ТЯДЯНЬ УЖЯЛЬДИХТЬ

—Эх, Лёшу, Лёшу. Тейне ба тонь пилькнень. Аньцек лиенделень райцентрав, велеть эзга.

—Лиендемс аф пилькт, а пацят, тядяй, эрявихть.

—Кда пилькне якайхть, пацятне синць шачихть, цёрай. А тяни ой да вай. Молян Кулёк Настать пяли. Анокс пелендян, кода меки куду пачкодян. Кода тапаф кирькат. Чаподелить да перяфксть вельф ёрдалить.

—Хэ…хэ…хэ… Лёшувоц. Кда ёрдасайть, тоса кудстовок аф лисеват.

—Тяфтавок шиньберьф кудсан, ойкснян-вайкснян, ковга аф якан.

—А кати-местема ни якат, кудса ащек.

—Кудса ащек… Кудса ащезь кяльцевок курга потмозт коськи. Корхтамска аш кинь мархта. Катозе. Сявок шинь-шинь коса-бди якай. Сай куду, мяв  да мяв. Танцтиняда антк, бта покодема вастста сась.

—Сембе сяка, тядяй, лучи кудса ащек. Улеть од, шумбра-таза, тонга лытать, костовок ашеть лядонда.

—Виде, цёрай. Оду ковга аф молян. Мадан эзембряв, сусксайне трванень, кялезень и карман учсема, мзярда кхаса.

Омбоце цёрац, Петювоц, боксёр. Аф фкя алянь шалхка ширептсь-тапась. Алду баба кржа мезе шарьхкоди боксса. Петювондивок аф весть корхнесь: «Аф алянь тев тя, цёрай. Ёньц кундак, покодема вастоня эстейть вешть». А Петю аньцек каршезонза кторды:

—Пяк алянь тевозе, маман. Зрнянь алхт канды. А сяда лама тейне аф эряви.

Мзярда сашенды вели, алятне честь путыхть. Лац аф лац корхтай, сяка ширенц кирдьсазь.

—Кода тевсь, Алда Васильевна?—кизефтьсы перьфканза шары космонавтсь.

—Во!—и кеподезе вяри кержи кядень пяльхканц.

—Няйса, няйса, што «во». Ату ой да ай, кхаса да кхаса.

—Кали тяфта корхнень, доктор цёрай?

—А тонць, што ли, аф мяляфтсак?

—Аф, идняй, аф мяляфтса. Кати куване лиендень, кати-кинь мархта сялонкшнень-тюрендень. А кинь? Монцьке аф содаса.

—А атяня лиендемста ашеть мушенда?

—Хэ-хэ-хэ… Алду. Атяня? А мезенди сон тейне эрявсь.

—Кода мезенди? Перьфкат шарыенди-тарыенди, мялень ваныенди.

—Аш, ашень васьфне кодамовок атяня. А вов аляне мушендонь.

Ктор…ктор… вакссонза ащихне. Сярятьфснонга юкстазь.

—Ну-ка, ну-ка, Алда Васильевна, тя интересна. Азонтка, кодама аляня мушендоть: одня или сиреня. Ашезь надияфта кучемс кудат?

—Одня или сиреня?! Конешна, одня. Сиренять мархта мезе тиян. Аньцек машнефнемон кармай.

—И кодамоль, Алдакай, ся «женихсь»?—кизефтезе     вакссонза ащи авась.

—Пейфтома, коцькаргакс мянтьф.

—Ха-ха-ха…—палатань келес.

—Ну тонь, Алдакай! Минь видекс арьсеме, што тон од цёра лиендемста мушендоть, а тон рахсят лангсонк.

—Эх, аванят, аванят! Кодама од цёра.

—Пади, мирдцень мархта васьфнеть.

—Кодама  мирде?

—Кода кодама? Ну вдь кулоф аля ваймоце?

—Кулофтсак монь аля ваймозень. Кшникс нинге ащи. Рузавац эрь шиня ваи пачада аннесы.

—И мзяра киза аляфтома ни эрят?

—Мзяра киза, сняра и тяла. Сяка тевозевок, аньцек кизотнень лувондомс.

—И кивок кудат тяда меле ашезь кучсе?

—Мес ашесть кучсе? Ульсть седиень солафтыне.

—Козянятольхть?

—Аха! Кизонь и урмань ширде.

—Ха-ха-ха… палатань келес. Ва Алда баба. Кельгсы рахафтоманц. Палатань келеса аф сяськови.

