Поиск по сайту: 
 

Архив
 июль 
 2022 
пн вт ср чт пт сб вс
    123
45678910
11121314151617
18192021222324
25262728293031

 
 

 

Наши мокшанские сыновья и дочери

СЕМБЕ ЭРЯФОНЦ ЛЕМДЕЗЕ ЗАКОНТИ И ЭСЬ НАРОДОНЦТЫ СЛУЖАМАТИ

Атюрьевскяй райононь Кяшал велеста лиссь лама содаф ломаньда. Нят А.С.Малькин, А.А.Аверясов, А.И.Карьгин, Ф.С.Руськин, И.Ф.Алямкин, П.Т.Мустайкин и ламотне лиятне. Гордостекс и прянь шнафтома вастокс ащи велеса, районца, республикаса Ф.П.Девятаев, Мордовия Республикань Заслуженнай юристсь, МР-нь юстициянь ингольдень министрсь, МР-ть эзга Российскяй Федерациянь Юстициянь министерствать управлениянц ингольдень начальникоц. Сембе эряфоц Фёдор Павловичень сотовсь законти и эсь народонцты служамать мархта. А конашкава кельгсы мокшалясь эсь шачема-касома веленц, Атерень аймакть. Тяза сон сашенды пяк сидеста. И ашель вестевок стане, штоба афоль васьфте, седикс-ваймокс афоль корхне велеряензон мархта. Фёдор Павловичень мархта васьфтемась фалу оцю праздник Кяшалонь эряйхненди. Сон кулхцондсы эрь ломанть, максы эрявикс совет, вийс коре старандай лездомс.

 

Ф.П.Девятаев шачсь 1957 кизонь 1 майста Атюрьевскяй райононь Кяшал велеса. Колма кизонянзольхть, мзярда кулось тядяц, Александра Егоровна. Аляц, Павел Фёдорович, семботь тиезе сянкса, штоба касфтомс цёранц трудонь кельгикс, сталмода аф пеликс. Фёдор ёмластокиге ульсь сембоса примеркс ялга ёткса, школаса. Лезнесь алянцты кудонь тевса: трудендась переса, якась жувата мельге. И сембе тефнень тиендезень оцю ломанькс, маштозь. Мельганза ашезь сашендов аф петнемс, аф одукс мезевок тиемс. Тонафнемасовок цебярь примероль лиятненди. Апак аноклак, кудонь тевонь апак тик вестевок ашезь сашенда школав. Сидеста якась районнай предметнай олимпиадас. И вестевок казнефтома ашезь лядонда.

Кафкса класснень аделамда меле Девятаевонь пяк мялецоль молемс тонафнема Нахимовскяй училищав. Эсь мяленц колга пачфтсь алянцты, Павел Фёдоровиченди. Смузю мокшалясь арьсесь-тись и сась мяльс, што рана нинге цёранцты кадомс родителень кудть. Тиемс аш мезе, Федя поладозе школаса тонафнеманц сяда тов.

Средняй школать аделамда меле Фёдор Девятаев тусь тонафнема Коми Республикань Печора ошень речной флотонь училищав. Тоса служась армияса Уральскяй гарнизоттнень эса. И тясовок няфтезе прянц аньцек цебярь ширде. Боевой и политическяй подготовкань отличниколь. Цебярь службанкса казьфоль аф фкя казнеса. Кепотьксонди, училищаса тонафнемста, кода инь цебярь курсантонь мархта, командованиясь тись фотография Сяськомань Знамять ваксса. Тя ульсь 1975 кизоня. Эста топодсь 30 киза, кода сяськфоль фашистскяй Германиясь. Тя историясь тянемс мялямсонза.

Службада меле Фёдор Павлович мрдась Кяшал вели. Но аф ламос. Мялецоль козякофнемс содамошинзон сяда тов—поступамс тонафнема Н.П.Огарёвонь лемса Мордовскяй госуниверситетонь юридическяй факультету. Эста факультетсь тиендезень эсь васенце аськолксонзон. Васенда поступась подготовительнай отделенияв, тоса ушедсь тонафнема юридическяй факультетса. Васенце курста меле Фёдор Павлович рьвяясь. Рьвянди эстеенза кочказе шабра Степановка велень шнама стирнять Елизавета Емельяновать, конань мархта ялгафнесть нинге школаса тонафнемста. Стирсь учезе сонь армиястовок.

Ф.П.Девятаев ся ломаттнень эзда, конат надияйхть аньцек эсь лангозост. Семьянцка старандась трямс, щамс-карямс сонць, лиянь лезксонь апак учсек. Аф тёждяста сатневсь эрь цалковайнясь, мзяра савсь шамдомс вагон, тиемс лия стака тев. Но студентсь, кельгома мирдсь, а тоса од алясь, вестевок ашезень ноля кядензон, ашезь пеняцякшне эсь эряфонц лангс. Фалу кеподень прят аськолясь инголи, аф пелезь сяськондезень сембе стакатнень-сталмотнень. А синь ульсть. Ёню, пяк ответственнай, дисциплинань кельги студентсь ашель кода аф приметамс. Ветеце курсса  сонь тердезь покодема Мордовскяй АССР-нь Верховнай Советонь Президиуму старшай юрист-консультантокс. Пинге арьсекшнемс ашель. Тевсь пяк важнаель, ответственнаель, вешсь лама содамошида. Фёдор Павлович согласиндась. И 1983 кизоста сявомок 1990 кизоти молемс трудендась тя вастса. Тя ульсь сонь эряфсонза пяк интереснай и мзярдовок аф юкстави пинге, кона пяк козяль мяляфтови событияса.

