васьфтеме эряфкшу мокшава. Содазе Имярековонь.
—Тон аф Герасимонь цёрацат?—кизефтезе преподавателеньконь.
—Герасимонь,—отвечась тона.—Лепченканнят, што ли?
—Аф Лепченкань, Сире Пиченьгуженнян.
—А минь велезонт арттама фольклорнай практикас. Мялезе студентоненди няфтемс Сире Пиченьгужть, Безбородовонь калмалангонц, васьфтемс сонь велеряензон, одкс пингонь ялганзон мархта.
—Мзяра ни киза кулоф Офтонь Миша, а тянемс мяляфтсазь. То ученикт сайхть калмонянц лангс, то студентт, няк, ускат.
—А тон мяляфтсак сонь?
—Кинь? Мишань? Кода ина. Марса вачашить и нужатнень сяськондеськ, вень ульцяв якаме.  Кода эряме эста: ашель мезьда ярхцамс, ашель мезе лангозонк щамс.
—Да нинге, корхтайхть, кулакне кедьстост лисендсть, велеряйхнень эса обжасть.
—Лисендсть ни… Ашезь сода коза пряснон кяшемс. Вихца колхозу сувафнезь, сявондезь паршиняснон. Ульсть лангозост мутендайхть, сельмонь каяйхть. А кинь мялезонза тя туй. Офтонь Мишавок сёрмадсь колгаст. Кяж кирдсть лангозонза, но, штоба обжалезь. Мон тянь квалма вестевок ашень куленде. Фалу марсолеме. Кда мезевок улель, кулеволь-маряволь.
—А мес ни ашесть ванфта ялгантень? Тяшкава рана кулось.
—Ашезь ванфтов. Туберкулёзсь эзонза педсь. И аделазе. Архтока, 28 кизоса тусь равжа модати.
Ашеме фатя, кода пчкодеме Ельникав.
—А Сире Пиченьгужу мезьса мольхтяда?—кизефтезе мокшавась.
—Васьфтемонк сайхть. Аф ли грузовой машина надияфтсть инксонк кучемс.
—Моньге ни сявомасть мархтонт. Мезьса пачкодян вели?
Авась тердемазь ширезонза. И якаме. Мон аф мяляфтса ни тяни тя ломанть лемонц. Но Михаил Герасимович сёрматкшнезень М.И.Безбородонь сембе ялганзон лемснон. Нят П.Ф.Кирдяшкин, А.П.Ахтиманов, А.В.Вельмискина, ламотне лиятне. Миньге улеме лама велеряень ширеса. Сембе лятфнезь Михаил Ильичень лямбе валса. Ломанць пяк цебярель, лезнесь велеряензонды, кирнезе обжафнень ширеснон, но эсь пряц ашезь ванфтов. Сяс и поэтонь тяштецка мадсь пяк рана.
Ашеме кенере пачкодемс Сире Пиченьгужи, Михаил Герасимович сявомазь поэтть калмонц лангс. Тясовок ульсь Безбородов ушедыкс. Синцень велеса калмосна ашельхть. Кулыхнень ускселезь Сире Девцяи. Михаил Ильич шарьхкотькшнезе, што теенза  лядсь аф лама. Раднянзонды указовась, штоба калмалезь эсь велезост пиченалть трвас, губорть пряс. Тя пиче вирть озафнезе сонць Михаил Ильич ялганзон мархта.
Эняльдеманц пяшкодезь. Но ламоц велеряйхне кода калмосезь кулыхнень Сире Девцяи, стане и калмосесазь. Лама пинге поэтть калмоняц губорть пряса ащесь ськамонза. Ланганза якасть тракст,  лия жуватат. Тоса велеряйхне ушедсть калмосема Сире Пиченьгужи.
Минь улемстонк велень калмалангсь перяфоль. Но колазе мяленьконь ся, што М.И.Безбородовонь калмонянц мельге кивок ашезь вана. Сон ваяфоль палакс, сор тише потмос. Кшнинь памятниконясь шямонюволь, наксадоль. Мордовия Республикань Писателень союзть эзда аф оцю плитанясь ваяфоль модати. Минь урядаськ, петеськ калмонц, а меле М.Г.Имяреков ушедсь азондома кельгома мокшень поэтонц колга. Ся пингста ётась лама киза. Мзярда шисоль Михаил Ильич, афкукс улендсь шобда Сире велесь. Да эстонь кизотнень тяфта эрясть сембе мокшень велетне.
Улендсь шобда Сире велесь
Сире пинкнень, кода весь.
Нужась якась велеть келес,
Кяжи вармакс морась-кштись.
Тяфта сёрмадсь поэтсь ётай веконь колмогемонце кизотнень. Тяни, конешна, эряфсь полафтсь. Велеське аф шобда, куттневок оцюфт, валтт. Аньцек эряйхть эсост аш.
М.И.Безбородовонь содаф земляконза М.Г.Имяреков, И.Н.Кудашкин фалу пеняцякшнесть, мес Ельниковскяй районца кржа шарфнихть мяльда поэтть творчестванц лангс.
—Сон вдь сувси мокшэрзянь поэзиянь ушедыхнень ёткс,—корхнесь и тяшнесь М.Г.Имяреков.—Сонь поэзиянц вельде кассть А.С.Малькин, И.М.Девин, А.М.Кудашкин и лиятне. Малькинонь лемс эрь кизоня ётафневихть лувомат, оцю литературнай илат. А Безбородовонь афи лятфнесазь.
