КЯЛЬСЬ-НАРОДТЬ ВАЙМОЦ

 «Ули минь тяфтама народоньке—Россиянь коренной нароттнень эзда фкясь—мордват. Нят мокшет, эрзят, нинге улихть шокшет... Сембе синь лувондсазь пряснон мордвакс. И корхнихть фкя языковой группань кяльса. Синь кяльсна сяда ламоса аф фкя лацоннет рузонь и украинскяй кяльхнень коряс. Но синь кородозь ванфнесазь марстоньшиснон. Мес? Сяс мес мордвась ёнюфт, синь шарьхкодьсазь—явондомась мезеньге цебярьс аф вяти.  Сон лафчепнесы этность».

Россиянь Президентть Владимир Путинонь «Виде линиястонза» видеороликста, коса сон азозень ня валхнень, ушедовсь илась, кона  лемтьфоль Мокшень и эрзянь кялень Всероссийскяй шити. Ётафтовсь сон 15 апрельста Саранскяйса, Мокшэрзянь государственнай национальнай драматическяй театраса. Тяза пуромкшнесть сят, кит кельгсазь шачема-касома кяльснон, кит таколдыхть вандыенц инкса, кит путнихть вийхть ванфтоманксонза.

Илас сашендсь Мордовия Республикань Оцюнясь Артём Здунов.

—Мялезе азомс кельгомань валхт минь родной и кунардонь пингонь кяленьконди—мокшеннети и эрзяннети. А васендакиге ся ломаттненди, конат ванфнесазь и виияфнесазь кяльхнень. Эрьда карматама ванфтомонза культурань козяшиньконь, кона эряви кадомс од поколениятненди. Кяльс коре ламоц радняньке эряйхть омба масторса, эрьда карматама кирдема соткст мархтост, азонкшнесаськ-лятфнесаськ теест, кинь инкса воявасть минь атяньке и атянь атяньке. Тянь эса минь марстоньшиньке. Минь кородозь малаткшнетяма лия нароттненди. Но мзярдовок аф макссаськ минценнеть!—мярьгсь Артём Алексеевич.

Мордовиянь Оцюнясь стане жа лятфтазе, што тядде кемокстаф национальнай культурать и государственннай кяльхнень ванфтомаснон коряс программа.

—Государственнай программась сувафтф ни тевс и минь карматама сонь виияфнемонза,—азозе Артём Здунов.—Мон кирдьса ширентень сембоса. Башка мяль шарфттама народно-художественнай промыслатненди, туристическяй проекттненди, книгань нолямати.

Национальнай культурать, кяльхнень и койхнень ванфтомаса оцю путксонкса Мордовия Республикань Оцюнять Благодарностьса Артём Здунов казезень: Зубово-Полянскяй райононь Булдыга велень школань мокшень и рузонь кялень и литературань учительть Т.Е.Ляшинать, Старошайговскяй райононь Сире Теризморгань школань мокшень кялень и литературань учительть Л.А.Сокоровать, «Тяштеня» идень эстетическяй воспитаниянь центрать директоронц А.И.Тишкинать и лиятнень.

Апрель ковста ётафтовсь «Мордовия Республикань мокшень и эрзянь кялень инь цебярь учительсь» конкурссь. Эсонза участия примасть тонафтыхть 15 районцта и Саранскяйста. Финалу лиссть вете ломатть. Илать пингста МР-нь Правительствать Председателенц заместителец Галина Лотванова азозе сяськить лемонц. Инь цебярь учителькс арась Саранск ошень «Тавла» образованиянь центрань—17№ средняй общеобразовательнай школань мокшень кялень тонафтысь Оксана Трушкова.

Илать мархта пуромфнень поздравляндазень и МР-нь образованиянь министрсь Елена Солдатова. Елена Петровна казезень мокшень, эрзянь кяльхнень и литературать коряс XXIV Межрегиональнай олимпиадань сяськихнень.

Мокшень и эрзянь кялень Всероссийскяй шить пингста казьфтольхть и сят, кит няфтезь пряснон «Масторава» межрегиональнай фестивальса-конкурсса. Ётафтозе сонь финно-угорскяй народонь культурань Поволжскяй  центрась. Пялькстомаса примасть участия аф аньцек мордовиянь эряйхне, но и лия региононь мокшэрзятне. Лямбе валхт илань шиня кайгсть мокшэрзянь диаспорать эздовок. Видеоть вельде поздравленияснон кучезь Санкт-Петербургса, Самараса, Пензаса, Татарстанца, Чувашияса и лия регионца эряй мокшэрзятне.

Пара казнекс сембонди арась «Умарина» моронь и кштимань государственнай ансамбльть концертоц.

И.ФАДЕЕВА.