Тя и пара. Пингонь ётазь бабать нолдазь куду. Но ковидсь тиезе эсь кальдяв тевонц. То шарыбря учакс арай, то давленияц стакащемда кеподи, то  седиенц фатясы.  А ськамот эрямась, да нинге сярядемась...

—А тон, бабай, улема, ськамот эрят? Кизефтицевок аш.

—Ськамнян, ськамнян, стирняй.

—А иттне улихть?

—Кафта цёране.

—А мес варжамот аф сашендыхть?

—Коста сайхть. Кафцьке спортсметт. Фкясь ласьконди, омбоцесь—боксёр. Деряй, мон синь мяльсостан. Да и пингсь тяни кодама, лишнай  аф врнат. Ацатанза пяляз урмась, аф ваны, што спортсменат.

—Да сембе сяка. А гайфнихть хуш?

—Весть аф весть гайфнихть.

Аваняти ужяль арась сиренясь. То ямня кудста канды, то алнят, то лофцоня. Хуш и андсазь больницяса, но кудонь ярхцамбяльсь тя кудонь ярхцамбяль. Алду баба акша халатсоти родной ломанькс арась.

—А цёратне содасазь, Алдакай, што больницясат?—кизефтезе  аванясь.

—Ашине аза. А мезенди азса, сяка аф сайхть. Кудозе шава, монць тясан.

—Сяка азомс эряволь. Иттне вдь. Синць аф сайхть, пади, посылканя кучельхть, ярмаконя прважальхть. Ковидта меле тейть лама эряви. Лекарстватне питнихть. Да и ярхцамска аф кедю модамарьда эряви.  Вержихне-пяденцятне юкстамат. Сивольняда, алняда, калняда ярхцсема. Ату ёфси пульзят. Праят васта лангс, мельгат якайге аф ули.

—Видеце, стирняй. Аньцек мезе тият. Ськамот эрямась стака.

Улель аф Алду баба, кда нолдалезе прянц, тиелезе шаманц ризнай ломанькс. А сон кучф посылканц и сёрманц няфтезень мархтонза палатаса ащихненди. «Ськамон, што ли кеняртькшнян, миннетнень, цёранень инкса. Синь вдь ого-го-го… Оцю тяштть. Лувине сёрмаснон и пчкянь. Ну-ка, стирняй, ункстака давлениязень. Аф космонавтонь, лиема аф туян»,—шутендазь азозе сиренясь.

—Сичас, Алдакай, ункстаса. Ату видекс космосу лийкстат, кадсамасть. Месенттяма тяфтама цебярь Алдакафтома.

Акша халатсось ункстазе бабать давлениянц:

—Космосу лийкстамс нинге рана. А таблетканя сичас кандан. Пяк ни маштат кенярдема, Алдакай.

Лёшу мархта Петювонди каршек сёрма арьсесть тяштемс палатань келеса:

«Шумбратада, Лёшу и Петю. Сёрмады тядянте, мархтонза фкя палатаса ащихне. Марса сюконятама кучф гостинецонтень инкса. Каванямасть палатань келеса. Кеняртьфтемасть и миннетнень, и эсь инксонт стане, што сембе сяда тёждяста марясаськ эсь пряньконь.

Монцень валгсь давлениязе и лоткасть шулкфтома пакарьне. Вакссон ащи авать пчкясь карязоц, ласьконди кода од стирь. Омбоце авась недяля ашезь якав ушу, сяряди потмоц. Кенярдемать эзда музе шуванясь, аф стякшни «горшок» лангста. Нинге фкя пчкси  ялганьконь пандовсь седистонза варянясь. Колмоксть ни якась УЗИ-с, докторнятне мезевок ашесть му. Лиссь кодама-бди чуда. А Татю медсестраньке кенярдемать эзда пекиясь, хуш и мирдец ков ни пцтай Москуса добувай. Сай куду, аф содасы, мезе азомс, кода виденцямс. Вов мезе тись тинь посылканте. Кенярдеме тк кенярдеме. Тямасть юксне, кучеда посылканя нинге. Ату лисян больницяста, уштан баня, мезьса крьвяснесайне пенгянень».

Арьсетяда тя шутка. Аф, конешна. Алда баба тя сёрмать эцезе конверт потмос. Ялганзон варжайснон  вельде кантфтозе почтав. Шарьхкодсть мезевок Лёшувоц и Петювоц, тянь аф содаса. Ответ тядяснонды нинге ашесть сёрмада.

Илья Вешкин.