Мекольдень кизотнень ётафневихть илат школатнень, библиотекатнень эса и М.И.Безбородовонь лемс. Сонь поэзиянцты кельгомась кизоста кизос аньцек касонды. Пцтай эрь мокшень ломанти содаф «Вирь» стихотворенияц:
Кизонда, вирняй,
Пиже лопаняй,
Пси мани шиня
Шида кяшиняй.
Яксян потмоват,
Шуфттнень ёткова.
А пингонь-пингонь,
Ляйге, лоткова…
Тя стихотворениять тонафнеськ школаса наизусть. Н.В.Кошелевась сёрмадсь тя стихотворениять лангс музыка, тиевсь морокс. Тя мороть морсесы Мордовия Республикань Заслуженнай артисткась Инна Учватова. Соньфтомонза аф ётни фкявок концерт, ила. Мяляфтса, мзярда шисоль М.Г.Имяреков, тя мороть инкса учёнайсь якась и концертс. И эрь концертта меле ашезь мушенда эстеенза васта. И шнась, и азондсь содафонзонды Михаил Ильичень колга.
М.И.Безбородов кенерсь нолдамс кафта аф оцю книганят: «Паксять морасан», «Матовсь кяжец». Кой-кона стихонза и поэманза лисендсть «Колхозонь эряф» журналса. Лядыкс книганза лисендсть мокшень и рузонь кяльса куломдонза меле. Мордовскяй книжнай издательстваса 1939 и 1941 кизотнень лиссть кафта томса сочинениянза. Тяда меле лисендсть стихонь и поэмань пусмоц, «Видиян, сокаян», «Ульсь пинге…» книганза, конатнень кочказь А.В.Алёшкин, А.П.Тяпаев. Колма книганянза лиссть рузонь кяльса. Поэтть стихонзон, поэманзон ётафтозь рузонь кяльс И.Пиняев, И.Рыжиков, В.Щепотев.
Пяк лама рецензия М.И.Безбородовонь творчестванц колга сёрмадсть содаф учёнайхне, литературнай критикне Ж.А.Конакова, В.В.Горбунов, Н.И.Черапкин, В.М.Макушкин, А.Г.Борисов, И.Д.Воронин и лиятне. Ашель стама киза, штоба афольхть сёрмада колганза содаф поэтоньке, писателеньке, журналистоньке.
Лувити лац содафт А.П.Тяпаевонь, Г.И.Пинясовонь, Ю.Ф.Кузнецовонь, Я.М.Пинясовонь, М.А.Бебанонь, И.Н.Кудашкинонь и лиятнень работасна. Аш стама тонафнемань книга, коза афоль сувафтов М.И.Безбородовонь творчествац, поэзияц. Кода ни азыне, сонь тонафнесазь вузса, педагогическяй колледжса, школаса. Студенттне сёрмадыхть рефератт, курсовой, дипломнай и лия работат, учёнайхне—творчестванц колга  кандидатскяй и докторскяй диссертацият. Поэтть стихонза ётафтфт лама кяльс. А вдь сонь биографияц тяльги фкя кагод лопаняс. Шачсь М.И.Безбородов 1907 кизонь 10 январьста. Эряфсь пяк стакаль. Мольсть революцият, классовай тюремат, фкя-фкянь аф шарьхкодемат. Эрь вастса вешендсть и мушендсть муворуфт. Аф ваномок стакатнень-сталмотнень лангс, ашу крестьянскяй семьяста цёранясь, Миша Безбородов, 1919 кизоня аделазе эсь велесост начальнай школать. Нинге шабакс оцю мяль шарфнесь мокшень фольклорти, сире пингонь моротненди, койхненди-обуцятненди. Тя лездсь теенза сёрмадомс мокшень кяльса стихт и поэмат. 1929 кизоня аделазе Саранскяйса  Совпартшколать. Тяда меле работась Сире Пиченьгужень начальнай школаса учителькс, морафтома кудса заведующайкс, тяшнесь районнай газетав стихт, велень эряфть колга аф оцю статьят, коса шнакшнезе од эряфть. Сёрмадсь эряфса шоряйть каршес. Вов и сембе биографияц мокшень поэзиять ушедыенц. Сонь поэзиянц колга вов ни пцтай сяда киза споряйхть учёнайхне, литературнай критикне, аф фкя лацонь, но оцю питне макссихть сёрматф стихонзонды, поэманзонды. Сембодонга лама аф фкя лацонь рецензияда сёрматфоль «Ёфкс, кона ульсь»       (1929 к.), «Матовсь кяжец»            (1933 к.), «Волянкса»      (1935 к.) поэманзон, «Кафта ширет» стихса пьесанц лангс. Эсост няфтеви революцияда ингольдень эряфсь, коллективизациять пингста классовай эряфсь, азондови мокшень велень ломаттнень колма революциятнень эса участиянь примамаснон колга. Тяни пингсь полафтсь. Учёнайхне ёфси лия сельмоса ваныхть эстонь пингонь событиятнень лангс. Эвондакшнихть од работат, коса ёфси лиякс няфтевихть классовай тюремась, коллективизациясь.
10 январьста М.И.Безбородовонь шачема шистонза топодель 115 киза. 87 киза ётась, кода содаф поэтоньке аш минь мархтонк. Но эряйхть сонь стихонза, поэманза. И видецоль М.Г.Имярековонь, Безбородовскяй лувомат, лия оцю литературнай илат эрявольхть ётафнемс. Михаил Ильичень поэзияц козя, интереснай, сонь вельденза кассь лама содаф поэт. Безбородовскяй лувоматне крьвястельхть аф фкя од поэтонь тяште.
Илья ВЕШКИН,
Россиянь Писателень
союзонь член.