Поиск по сайту: 
 

Архив
 март 
 2024 
пн вт ср чт пт сб вс
    123
45678910
11121314151617
18192021222324
25262728293031

 
 

 

СТАЛМОДА АФ ПЕЛИХТЬ, КОЛЬ ИНГОЛИ КЯЛИХТЬ

Азонттама республикасонк содаф предпринимательть Р.И.Тишкинать и сонь
фермерскяй хозяйстванц колга
Мекольдень кизотнень минь республиканьке велень хозяйствань тефнень вятемаса путневи примеркс Россиянь лия региоттненди. Тяни Мордовиясь сяда лама мишенди лофцта, сивольда, сёрода, теплицаса касфневи продукцияда. И тяса оцю путкссна кода оцю агрохолдинкнень, МАПО-тнень, велень хозяйствань ООО-нь предприятиятнень, стане и крестьянскяй (фермерскяй) хозяйстватнень, велень тевса заняф лия коллектифнень.
Раиса Ивановна Тишкинать—Рузаевскяй райононь индивидуальнай предпринимательть сатфксонза дивандафтыхть ковста-ковс. Тя хозяйстваса арась правилакс, эрь шиня сатнемс од сатфкст, тиендемс аськолкст инголи.
—Минь аноклафста васьфтеськ и ётафнесаськ тялонь кофнень фермаса, жувататне лац андовихть, сяс лофцта государствати мишенттяма пцтай кафксть сяда лама ётай кизоть коряс,—азонды крестьянскяй (фермерскяй) хозяйствань оцюнясь Раиса Ивановна Тишкинась.—Тянкса улихть сембе условиятне. Тишеда, сенажда, силоста аноклаф сняра, што корматне сатыхть нльне нинге фкя тялонди. Жуватаньке сембе плямань породань, эрь прясь сявф учётс, мельгаст ваттама сембе зоотехническяй и ветеринарнай вешфкснень мяльс сявозь. Кой-кона траксне шити макссихть 40-45 литра лофца. Тядде мяленьке потямс нинге сяда лама.
Тя тевти Р.И.Тишкинась кярьмодсь комсь кизода инголе. Мирденц мархта пуроптсть фермерскяй хозяйства. Пирьфсост водендасть тракст, ведрашт, тувот. Марнек комозьда лама «пряль». Тяка пингть мольфтсть тефт модать мархта. Васенце кизотнень витцесть 400-500 гектар зерновой культура. «Развитие села» фондть вельде сявсть техника, рамсесть удобреният. Валом-валом хозяйствась коль сяда кемоста стяшендсь пильге лангс, эрь кизоня касондсь государствати сиволень и лофцонь мишендемась. Тяни Р.И.Тишкинась эсь сатфксонзон мархта фкясь инь инголи молихнень эзда аф аньцек эсь республикасонк, но и марнек Приволжскяй федеральнай округса.
—Мзярда минь аньцек ушедоме работама, эрь траксста кизоти средняйста потьнеме колма тёжянень килограмма лофца, тяни—кемонь тёжянень литра,—сяда тов азонды Раиса Тишкинась.—Сёрода получсеме эрь гектарста 17 центнеронь, ётай кизоть—50 центнеронь, кой-кона участкатне макссть 60 центнеронь гектарста. Коллективсонк трудендайхть эсь тевонь содай специалистт. Синь мархтост, кода мярьгондихть, пантт можна веляфтомс. Мялезе азомс сюконямань валхт скотникнень А.В.Треневонь и М.А.Мусаповонь колга, дояркатнень В.П.Дивеевать, Ю.С.Сомовать, трактори-сттнень Наиль Давыдовонь и Василий Родионовонь и лиятнень колга. Сембе синь тевти малаткшнихть оцю ответственностень марязь, шинь нормаснон пяшкотькшнесазь 120 процентс.
Маштозь тиендьсыне эсь тевонзон и фермань бригадирсь Т.И.Чушкина. Татьяна Ивановна Р.И.Тишкинать сазороц. Сон фермаса покоди хозяйствать панжемста васенце шинякиге. Татьяна—предпринимательть види кядец. Хозяйствань оцюнясь кодамовок тевонь мельге тусь району, Велень хозяйствань министерствав, сембе тефнень мельге ваны сазороц. Синь фкя-фкянь шарьхкодихть пяле валста. Лангозост ванозь мяль вельде, совестьс коре покодихть и лиятневок. Коллективса улихть и руст, и мокшет, и татархт. И сембе синь трудендайхть кода фкя семья, фкя-фкянди лездозь, оцю сатфксонь сатнезь.
—Минь коллективсонк кажнайсь содасы, мезьста ушедомс рабочай шить и кода тя или тона тевть пяшкодемс,—мярьгсь бригадирсь Т.И.Чушкинась.—Кда эряви, монцьке сявса кядезон цянгть, яван кормат, потян тракст, ускан фермав фураж, лия тефт тиян. Лиякс аш кода, вдь оцю сатфксне сатневихть марстонь вийса, фкя-фкянь ширень кирдезь, шарьхкодезь.
И тяфта коллективса арьси эрсь, шиста-шис кемокснемок фермерскяй хозяйствать результатонзон. Кепотьксонди, меля государствати лофцонь и сёронь мимаса предпринимательть Р.И.Тишкинать хозяйствац лиссь сяськикс республикань лия крестьянско-фермерскяй коллектифнень ёткса. Велень хозяйствань работниконь шиня республикань Оцюнясь Артём Здунов фермерти макссь Почётнай грамота и питни казне.
—Монь пара мялезон, мес трудоньконди шарфневи оцю мяль, аф юкснесамазь, мезьса маштыхть лездыхть тейнек,—мярьгсь меколи Раиса Тишкинась.—Тяфтама мялень шарфнемась кошярясамазь работамс кафтонзаф эрьгаса, сатнемс нинге сяда оцю сатфкст лофцонь и сёронь получамаса.
Эсь ширденк арьсетяма Раиса Ивановна Тишкинати и сонь коллективонцты шумбраши, паваз и сяда товга улемс инголи молихнень ёткса!
Н.ЛОБАНОВ.

