Мордовия Республикань Правительствать видеса гуманитарнай наукань НИИ-ть директороц, Россиянь военно-историческяй обществать Мордовскяй региональнай отделениянц председателец, историческяй наукань докторсь Г.А.КУРШЕВА: «РАБОТАНЬКЕ ВОДЕНДАФ ОБЩЕСТВАТИ ЦЕБЯРЕНЬ КАНДОМАНКСА»

—Галина Александровна, патриотическяй кодама работа тячи мольфти республикасонк Россиянь военно-историческяй обществать Мордовскяй региональнай отделенияц?

—Патриотическяй работась, конань вятьсы республикаса РВИО-ть Мордовскяй региональнай отделенияц, ащи лама ширеста. И эсонза няевикс васта занци региональнай историческяй компонентсь.

Кепотьксонди, тяддеть ушетксста сявомок региональнай отделениянь члеттне Саранск ошень вуснень, колледшнень, гимназиятнень и школатнень эса ётафнихть Мужествань урокт. Эсост азондови од ломаттненди Сурскяй оборонительнай рубежть строяензон, Советскяй Союзонь и лия Геройхнень—Мордовияса шачфнень-касфнень—подвигснон колга, конатнень синь тиезь Великай Отечественнай войнать пингста. И, тяда башка, Мужествань ня урокнень пингста од ломаттненди няфневихть историческяй сотксне, конат марс пуропнесазь аф фкя пингонь Геройхнень подвигснон, конатнень синь тиезь Отечествать врагта араламста.

Тяфта жа, кирдемок мяльса Подвикнень, конат тячи тиендевихть Донецкяй, Луганскяй Народнай Республикатнень эса эряйхнень араламста и Украинскяй народть бандеровскяй неонацисттнень кядялда воляс нолдамста, Мужествань урокненди арьсекшневи сувафтомс Всероссийскяй историческяй компонентть.

Эсь цебярь путксонц         РВИО-ть Мордовскяй региональнай отделенияц тяфта жа сувафнесы федеральнай уровенень мероприятиянь анокламати-ётафтомати. Мекольцесь эздост, кона лемтьфоль Крымть и Севастопольть Россиять составс меки сувамаснонды, митинг лаца 19 мартста ётафтовсь Мордовиять столицаса. И тяниень пингть минь тяфта жа мольфттяма анокламань тефт мероприятиятненди, конат лемтьфт Великай Победань шити и Сурскяй оборонительнай рубежень строяйхнень подвигснон лемс. Тяфта жа карматама работама «Героень страна» военно-историческяй лагерьса.

И, конешна, кочкатама гуманитарнай лезкс беженецненди, конат састь ширезонк Донецкяй Народнай Республикаста.

—Кода содаф, Галина Александровна, тон нинге вятят республикань Общественнай палатаса председателень заместителень тефт. Сяс пара улель кулемс, кодама кизефксонди лемтьфтольхть Мордовиянь Общественнай палатать мекольдень мероприятиянза?

—Эряви азомс, республикань Общественнай палатась Мордовиянь лия общественнай организациятнень мархта лама тиендихть обществасонк межнациональнай, межрелигиознай и межкультурнай соткснень кемокстамаса. И кода няфнесазь социологическяй исследованиятне—тяфтама работась канды обществати лама цебярь ширеда.

Кепотьксонди, мекольдень мероприятиясь, коса мон работань республикань Общественнай палатать лемста, лемтьфоль тяниень пингонь авать статусонцты-вастонцты обществаса, религияса, семьяса.

Форумсь, конань марстонь вийса аноклазь «Россиянь авань союзсь» общественно-государственнай организациять Мордовскяй региональнай отделенияц, «Чулпан» («Шобдавань тяште») татаронь авань Мордовиянь республиканскяй организациясь и республикань Общественнай палатась, дискуссиянь форматса ётафтовсь Мордовиянь Исламскяй культурань центраса. Пингстонза аватне-политикне, общественнай деятельхне, педагокне, учёнайхне, психолокне, социолокне, журналисттне, предпринимательхне, студенттне, традиционнай религиознай конфессиянь представительхне пачфтезь панжадонь седихть пуромфненди эсь мяльснон форумть рабочай шинь повестканц коряс.

Мордовия Республикань Государственнай Собраниять Председателенц лемста приветственнай вал пуромфненди азсь сонь заместителец Н.В.Долматова. Монць форумса тиень «Авань лик мархта профессиятне. Афкуксонь или аф афкуксонь тев?» лем ала доклад.

Койсон, форумсь, кона ётафтовсь очнай и онлайн-форматса, сатозень арьсеф сембе целензон!

—И мекольце кизефкссь. Галина Александровна, кодама работа тяниень пингть мольфти Мордовиянь Правительствать видеса гуманитарнай наукань НИИ-сь?

—Кода и тяда инголе, институтсь лама тиенди научно-исследовательскяй эсь профиленц коряс тефнень эса.

Тяфта жа эрьгавста латцетяма сембе ширдень научнай соткст лия региононь научно-исследовательскяй институттнень мархта.

Тяда башка, научнай книгань форматса нолятама институтонь учёнайхнень работаснон, научнай кафта журналхт—«Центрась и перифериясь» и «Мордовия Республикань Правительствать видеса гуманитарнай наукань НИИ-нь «Вестник». И тейне тячи пара азомс-пачфтемс лувихненди: тяни сембе статьятне, конат печатлавихть «Вестниксонк», лувондовихть эрявикс публикациякс кандидатскяй или докторскяй учёнай степенень араламста!

В.НЕСТЕРОВ.