Поиск по сайту: 
 

Архив
 март 
 2024 
пн вт ср чт пт сб вс
    123
45678910
11121314151617
18192021222324
25262728293031

 
 

 

ПОКОДИХТЬ ФКЯ СЕМЬЯ ЛАЦА

Тундань шитнень, кода содаф, ламонц жуватань кирдема комплексненди и ферматненди кямофтома аф ётават, аф сувават. Шарьхкотьф, сембось тя тиенди аф кржа прябала тостонь покодихненди, шорси оцю сатфксонь сатомаса.

 

Лия картинась «Краснослободское» ОП-са. Тяса хуш ботинкаса якак. Фермать территорияц сембе вастова ацаф асфальтса, а кой-коса нльне васьфтят брусчатка. Ломаттнень колга тяфтама заботендамась лезды коллективти шиста шис касфнемс лофцть лувксонц, суткати мишендемс государствати комозьда лама тонна продукция. Няевиста касыхть и буканятнень сталмосна.

 

Тя хозяйствав минь саме рана шобдава и эсь сельмосонк няеськ, кода кярьмодсть тевснонды жуватань мельге якайхне. Финцне кормат явондыхть, лиятне тракст потяйхть, ваныхть вазнятнень мельге. Работамань условиятневок цебярьхть. Помещениятне валтт, эсост лямбе, работайхть транспортёрхне, поилкатне.

 

Аф лама пингонь ётазь нежедеме дояркати Антонина Анатольевна Еремеевати. Меля сон эрь траксста потьнесь кафксонь тёжянь килограмма лофца. А вдь мельганза кемокстаф ведьгемонь оцю сюра мархта жувата. Аф стака лувомс, кемгафтува ковста мзяра лофца потьни Антонина Еремеевась. Цебярьста работаманкса сон аф весть казендевсь Почётнай грамотаса и питни казнеса.

 

—Мон эсь работазень пяк кельгса,—азозе Антонина Анатольевна.—Мзярда кярьмодян траксонь потяма, кажнайть  кундаса лемонц, вадеряса, азан  седиста моли валхт. Тя вов «Зорькась», вакссонза—«Тяштенясь», сяда тов—«Ночкась»… Эрсь тейне эсь лацонза мала, кельгови. Тядде арьсекшнян получамс эрь траксста аф вейхкса  тёжяньда кржа килограмма лофца.

 

«Краснослободское» ОП-нь ферматнень эса кирдевихть цебярь породань лама лофцонь максы тракст. Эздост тяса марнек 950. Лац мольфтевихть зоотехническяй и ветеринарнай работатне, маштозь якайхть вазнятнень мельге. Тя тевса инь оцю сатфкст сатнихть телятницатне П.И.Кузьмина и Н.В.Шукшина. Синь мельгаст кемокстаф вазнятнень сталмосна суткати касондыхть 700-800 граммада. Буканятне касфневихть сиволенди, ведрашне—пляманди.

 

Сембонди содаф, оцю сатфксонь сатомась ламода ащи  корматнень эзда. Ня кизефксне хозяйстваса тяфта жа сембе ширде арьсефт. Тракснень эрь шинь рационцост ули тише, сенаж, силос, зернофураж, лия кормат. Сембе синь жувататненди макссевихть инголькиге аноклафста, шорсевихть миксер вельде. Тя работать аф васенце кизось ни тиендьсы механизаторсь Павел Алексеевич Еськин. Эрь шиня  сон явонды траксненди, ведрашненди и буканятненди кемонть малава тонна эрь кодама корма.

 

—Ингольдень кизотнень ломаттне явондсть кормат жувататненди кядь вельде,—азозе Павел Еськин.—Тяни сембось механизированнай, аньцек пингонь-пингонь ванома кормушкатнень мельге. Сембось тя лезды тейнек оцю сатфксонь сатнемаса. А кда кармай лама лофца, сиволь, эста и зарплатаньковок ули сяда оцю. Кепотьксонди, мон эрь ковня получсян нильгемонь тёжянь цалковай и аш мялезе вешендемс лия работа ширеса.

 

«Краснослободское» ОП-са покодихть лама нациянь ломатть. Руст, мокшет, армятт, украинецт, татархт и сембонь ёткса ули шарьхкодема, сембе анокт лездомс фкя-фкянди.