Верховнай Советонь Президиумста Ф.П.Девятаев ётась покодема республиканскяй прокуратурав. Эсь сельмосонза няезе, конашкава стака, ответственнай прокуроронь работась. И тясовок няфтезе прянц грамотнай, тевонь содай специалистокс. ульсь кинь лангста сявомс пример. Прокуратураса покодсть оцю авторитет, козя опыт мархта ломатть. Вете кизот трудендась прокуратураса. А тоса Мордовия Республикань Государственнай Собраниять сессияса депутаттне кочказь юстициянь министркс. Тя ульсь 1995 кизонь октябрьста. Пингсь эста аф сетьмоль. Примсевсь лама аф фкя лацонь решенияда. Юстициянь министрти эрявсь кирдемс мяльса пингть вешфксонзон. Фёдор Павлович фалу ащесь видешить, закононь аф колсемать инкса. Тиендезе эсь тевонц совестьс коре и мзярдовок ашезь арьсекшне аф казнетнень, аф званиятнень колга. Синь мокшалять мушендозь синць. Кизода меле Российскяй Федерациянь Президентть Указонц мархта теенза максфоль колмоце классонь юстициянь советниконь государственнай чин.

Сембе товолдонь эряфонц Фёдор Павлович ётафтозе юстициянь министерстваса, кона полафнезе эсь лемонц. Аньцек тефне и вешфксне лядондсть сякотне—служамс законти, республикань эряйхненди.

Ф.П.Девятаев коса ашезь труденда-покоде, кодама оцю должностть ашезь сатне, сон вестевок ашезе юксне эсь шачема-касома уженянц. Кирдсь и тянивок кирди кеме соткст Атерень аймакть мархта. Сидеста сашенды вели, васьфни велеряензон и содафонзон мархта. Аф юкснесазь и земляконза, сидеста варчсесазь Саранскяйса улемстост. Аф ваномок эсь чинонц, должностенц лангс, Фёдор Павлович фалу ульсь малакс простой ломаттненди, панжада седи ломанькс. Кие афоль гайфте, велень Советонь оцюня или простой механизатор, ашель вестевок стане, штоба афоль отвеча. Фёдор Павловичень кенкшенза и седиец панжадот сембонди.

Монць Фёдор Павловичень содаса колмогемоньда лама киза. Кодама кизефкс, эняльдема мархта ашень сашенда юстициянь министрти, апак кулхцонтт, лезксфтома, эрявикс советфтома вестевок ширденза ашень тушенда.

А конашкава цебярьста Ф.П.Девятаев содасы эсь шачема краенц историянц. Сонь пичефтьсы сембось, мезсь сотф родинанц мархта. Фёдор Павлович кирди кеме соткст Мордовиянь учёнайхнень, археолокнень мархта. Сидеста уленди музейхнень, архифнень эса. Сяка жа Степановка велеса лама археологическяй памятникта. Синь улихть и Шала велеса. Сидеста ня васттнень эса улендсь содаф учёнайсь И.М.Петербургскяй. Куломдонза мелевок сашендсть археолокт. Синь Степановкав, Шалав усксезень сонць Фёдор Павлович. Вешендсь эряма васта теест, мушендсь ломатть, конат лац содазь ня васттнень, сембоса лезнесть. Кой-кона тефнень тиендезень Девятаев эсь ярмаконзон лангс. Сон мезевок ашезь ужяльне сянкса, штоба ня археологическяй памятникненди максоволь афкуксонь питне, цебярьста тонафневольхть, синь колгаст сяда лама содаль касы поколениясь.

Лама мялень салай, пяк интереснай материалда кочкась Ф.П.Девятаев и эсь шачема-касома Кяшал веленц колга. Юстициянь министркс улемстонза сембе ёткшинзон-недляшинзон ётафнезень архивса. Марясь оцю гордость эсь веленц и велеряензон инкса. Тянь квалма фалу корхни, азонкшни Кяшалса улемстонза.

Кяшал велесь касфтсь лама талантливай ломаньда. Марнек республикаса содаф А.С.Малькинонь лемоц. Фёдор Павлович старандай сашендомс эрь Малькинскяй лувоматненди. А кда кодамовок туфталонь сюнеда аф сави, сяка лезды синь анокламасост-ётафтомасост.

