«Бессмертный полк России» ООД-ть Мордовия Республикань региональнай отделениянц штабонц руководителец Н.А.КРУЧИНКИН: «ТЯДДЕ "БЕССМЕРТНЫЙ ПОЛК" ШЕСТВИЯСЬ КАРМАЙ АСЬКОЛЯМА МАРНЕК СТРАНАТЬ ЭЗГА!»

Несколька ши ляткшни оцю и марстонь праздникти—Сяськомань Шити. 9 Майть  тядде сембе учсаськ сядовок оцю мяльса, сяс мес «Бессмертный полк» шествиясь, кона мекольдень кафта кизотнень странаса коронавирусть келемоманц мархта сотф эпидемиологическяй мялень аф кеподи обстановкать сюнеда ашезь ётафнев, кармай очнай форматса! Тя кулясь эстокиге пачкодсь ломаттненди и арась теест оцю казнекс 9 Майти анокламста.

Ня шитнень «Мокшень правда» газетать корреспондентоц васьфнесь «Бессмертный полк» Общероссийскяй общественнай движениять Мордовия Республикань региональнай отделениянц штабонц руководителенц, 1941-1945 кизотнень Военнай и трудовой подвигонь Мемориальнай музейть директоронц Н.А.Кручинкинонь мархта, кона пачфтсь, кода  мольфтеви анокламась «Бессмертный полк» шествияти.

Николай Андреевич корхтаманьконь ушедомста башка мяль шарфтсь сянь лангс, што ломаттне лажадсть «Бессмертный полк» шествияти, тянь ули кода азомс и Мордовиять колга. Ламотне гайфнесть штабу мелявок фкя сяка кизефкс мархта: ётафтови-аф шествиясь тядде? И вов ся, мезть колга кунара арьсефоль и мезсь учсефоль, 9 Майста ётафтови эряфс.

Тя материалсь аноклафоль 25 апрельста и самай тя шиня Н.А.Кручинкин тись-якафтсь «Бессмертный полк» шествиять Саранск ошень округса ётафтоманц мархта сотф тефт.

«Кода региональнай отделениять штабонц руководителец, тячи максонь Саранск ошень округонь оцюнять лемс уведомления сянь колга, што арьсетяма ётафтомс шествиять. Инголенди заявкасонк азоськ, што эсонза примай участия 35 тёжянь ломань—тя аньцек Саранскяйса»,—мярьгсь сон.

Кда корхтамс Мордовиянь лия ошнень и райоттнень  колга, то учендови, што сембоц «Бессмертный полк» шествияса кармай молема 30-35 тёжянь ломань. Эрь районць, эсь графиконц мяльса кирдезь, кочкасы эрявикс пингть. Коса, мярьктяма, шествиясь ули митингта инголе, коса—сондедонза меле. Кой-кит латцесазь тянь стане, штоба 9 Майста кафксть примамс участия  шествияса—васенда районца, а сяльде—Саранскяйса или меколанкт.

Республикать столицаса «Бессмертный полк» шествиясь 9 Майста ушедсы эсь кинц машина кинь вокзалть маласа площадьса Геройхненди-стратонавттненди памятникть ваксста 15 частста. Кочксевома участниконза ушедыхть 14 частста. Маршрутсь лядсь сякокс, кона ульсь: Ленинонь проспектоц (Советскяй площадти молемс), меле Советскяй площадть ланга Вечнай толти молемс (Сяськомань площадти). Пачкодемок Вечнай толти, ули кода путомс тоза панчфт.

Штабть руководителец шарфтсь мяль сянь лангс, што шествияса ули кода примамс участия эрти, кинь мялец. «Бессмертный полк» шествиять аш кода нолямс тевс политическяй партиятнень и кодамовок лия организациятнень инкса агитациянкса. Колоннатнень эса ули кода кандомс или Сяськомань Знамять, или Отечествать аралайснон портретснон мархта штандарттнень.

