ТУНДАНЬ И ТРУДОНЬ ПРАЗДНИКСЬ—САРАНСКЯЙСА

1 Майти лемтьф торжественнай мероприятиятнень эса, конатнень  пуропнезень республикань Профсоюснень федерациясна, примась участия 5 тёжятть ломань, синь ётксост—эсь профессиясост инь цебярьхне, промышленнай и аграрнай предприятиянь сотрудникне, общественнай и од ломанень объединениянь представительхне. Торжественнай колоннась Феодор Ушаковонь лемса Кафедральнай соборть ваксста тусь А.С.Пушкинонь лемса Культурань и ваймамань паркти, коса ётафтовсь праздничнай митинг.

«Ламонцненди тейнек тя шись—трудящаень солидарностень праздник! Марса пуромомань ши и достойнай трудонкса правань сатомань ши! Тячи минь чествовандасаськ ломаттнень, кит эсь маштомошиснон и старандамаснон вельде тиендьсазь содафокс минь Мордовияньконь, кемокснесазь минь государстваньконь»,—панжемок митингть мярьгсь МР-нь Профсоюснень федерацияснон председателец Сергей Борисов. Сонь валонзон коряс, тядде 1 Маень праздниксь башка эсь лацонне.

«Тячи минь няфнесаськ народоньконь марстонь кемошинц и тя  стака пингть кирдьсаськ Президентоньконь Владимир Владимирович Путинонь ширенц и сонь тевонзон ширеснон минь странаньконь национальнай интересонзон араламаснон коряс. Минь кирдьсаськ военнослужащайхнень ширеснон, конат пяшкотькшнесазь боевой задачатнень специальнай военнай операцияса. Минь сембе мярьктяма—аф улемс нацизмати!»—азозе Сергей Борисов.

А Тундань и Трудонь праздниконь карша, 29 апрельста, Саранскяйса И.М.Яушевонь лемса Государственнай музыкальнай театраса ётафтовсь 2021 кизоть итогонзон коряс республиканскяй конкурснень эса сяськихнень торжественнайста чествовандамасна, конань эса примась участия Мордовия Республикань Оцюнясь Артём Здунов.

—Тя праздниксь занци башка васта государственнай праздникнень ёткса, сонь козя историяц. Но инь главнайсь—сон лемтьф трудонь ломаттненди, сембонди сятненди, кит лемнесазь эсь эряфснон  республикать кемокстаманкса-виияфтоманкса. Мордовиясь— вииякшни-кемоксни край, тянь колга корхтай регионть историяц, трудсь тяса фалу почётса: и Великай Отечественнай войнань кизотнень, и тяниень стака пингть,—мярьгсь республикань Оцюнясь.

Сонь валонзон коряс, меля и тядде Мордовияса кассть промышленнай и  велень хозяйствань производствань объёмтне. Тяни ламоц предприятиятнень эса сашендови ётафнемс переориентация, полафнемс производственнай и экспортнай программатнень. Но сембось тиендеви главнай цельть сатоманкса—спецоперациять и санкционнай люпштамать ётафтомаснон пингста аф нолдамс алу прамать и араламс Родинать. Мордовиянь Оцюнясь азсь благодарностень валхт ветераттненди, региононь трудовой династиятненди.

Сяльде республикань Оцюнясь казезень 2021 кизонь итокнень коряс трудса пялькстомаса сяськихнень. Сяськиень знамятне трудса пялькстоманкса максфтольхть  трудовой коллектифненди промышленностень, транспортонь, информациянь и связень, строительствань, жилищно-коммунальнай хозяйствань, здравоохранениянь, образованиянь, культурань, социальнай обслуживаниянь, ёмла предпринимательствань, торговлянь и общественнай питаниянь, агропромышленнай отраслянь предприятиятнень ёткса.

Тяфта, Саранскяень электромеханическяй колледжти, Саранскяень Центральнай рынкати и Краснослободскяй райононь «Старо-Синдровское»       ООО-ти знамятне максфт сембе пингс ванфтоманди кода организациятненди, конат арсихть трудовой пялькстомань сяськикс колма кизот мельцек.

Почётнай дипломса и «Мордовия Республикань инь цебярь трудовой династиясь» знакса казьфоль Кабаефнень семьясна, конань марстонь трудовой стажец Большеигнатовскяй райононь велень хозяйстваса 153 киза.

Мордовия Республикань Государственнай Собраниять Председателец В.В.Чибиркин казезень «Коллективный договор—основа защиты трудовых прав работников» эрь кизонь конкурсть сяськиензон.

Сценати терневсь Социалистическяй Трудонь Геройсь Р.И.Жидкова, кона лама  киза работась «Электровыпрямитель» заводса.

Ульсть поздравленият и казнет республикань Правительствать Председателенц В.Н.Сидоровонь, Мордовиянь профсоюснень федерацияснон председателенц С.В.Борисовонь эзда.

Т.АЛЬШИНА.