ВАЙМОНЦ ЭЖНЕЗЕ ТВОРЧЕСТВАСЬ

Стирть пильгонзон малас путфоль чемодан, эзонза петфнефтольхть мазы каготкат.

«Ичкозде сась,—арьсесь цёрась и фкя каготкять эзда лувозе: «Давлетшина».—Афоли, фамилияц Давлетшина? А мезе, кда тейне валгомс мархтонза и кандомс чемоданонц? Няк, конашкава эендасть кяденза!.. А коса сон валги? Мондедон инголи или меколи? Аф, тя козонга аф кондясти: кда ичкозе эряй лотксема вастть эзда, мон поздаса тевозон... Да и визькс педендемс аф содаф стирти, хоть и содаса фамилиянц—Давлетшина».

«Мес пезфтазень лангозон марензон?—арьсесь стирсь.—А сон, афкукс, мазы... Ранакиге ёрай шарфтомс эсь лангозонза стирень мяль... Вов кда кандолезе чемоданозень... А кармалень или аф кельгомонза? Афоли, пяк ни прянь няи, «сарду»,—и стирсь конезень сельмонзон.

—«Орёл» кинотеатрась,—кашкомф вайгяльса азозе динамикова шоферсь.

Стирсь стясь вастстонза. Кодаф шуваня варяганяса щаф кядьсонза кеподезе стака чемоданонц и срхкась лисема.

Стяк вастстот, цёра! Листь стирть мельге! Шять, тя пингть эздот туй павазце, конань эса вешендеть, учсеть тняра пинге! Шять, оду мзярдонга аф васеттяда, но сон кадсь эзот арьсемат, лятфнемат, кадозе седиезт ламос аф юкстави сельмованфонц!

Ломатть, азость теенза!

Но ломаттне тянь ашезь няе. И кивок ашезь шарфта кодамовок мяль, мзярда автобусста лиссь стирь, шять, ся фкянясь-сяконясь, конань эса учсь и вешендсь цёрась, самай ся стирсь, конань прважазе сон тяни пичеди и ужяльди сельмованфса...

* * *

Сидеста тяфта эряй: ломанць сонцьке аф содасы—коста-бди кивок ваны лангозонза, но марясы тя ванфть марнек ронгонц мархта. И коданга аф кирди фкя вастса, аф эсь воля ушеды вешендемонза ся ванфть. Тяфта лиссь Васянь мархтовок. И сон шарфтсь. Фтала озамнять лангса ащесь стирь, самай ся стирсь, конань мархта марса ардсть тялонь якшама шобдаваня автобусса. Сон тага, кода и эста, ащесь озамнять лангса и ванць видеста вальмяти, конань маласоль Вася. Стирть ваксса кивок ашель, и сон озась рядок.

—Шумбрат, Давлетшина,—сетьмоста пшкядсь Вася.

Стирсь варжакстсь лангозонза и бта ашезь шарьхкоде—теенза мярьгсть или аф, шарфтозе ванфонц вальмяти.

—Тянь мархта ёрат азомс, бта тя фамилиясь тонь тядяцень?—пе-едезь кизефтезе Вася.

—Шять, и тяфта,—отвечась стирсь.

—Деряй кенереть ни лисемс рьвакс?

—А кда и лисень?

—А видемялькс—кода?

—Тя, афкукс, монь фамилиязе. Но коста содасак?

—Тонь нюрьхкяня мялямце.

—Стиренне.

—Можна простиндамс.

—Шять, содасак лемозеньге?

—Наташа,—апак арьсек азозе Вася      васенце       повф лемть.

—А тон цыганкакс содама аф маштат?—дивандазь кизефтезе сонь стирсь.

—Мезе учи эсот инголе—аф содаса, а вов мезе мяльсот тяни—содаса.

—Мезень мле колга мон тяни арьсян?

—Коста  содате.

—Виде...—тага дивандась стирсь.—Но коста содайть?

—Мон азондолине, да тейне пинге валгомс. Мольхть тячи илять сисем частста «Орел» кинотеатрать ваксс, мон тейть тага кой-мезе азондан.

—Тячи тейне аш мзярда.

—Карман учемот ванды.

—Эряви арьсемс.

—Пяк лама тят арьсекшне—курок сиредят.

—Кда мезевок аф лиси, шять, саян.

—Мон карман учсемот.

Вася валгсь троллейбусста. Наташа ванць мельганза. Няезе, Вася мезе-бди ёрай азомс теенза,—саворне яфиезе кяденц, виздезня пеедезевсь. Тоса путозень кядьлапшензон пилензон лангс, шерьфтезе прянц.

«Аф марясамань,—арьсесь Вася.—А зря мон эста ашень лисе мельганза автобусста. Стакащемда ётась тняра пинге!.. Мзяра ши нардаф эряфстон толкфтома учсеманди, вешендеманди. Но минь нинге васеттяма. И курок. Ванды илять».

Шять, и васедихть...

ТЯТ ЛЯДОНДА СЬКАМОТ!

 О,

Аськолксне шава комнатаса марявихть кайгиста. Аськолкст... Сяда... Тёжянь... Аськолкст веть, аськолкст шобдава и илять, шиньберьф аськолкст... Тон туть эздонза. Тяни тон ашат тяса. Кельме. Аш коза тиемс пря. Колмоцьке пепельницатне пяшксет кулуда. Шра лангса колма шава сигаретань пачкат. Колмоксне стулхне нежетьфт шрати.

Шабать кроватканяц шава. Апак сеентть капа маркс ёрдаф кроватть лангс одеялась.

Тумстот эряскодомбачк тон прафтыть кияксти руцяняцень, и сон ару панчфкакс акшелды тоса, бта валда вальмяня потмаксфтома равжа лоткса.

Ашельхть валхт, ашельхть сельмоветть, ашельхть апрякамат, сялондомат-юватькшнемат. Сембось ётась сетьмоста.

Сон серьгядсь, сон тердсь эсот: «Мрдак!»

Сон авардсь, сон эняльдсь тейть: «Мрдак!»

Но вайгялец ашель...

Аньцек авардсь седиец...

Кода тон ашить маря вайгяленц, кода ашить маря эняльдеманц, ашить няе сельмоведензон?..

Пичефкссь люпштай седизонза стака кевкс. Комнатась—бта лазкс. Шобда, шава. И сигаретань толня.

И вдруг вальмала кайгозевсь мора. Кельгомать колга.

И ашезь кирде седись. Ёрдазе сярятьфксть.

Цяторгодозь сёлговсь кенкшсь. Сигаретань толнясь цифторгодсь ульцяса.

Сон мольсь ломаттненди...