Ётай шествиятнень эса кой-кит каннезь тылонь труженикнень, Афганскяй войнань участникнень фотографияснон. Кодамовок кардама тянь коряс аш и ашель. И кда тядде кивок поладсы тя тевть, а стане жа сай мяльс шествияса кандомс Украинаса ётафтови специальнай военнай операциять участниконц портретонц—каршек ащема тянди стане жа аф ули.

Лятфтамок специальнай военнай операциять, кизефтине Николай Андреевич Кручинкинонь мяленц колганза. «Арьсян, странаньконь Президентоц Владимир Владимирович Путин пяк ёнюста тись. Операцияда ингольдень кофнень, недялятнень, нльне шитнень событиясна пяк шарфтсть 1941 кизонь 18-20 июнень тефнень лангс. Президентсь ашезь карма учендома, мзярда прязонк кармайхть пяярема бомбат и ракетат—минь тянь семботь няеськ, ётаськ и содасаськ, кодама последствият улельхть. Мяльса кирдьса Донбассть, Крымть, а меле и лангозонк врьгятемать. Кепотьксонди лятфтасаськ 1941 кизонь 22 июнть. Странаньконди ули кода арьсемс эсь  аралафшинц колга, а стане жа сон аф кадондсыне зиянц ломаттнень, конат анайхть лезкс»,—азозе Николай Андреевич.

Великай Сяськомать 80  кизонцты—2025 кизоти, Россияса арьсекшневи нолдамс «Малая Родина. Книга Памяти» Великай Отечественнай войнань геройхнень колга мялямть сембе пингоннекс тиеманц колга проект. Сон фатясы Россиянь эрь населённай пунктть и азсыне ся солдаттнень и офицерхнень лемснон и судьбаснон, конатнень колга тянемс мезевок апак содак или содаф аф марнек.

Н.А.Кручинкин мярьгсь, што Мялямонь электроннай книгатнень тиемасна эрь регионца вятеви Россиянь Президентть В.В.Путинонь мярьгоманц коряс. Эзост сувайхть войнань сембе участникнень лемсна, а стане жа азови эрь населённай пунктсь и мзяра ломань тоста ВОВ-нь участник и стак тов. Целайнек, меле тя ули Общероссийскяй сайт. Сон тянивок ни ули интернетса malaya-rodina.ru адресс коре. Эзонза сувафтовихть вяре азф уликс сембе даннайхне Россиянь сембе региоттнень: ошнень, велетнень, веленятнень, райцентратнень эзда. Уликс информациясь максови шарьхкодевиста, теенза тиеви эрявикс систематизация.

Кода тя сембось няфти сайтса? Тянь ули кода няемс тоза максф кепотьксть (пилотнай проектть) Рязанскяй областень Паники велеть Мялямонь книганц вельде.

Мартста Саранскяйса 1941-1945 кизотнень Военнай и трудовой подвигонь Мемориальнай музейса ётафтфоль Мордовия Республикань Мялямонь электроннай книгать тиеманц коряс семинар.

Тя задачать пяшкодемаса ули кода примамс участия тянь лангс мялень шарфты ломаттненди и организациятненди, властень оргаттнень представительснонды, культурнай учреждениятненди, школатненди, библиотекатненди,  Великай Отечественнай войнань участникнень радняснонды и мала ломаньцнонды, сятненди, кинь ванфтовсть кодамовок документсна  войнань участникнень колга.

Поручениянц максомста В.В.Путин азозе, што фкявок ломань тя проектть эряфс ётафтомста аф юмафтома!

Тяни Мордовияса эряй Великай Отечественнай войнань 70 малава участник. Эрсь эздост—историяньконь эрек пяльксоц. И кажнайть колга ули кода лама азондомс и пачфтемс. Малаткшни синь праздниксна, сяда видеста азомс, марстонь оцю праздниконьке—Сяськомань Шись! Эрьда арьсесаськ, кодама путкс вийс коре тиемс тянди: аськолямс «Бессмертный полк» шествияса, поздравляндамс Великай Отечественнай войнань участникнень или эстейнек арамс Сяськомань Шити лемтьф акциянь и пуромксонь участникокс. Малаткшни праздникть мархта сембонь!

Т.Альшина.