 

—Павазуван, мес покодян тяфтама коллективса. Минь старандатама семботь тиендемс кода фкя семьяса, брадонь-сазоронь ёткса,—мярьгсь Умият Эвторбиевась.—Монь семьязе сась тяза Арменияста, сембонди макссть работа, эряма васта, иденьке якайхть школав. Мяленьке Чукалы велеса нолдамс кеме юрхт, сотомс судьбаньконь тя мазы аймакть мархта.

 

И тяфта арьсихть ламонцне, кие сась покодема «Краснослободское» потребителень обществань велень хозяйствань предприятияв. Аф стак корхнихть, калсь веши, коса сяда крхка, ломанць—коса сяда цебярь. И пяк пара, мес минь мокшэрзянь масторсонк лама вастова тевсь ладяф ломанть колга арьсезь.

 

Н.Лобанов.

 


 

 
НОВОСТИ
 

МОРДОВИЯСА ЛОТКАФТФ МАСКАНЬ КАННЕМАНЬ РЕЖИМСЬ

09.06.2022  № 22
 

НАЦПРОЕКТТНЕНЬ—ЭРЯФС!

Мордовиянь Правительствась сяда тов мольфтьсы работать национальнай проекттнень эряфс ётафтоманкса, конатненди ки макссь странань Президентсь Владимир Путин. Республикань Оцюнять ширеса совещанияса корхтафоль основной федеральнай и республиканскяй программатнень эряфс ётафтомаснон колга. Мольфтеви работать квалма азондсть вице-премьерсь Игорь Чадов, МР-нь строительствань и архитектурань министрсь Алексей Гришакин, МР-нь транспортть и дорожнай хозяйствать коряс Госкомитетть председателец Валерий Кандрин, МР-нь велень хозяйствань и продовольствиянь министрсь Александр Кечайкин, МР-нь вирень, охотничьяй хозяйствань и природопользованиянь министрсь Алексей Ларькин.

 

Мордовиянь Оцюнясь путсь задача кирдемс кеме контроль ала строямань графикнень пяшкотькшнемаснон. Васендакиге корхтамась мольфтевсь социальнай инфраструктурань объекттнень колга. Тяфта, ванфтольхть кизефксне, конат сотфт Саранскяйса Кировонь ульцяса 250 вастонди идень садть и Тавлинскяй набережнайса 1450 вастонди школать строямаснон шумордамасна.

 

09.06.2022  № 22
 

ЁТАФТОВСЬ АНТИКРИЗИСНАЙ ШТАБТЬ ЗАСЕДАНИЯЦ

2 июньцта Мордовияса ётафтовсь экономикать ширенц кирдеманц и кемошинц ванфтоманц коряс антикризиснай штабть заседанияц, коса ванондовсть республикаса уликс тефне. Азфоль, што Россиянь Правительствась сяда тов мольфти работа санкциятнень эзда экономикать араламанц коряс законодательнай базань тиеманкса. Региоттнень ширень кирдемасна и синь финансовай кемошиснон кемокстамасна—главнай направлениятнень эзда фкясь. Путф подпись РФ-нь Правительствать постановлениянц алу, кона максси возможность кирьфнемс пандоматнень бюджетнай кредиттнень коряс, конат сявфт дефицитть пяшкодеманкса.

 

Майста нолдаф тевс важнай продукциянь импортёрхнень специальнай льготнай кредитованиянь программасна. Тянкса федеральнай бюджетста нолдаф 37 миллиардта лама цалковай. Тяфтама ширень кирдемать сюнеда бизнести ули кода меки  ладямс товаронь рамсемать, конат мзярс аф нолявихть Россиять территорияса, и сяда тов мольфтемс сембе пингонь работать.
 

09.06.2022  № 22
 
 

Одкстоптови общественнай транспортсь

28 майста Саранскяйса Советскяй площадьса Мордовиянь Оцюнясь Артём Здунов ванозень пассажирскяй од автобуснень, конат работайхть газса. Мордовияти тя общественнай од видонь транспорт, кона арьсекшневи нолдамс тевс республикань транспортнай предприятиятнень подвижнай составснон одкстоптоманкса.

Автобусонь ноляйхне няфтезь средняй и оцю классонь техникать. Артём Здунов ванозень автобуснень эса тяниень пингонь салонть и водителень кабинаса оборудованиять.

«Газса работай техникась сяда ванфтсы экологиять и аф веши оцю карьхцьт. Тяфтама транспортть эвондамац максы инфраструктурати касома-виияма—ков сяда лама тяфтама видонь транспортта, тов сяда лама кармай заправочнай станцияда. Тянь мельге сай пингсь»,—китькстазе Мордовиянь Оцюнясь.

