АТЯЗЕНЬ ЛЯТФНЕМАНЗА

Атязень лемоц Мефодий      Елисеевич Белкин. Шачсь 1936 кизонь 16 июльста Зубово-Полянскяй райононь Велезем велеса, коса и эрясь. Фалу пяк кельгине мархтонза корхнемазень, кизефнине эряфонц, шабакс и одкс пингонц колга. Тя кода фкя пильгса аськолдамс ётай пингти, ётафтомс эсь потмоват ся  стакатнень-сталмотнень и кенярдематнень, конат прашендсть атяньконь-бабаньконь эряфонь киснон лангс. Уленди, лакафттама мархтонза чай, сиптяма эсь нешкоперестонк медня мархта, эхи танцти!.. Озатама шра ваксс и саворне, сетьме веднякс шудезеви корхтаманьке.

«Семьясонк ветенектолеме: аказе, альняказе, мон и кафта  дуганне. Улель эздонк сисем, аньцек кафта брадне нинге ёмласта кулость. Школав тунь, мзярда аньцек ушедсь войнась. Алязе и альняказе туфтольхть воявама. Тонафнема ашель мезьса якамс, ашель мезьда ярхцамс. Пялес вачень пект эста эряме. Куттне кельмот, пенгат аш, вальмятне эихть.  Тядязе стяй шобдава ранакиге, кодавок тол аф муй, штоба крьвястемс кизякнень. Меле ушеды модамарень или лямонь пидема. Сиволь ни ашель, тянь колга аш месть корхтамска! Тушенттама школав: кинь каренза, кинь кямонза, а кинь мезецка аш... Ся козовок афи туй, кудса ащи. Велень ламоц иттне  школав якасть аньцек сёксенда, а тоса мянь тундас кудса нюрьксесть. Тялонда вдь кяпе аф молят. Школатне эста пяшксетольхть шабада, аньцек классонк нильгемонь кафтува тонафни ульсь. Кда лисихть переменаста сембе ниле классне, марнек курнясь пяшкоди: кие тюри, кие ласьконди, сязентьфтама-нозонтфтама сембе, содуфтама. Озафнемс иттнень ашель коза, партатнень ваксс ашесть тяльгонде. Каннесть эзепт. Кагод ашель—война моли. Учительсь максы ёмла кагод пакшкя, вов шиньберьф лангозонза и сёрмадат. А чернилатне и якстеряпсонь, и содонь ульсть. Пераса сёрмадомс мярьгондсть аньцек оцю классненди, а минь тяшнеме шуфтонь ручкаса. Школатнень явафнезь, аф весть иттне иретькшнесть. Лац мяляфтса, омбоце класса тонафнень, усксть нурдоняса «Родной вал» книгат. Ярмак ашель, а тяшкава мяленьколь рамамс. Сань тядязти, авардян: кеветие цалковай книгать питнецоль. Рамась книга—шинек-венек эсонза ванондонь.

Школав ниле кизот якань. А сяльде кудсонк лиссь зиян—1948 кизоня шавовсь тядязе. Колхозонь машинаса тусть Спасскяи базару. А меки ардомста, Пензенскяй областень Студенец ляйнять маласа, машинась шаркстась. Ломаньда грузовой машинать эса ламоль, шавовсть сембе. Тейне эста кемгафтува киза ульсь. Кадыне школать, ушедонь работама. Усксень кизякт. Туят ранакиге шобдава и илядьс усксят. Усксень букаса—алашатне колхозса  заняфтольхть лия тевса. Ярмак ашесть панне, покодень ярхцамбяленкса. Кизонда пси, аф ащеват, пряце лопади, букатьке кялец лихтьф. Алашась—ся вдь ардозь ардоль, а тя жуватась саворне моли и моли, и тяфта шиньберьф...

Сяльде, мзярда сяда касонь, тунь озимонь инзама, меле—сокама. Сёронь урядама пингть сёрот усксень. И тяфта эрь кизоня. Тялондавок тевфтома ашень ащекшне: назём, шлак ускселень колхозонь перетненди.