 

 
НОВОСТИ
 

МОРДОВИЯСА ЛОТКАФТФ МАСКАНЬ КАННЕМАНЬ РЕЖИМСЬ

09.06.2022  № 22
 

НАЦПРОЕКТТНЕНЬ—ЭРЯФС!

Мордовиянь Правительствась сяда тов мольфтьсы работать национальнай проекттнень эряфс ётафтоманкса, конатненди ки макссь странань Президентсь Владимир Путин. Республикань Оцюнять ширеса совещанияса корхтафоль основной федеральнай и республиканскяй программатнень эряфс ётафтомаснон колга. Мольфтеви работать квалма азондсть вице-премьерсь Игорь Чадов, МР-нь строительствань и архитектурань министрсь Алексей Гришакин, МР-нь транспортть и дорожнай хозяйствать коряс Госкомитетть председателец Валерий Кандрин, МР-нь велень хозяйствань и продовольствиянь министрсь Александр Кечайкин, МР-нь вирень, охотничьяй хозяйствань и природопользованиянь министрсь Алексей Ларькин.

 

Мордовиянь Оцюнясь путсь задача кирдемс кеме контроль ала строямань графикнень пяшкотькшнемаснон. Васендакиге корхтамась мольфтевсь социальнай инфраструктурань объекттнень колга. Тяфта, ванфтольхть кизефксне, конат сотфт Саранскяйса Кировонь ульцяса 250 вастонди идень садть и Тавлинскяй набережнайса 1450 вастонди школать строямаснон шумордамасна.

 

09.06.2022  № 22
 

ЁТАФТОВСЬ АНТИКРИЗИСНАЙ ШТАБТЬ ЗАСЕДАНИЯЦ

2 июньцта Мордовияса ётафтовсь экономикать ширенц кирдеманц и кемошинц ванфтоманц коряс антикризиснай штабть заседанияц, коса ванондовсть республикаса уликс тефне. Азфоль, што Россиянь Правительствась сяда тов мольфти работа санкциятнень эзда экономикать араламанц коряс законодательнай базань тиеманкса. Региоттнень ширень кирдемасна и синь финансовай кемошиснон кемокстамасна—главнай направлениятнень эзда фкясь. Путф подпись РФ-нь Правительствать постановлениянц алу, кона максси возможность кирьфнемс пандоматнень бюджетнай кредиттнень коряс, конат сявфт дефицитть пяшкодеманкса.

 

Майста нолдаф тевс важнай продукциянь импортёрхнень специальнай льготнай кредитованиянь программасна. Тянкса федеральнай бюджетста нолдаф 37 миллиардта лама цалковай. Тяфтама ширень кирдемать сюнеда бизнести ули кода меки  ладямс товаронь рамсемать, конат мзярс аф нолявихть Россиять территорияса, и сяда тов мольфтемс сембе пингонь работать.
 

09.06.2022  № 22
 
 

Одкстоптови общественнай транспортсь

28 майста Саранскяйса Советскяй площадьса Мордовиянь Оцюнясь Артём Здунов ванозень пассажирскяй од автобуснень, конат работайхть газса. Мордовияти тя общественнай од видонь транспорт, кона арьсекшневи нолдамс тевс республикань транспортнай предприятиятнень подвижнай составснон одкстоптоманкса.

Автобусонь ноляйхне няфтезь средняй и оцю классонь техникать. Артём Здунов ванозень автобуснень эса тяниень пингонь салонть и водителень кабинаса оборудованиять.