Сембе автобусне стане жа тифт усксемс физическяй ширде ограниченнай возможность мархта ломаттнень. Тяниень пингть Саранск ошса ули автомобильнай газонаполнительнай компрессорнай фкя станция.

02.06.2022  № 21
 

Ревакцинация COVID-ть эзда эряви ётамс сембонди

Мордовиянь Оцюнять Артём Здуновонь председательстванц ала 27 майста ётафтовсь Мордовияса коронавируснай инфекциять инголдаманц и келемоманцты кить персеманц коряс оперативнай штабть заседанияц.

Отмечафоль, регионца ванфтови ковидса одс сярядихнень лувксснон киремац—ётай недялять тя ульсь 30 ломань шити.

«Эряви сяда тов мольфтемс ломаттнень вакцинацияснон и ревакцинацияснон коряс работать. Тянь мельге ванома кода муниципальнай образованиянь оцюнятненди, стане и предприятиянь и бизнес-структурань руководительхненди. Тяниень пингть ётафтовихть ЕГЭ-тне, сяс инфекцияда инголдамань мератненди эряви шарфнемс башка мяль»,—мярьгсь региононь руководительсь.

МР-нь Правительствать Председателенц заместителец Галина Лотванова азозе, што республикань медицинскяй учреждениянь стационархненди тона недялять эрь шиня пачфневсь 20 малава ломань. Сёлкф нинге 50 ковиднай койка-вастсь, стационарса пчкси 203 ломань, конатнень эзда пялесна—60+ кизосот.

02.06.2022  № 21
 

Экономикать виияфтоманцты—башка мяль

Мордовиянь Оцюнясь Артём Здунов 27 майста ётафтозе республикань экономикать ширень кирдеманц и кемошинц ванфтоманц коряс антикризиснай штабть заседаниянц.
Региононь руководительсь мярьгсь, што Россиянь Правительствась сяда тов примси решеният, конат эрявкснихть тячиень аф тёждя пингть экономикать работанц лац ладяманцты.
 
«Васенце очередень тевонь мольфтемань федеральнай планти сувафтф нинге 23 кизефкс. Фалу эвондакшнихть од механизмат, од возможностть. Тейнек эряви синь сяда лац нолямс тевс,—мярьгсь Артём Здунов.—Кепотьксонди, Россиянь Правительствась дополнительнайста нолдай 3 миллиартт цалковай региоттнень эса спортивнай инфраструктурать виияфтоманкса. Эряви кенеремс тиемс заявка ня программатненди и получамс финансирования».

Тяфта жа арьсекшневихть отечественнай программнай обеспечениянь ширень кирдемань од механизмат. Республикань цифровой виияфтомань министерствати и региональнай IT-компаниятненди мярькф активнайста примсемс участия ня процесснень эса.

02.06.2022  № 21
 
 

Артём Здунов встретился с многодетными семьями

Глава Мордовии Артём Здунов провел встречу с многодетными семьями республики – её приурочили к Международному дню защиты детей.

Встреча состоялась в Доме Республики в теплой, почти семейной обстановке, за чашкой чая. В ней участвовали вице-премьер Галина Лотванова и министр социальной защиты, труда и занятости населения РМ Игорь Князьков.

«Я хочу от всей души поблагодарить всех многодетных родителей за ваш нелегкий труд, достойный глубокого уважения и общественного признания, - сказал Артём Здунов. – Вы взяли на себя большую ответственность. Понимаю, сколько дел в большой семье, какая у вас загруженность, но прошу вас, чтобы за этими делами вы не забывали разговаривать со своими детьми. Обсуждайте с ними, что происходит в мире, что было много лет назад. Нам важно, чтобы дети выросли настоящими людьми, чтобы любили свою семью и свою Родину. Это наша с вами общая задача. Вы выполнили и перевыполнили свою демографическую программу, спасибо вам за это, теперь дело за нами».

В Мордовии около 8 тысяч многодетных семей, в которых воспитываются более 25 тысяч детей.

25 мая Президент России Владимир Путин на заседании президиума Государственного Совета, посвящённого вопросам социальной поддержки, подчеркнул, что многодетная семья должна быть ценностным ориентиром для всего общества и поддерживаться государством. Президентом поставлена задача сделать всю систему поддержки семьи целостной, последовательной, понятной и эффективной.
02.06.2022