Мяляфтса, 1953 кизонь 4 мартста кулось народть вятиец—И.В.Сталин. Сембе авардихть, родной аляснон, мярьгат, юмафтозь. Эста телевизорхт-месть ашельхть. Сембе велеряйхне кочкавсть ташта клубти, тоса ульсь оцю радио,  «Родина» лемоц. Эрь вете минутань ётазь содаф дикторсь Левитан корхтась: «Перестало биться сердце гениального Иосифа Виссарионовича Сталина»,—кода тяни мяляфтса. Ломаттне сельведьботмосот, клубса марьти аш коза прамс, ламонцне ульцяса ащесть.

Покодсь колхозса аказевок, ванондсь алашатнень мельге, а альняказе, кода азыне ни, войнасоль. Войнаста сась, мзярда тядязе шавовсь, сисем кизот служась. Алязе войнаста сась костыль лангса, кизошка ащесь кудса, тага меки сявозь. Москуса ванць пякстафнень мельге, конат атцесть калгода кит. Эста нинге ошева асфальт ашель. Ся пингста мон ни оцю алякс покодень колхозса: инзань, сокань, лядень и лия тефт тиендень.

Войнась мольсь… Махоркавок эрявсь озафтомс государствати, солдаттненди пухадемат кучсемат. Саранскяйса конашкаль махоркань фабрикась! Мяляфтса, Молотовскяи сявомазь, арьсян, мезе шта тоса тиихть: вальмятнень инголе оцю мархт, мархт. Тя, кле, махоркань ноляй заводсь.

Аватнень сявондезь торфонь таргама, тылу окопонь шувома, вирень керома, да и кодама аньцек тевс ашезь сявонде, алятне вдь войнасот... Тя тяни шабатне синць вешендихть, коза поступамс, а инголи цёранятнень вихца кучселезь ФЗО-в (фабрично-заводской тонафнемань школав). Тоса щатядязь-карятядязь, эряфттядязь—аньцек тонафнек. Азк, шофёркс ёрат улемс—шофёркс тонафттядязь, азк, каменщикокс—тявок пара. А цёранятнень аш мяльсна молемс, вихца кунцесазь, сят авардихть.

1955 кизоня сявомазь армияв. Саранскяйста кучемазь Латвияв, Неман ляйть ваксса ётаськ «од боецонь курсть». Лятфтаса, коза аф ванат—срафтф-калафтф кутт, тапаф сетть, сембе вастова войнать катф пильгокинза.

Ковда меле сявомазь Польшав. Васенда улень огневикокс артиллерияса, а тоса шофёркс ётафтомазь. Служань колма пяле мархта киза. Армияста сань—рьвяянь, сисем кизот шофёркс покодень. Сяльде, 1968 кизоня, аделайне мешень перень азоркс тонафнемазень. Ушедонь работама тяни ни профессиязень коряс, станяк колхозса.

Сембода лама нужада няеме, мзярда тядязе кулось. Мзяра вачаши кирдеме, мзяра галошста якаме… Сянкса и брадневок ранакиге кулость. Тячиень эряфсь, уноконяй, войнань пингть ваксста—рай. Тяни ули мезьса куттнень явафтомс, сире пакарьхнень эждемс. А инголи куд кучкаса пянакутт, эздост стенанек-поталаконек равчт, бабацень мархта кирпицьса крксеськ. Ушнеме кизякса и пенгаса, а эздост пуль и качам. Ранакиге, аф кенери варьхмодемска, уштсаськ пянакудть, и мянь омбоце шобдавас ащекшнек кельмоса.

Тядязень куломдонза меле алязе сявсь лия рьвя. Мяляфтса, сань армияста, Васькась, браткязе, пирьфса кудняса утци. Ёмла сон нинге ульсь, кивок лангозонза пяк мяльге афи шарфнесь, од тядясь кали кармай тянь колга арьсема.  Тя кудняса симихть, таргайхть, и Васьказе тоса ащи.