«Газса работай техникась сяда ванфтсы экологиять и аф веши оцю карьхцьт. Тяфтама транспортть эвондамац максы инфраструктурати касома-виияма—ков сяда лама тяфтама видонь транспортта, тов сяда лама кармай заправочнай станцияда. Тянь мельге сай пингсь»,—китькстазе Мордовиянь Оцюнясь.

Сембе автобусне стане жа тифт усксемс физическяй ширде ограниченнай возможность мархта ломаттнень. Тяниень пингть Саранск ошса ули автомобильнай газонаполнительнай компрессорнай фкя станция.

02.06.2022  № 21
 

Ревакцинация COVID-ть эзда эряви ётамс сембонди

Мордовиянь Оцюнять Артём Здуновонь председательстванц ала 27 майста ётафтовсь Мордовияса коронавируснай инфекциять инголдаманц и келемоманцты кить персеманц коряс оперативнай штабть заседанияц.

Отмечафоль, регионца ванфтови ковидса одс сярядихнень лувксснон киремац—ётай недялять тя ульсь 30 ломань шити.

«Эряви сяда тов мольфтемс ломаттнень вакцинацияснон и ревакцинацияснон коряс работать. Тянь мельге ванома кода муниципальнай образованиянь оцюнятненди, стане и предприятиянь и бизнес-структурань руководительхненди. Тяниень пингть ётафтовихть ЕГЭ-тне, сяс инфекцияда инголдамань мератненди эряви шарфнемс башка мяль»,—мярьгсь региононь руководительсь.

МР-нь Правительствать Председателенц заместителец Галина Лотванова азозе, што республикань медицинскяй учреждениянь стационархненди тона недялять эрь шиня пачфневсь 20 малава ломань. Сёлкф нинге 50 ковиднай койка-вастсь, стационарса пчкси 203 ломань, конатнень эзда пялесна—60+ кизосот.

02.06.2022  № 21
 

Экономикать виияфтоманцты—башка мяль

Мордовиянь Оцюнясь Артём Здунов 27 майста ётафтозе республикань экономикать ширень кирдеманц и кемошинц ванфтоманц коряс антикризиснай штабть заседаниянц.
Региононь руководительсь мярьгсь, што Россиянь Правительствась сяда тов примси решеният, конат эрявкснихть тячиень аф тёждя пингть экономикать работанц лац ладяманцты.
 
«Васенце очередень тевонь мольфтемань федеральнай планти сувафтф нинге 23 кизефкс. Фалу эвондакшнихть од механизмат, од возможностть. Тейнек эряви синь сяда лац нолямс тевс,—мярьгсь Артём Здунов.—Кепотьксонди, Россиянь Правительствась дополнительнайста нолдай 3 миллиартт цалковай региоттнень эса спортивнай инфраструктурать виияфтоманкса. Эряви кенеремс тиемс заявка ня программатненди и получамс финансирования».

Тяфта жа арьсекшневихть отечественнай программнай обеспечениянь ширень кирдемань од механизмат. Республикань цифровой виияфтомань министерствати и региональнай IT-компаниятненди мярькф активнайста примсемс участия ня процесснень эса.

02.06.2022  № 21
 
 

Артём Здунов встретился с многодетными семьями

Глава Мордовии Артём Здунов провел встречу с многодетными семьями республики – её приурочили к Международному дню защиты детей.

Встреча состоялась в Доме Республики в теплой, почти семейной обстановке, за чашкой чая. В ней участвовали вице-премьер Галина Лотванова и министр социальной защиты, труда и занятости населения РМ Игорь Князьков.

«Я хочу от всей души поблагодарить всех многодетных родителей за ваш нелегкий труд, достойный глубокого уважения и общественного признания, - сказал Артём Здунов. – Вы взяли на себя большую ответственность. Понимаю, сколько дел в большой семье, какая у вас загруженность, но прошу вас, чтобы за этими делами вы не забывали разговаривать со своими детьми. Обсуждайте с ними, что происходит в мире, что было много лет назад. Нам важно, чтобы дети выросли настоящими людьми, чтобы любили свою семью и свою Родину. Это наша с вами общая задача. Вы выполнили и перевыполнили свою демографическую программу, спасибо вам за это, теперь дело за нами».

В Мордовии около 8 тысяч многодетных семей, в которых воспитываются более 25 тысяч детей.

25 мая Президент России Владимир Путин на заседании президиума Государственного Совета, посвящённого вопросам социальной поддержки, подчеркнул, что многодетная семья должна быть ценностным ориентиром для всего общества и поддерживаться государством. Президентом поставлена задача сделать всю систему поддержки семьи целостной, последовательной, понятной и эффективной.
02.06.2022