Рьвяянь, 1959 кизоня шачсь Наташась, тядязень лемонц максоськ. Эряме васенда ёмла, калдаз лаца кудняса. Сяльде 1962 кизонь 5 декабрьста (кода тяни мяляфтса, Конституциянь шиста) путоськ од кудть. Бабаце Володянди пекиель. Кемголмува кизода меле Славась шачсь, а кафтошка шида меле алязе кулось.

Пингсь мольсь. Бабаце учётчицаль колхозса, мон мешень ваныкс покодень. Пикссемазь весть, мяляфтса. Аляцти кафксошка ков ульсь.  Торбеюста правленияста сань алашаса, ве ни ульсь. Кодама-бди ирецтот повсть каршезон и аш мезенксонга пикссемазь.

Мяляфтса, 50-це кизотнень велетненди пачфтсть радио. Столбатнень пряста провотт нюрьгсть, ащесь громкоговоритель. Васенцесь ульсь школать и лавкать инголе. «Лапшават» теест мярьгондсть. Эрь шобдаваня кота частста велеть келес кайгозеви Советскяй Союзонь Гимнась.  А фкя шобдаваня лисень учань вятема, маряса: «Динь-донь, динь-донь». Эводень, афоли, война тага ушедсь. Эста вчёк Хрущев ульсь, фалу Америкать мархта ашесть латце. А тоса кульса: «Корхтай Москусь! Васенце ломанць масторлангса лийкстась космосу!» Тя ульсь оцю кенярдема сембе Советскяй Союзти.

Перет велеса шувондоме и путнеме марса. Мзяра ломаньда, сняра пере и путтама. Ня тефненди эрявсь мумс пинге. Шиньберьф и мянь илядти сембе работасть колхозса. Кодамовок зарплата ашель—«трудонь ши» лангс покодеме, коряваст коста максыхть аф лама сёроня, а коста аф максыхть мезевок.  Ярхцамбялькс ульсь аньцек модамарьсь. Сявок эрявсь максомс государствати...»

Атязе кулось кафта кизода инголе, теенза ульсь 84 киза. Мяляфтса, бабазе най корхнель тейне: «Оксана стирняй, вешть тяфтама мирде, кода тонь атяце, эста эряфце ули павазу». Эста ёмлалень нинге, лама мезе ашень шарьхкотькшне, а тяни кармань шарьхкодемост бабазень валонзон смузьснон. Вдь тяшкава седи ваксста, лямбоста ули кода корхтамс аньцек ся ломанть колга, конань маласа эряфонь эрь шись питни.

Фалу лятфнеса атязень щаф мешнень эзда аралай сеткань вазьняса. Фталуце перенясонк целай мешвеленя пуроптсь. Атязе сембе эряфонц ётафтозе  медень канды ня ялганзон мархта. Тяни тевонц поладозь тядязе и алязе. Сон фалу эсост тонафтсь, мезе и кода тиема, а синь, кода смузю ученикт, кулхцондсть эсонза. Миньге дуганозень мархта лезнеме, ваноме мешвелетнень мельге. Кда пувозсь лиси, эряскоттама азомс латта. И вдь вестевок сонь ашезь пупсе. Пси-мани шиня якаль ётковаст ёфси аф пелезь. Августста кудоньке фалу пяшксель медь мархта флягада.

Атязе ёфси ашезь машта тевфтома ащема. Мекольце кизотнень работась  колхозса ваныкс. Тяни ни сисем кизот, кода колхозть сёлгозь. Но ламос теенза ваймамс ашезь сав. Сяка недяляня велень озксвятиеньке тердезе церькавонь  ферматнень ванома. Алязе кошярязе: «Ащек кудса, ваймак». А сон аф ащеви.

Ёмласта брадозень мархта фалу улеме маласонза: тядязень коль тевонза, а бабазе ашезь якав. Тутама атязень мархта эрьхконять ваксс. Тоса уендсть яксяркт, эсост аннеме. Эрьхконять эзда аф ичкозе строясть од церькавоньконь эса. Тоса фалу ламоль рабочайда. Суватама потмоти, ваттама, кода покодихть. Атязе фалу азондсь тейнек эсь арьсеф ёфксонзон эса. Мес-бди мархтонза ётафтф идькс пингсь сембода пяк мяляфтови.

         О. Белкина.