Кяшалонь школаса ули А.С.Малькинонди лятфнемань плита, конань тиезе Москувонь скульпторсь П.Офта (Добаев) Ф.П.Девятаевонь лезксонц вельде. Кона тевть тяк лятфта, ули мокшалять лезксоц, путксоц. Тя корхтай шачема ширети пяк оцю кельгомать колга. Тяфтамкс и лядонтт, Фёдор Павлович!

1 майста Ф.П.Девятаевонь ульсь шачема шиц—юбилеец. «Мокшень правдань» коллективсь поздравляндасы сонь иланц мархта. Арьси теенза кемодонга кеме шумбраши, паваз, эряфонь кувака и такор ки.

Илья ВЕШКИН,

 

Россиянь Писателень

 

союзонь член.

 

 


05.05.2022 №17
 
 
 

 
НОВОСТИ
 

МОРДОВИЯСА ЛОТКАФТФ МАСКАНЬ КАННЕМАНЬ РЕЖИМСЬ

09.06.2022  № 22
 

НАЦПРОЕКТТНЕНЬ—ЭРЯФС!

Мордовиянь Правительствась сяда тов мольфтьсы работать национальнай проекттнень эряфс ётафтоманкса, конатненди ки макссь странань Президентсь Владимир Путин. Республикань Оцюнять ширеса совещанияса корхтафоль основной федеральнай и республиканскяй программатнень эряфс ётафтомаснон колга. Мольфтеви работать квалма азондсть вице-премьерсь Игорь Чадов, МР-нь строительствань и архитектурань министрсь Алексей Гришакин, МР-нь транспортть и дорожнай хозяйствать коряс Госкомитетть председателец Валерий Кандрин, МР-нь велень хозяйствань и продовольствиянь министрсь Александр Кечайкин, МР-нь вирень, охотничьяй хозяйствань и природопользованиянь министрсь Алексей Ларькин.

 

Мордовиянь Оцюнясь путсь задача кирдемс кеме контроль ала строямань графикнень пяшкотькшнемаснон. Васендакиге корхтамась мольфтевсь социальнай инфраструктурань объекттнень колга. Тяфта, ванфтольхть кизефксне, конат сотфт Саранскяйса Кировонь ульцяса 250 вастонди идень садть и Тавлинскяй набережнайса 1450 вастонди школать строямаснон шумордамасна.

 

09.06.2022  № 22
 

ЁТАФТОВСЬ АНТИКРИЗИСНАЙ ШТАБТЬ ЗАСЕДАНИЯЦ

2 июньцта Мордовияса ётафтовсь экономикать ширенц кирдеманц и кемошинц ванфтоманц коряс антикризиснай штабть заседанияц, коса ванондовсть республикаса уликс тефне. Азфоль, што Россиянь Правительствась сяда тов мольфти работа санкциятнень эзда экономикать араламанц коряс законодательнай базань тиеманкса. Региоттнень ширень кирдемасна и синь финансовай кемошиснон кемокстамасна—главнай направлениятнень эзда фкясь. Путф подпись РФ-нь Правительствать постановлениянц алу, кона максси возможность кирьфнемс пандоматнень бюджетнай кредиттнень коряс, конат сявфт дефицитть пяшкодеманкса.

 

Майста нолдаф тевс важнай продукциянь импортёрхнень специальнай льготнай кредитованиянь программасна. Тянкса федеральнай бюджетста нолдаф 37 миллиардта лама цалковай. Тяфтама ширень кирдемать сюнеда бизнести ули кода меки  ладямс товаронь рамсемать, конат мзярс аф нолявихть Россиять территорияса, и сяда тов мольфтемс сембе пингонь работать.
 

09.06.2022  № 22
 
 

Одкстоптови общественнай транспортсь

28 майста Саранскяйса Советскяй площадьса Мордовиянь Оцюнясь Артём Здунов ванозень пассажирскяй од автобуснень, конат работайхть газса. Мордовияти тя общественнай од видонь транспорт, кона арьсекшневи нолдамс тевс республикань транспортнай предприятиятнень подвижнай составснон одкстоптоманкса.

Автобусонь ноляйхне няфтезь средняй и оцю классонь техникать. Артём Здунов ванозень автобуснень эса тяниень пингонь салонть и водителень кабинаса оборудованиять.

«Газса работай техникась сяда ванфтсы экологиять и аф веши оцю карьхцьт. Тяфтама транспортть эвондамац максы инфраструктурати касома-виияма—ков сяда лама тяфтама видонь транспортта, тов сяда лама кармай заправочнай станцияда. Тянь мельге сай пингсь»,—китькстазе Мордовиянь Оцюнясь.

Сембе автобусне стане жа тифт усксемс физическяй ширде ограниченнай возможность мархта ломаттнень. Тяниень пингть Саранск ошса ули автомобильнай газонаполнительнай компрессорнай фкя станция.

02.06.2022  № 21
 

Ревакцинация COVID-ть эзда эряви ётамс сембонди

Мордовиянь Оцюнять Артём Здуновонь председательстванц ала 27 майста ётафтовсь Мордовияса коронавируснай инфекциять инголдаманц и келемоманцты кить персеманц коряс оперативнай штабть заседанияц.

Отмечафоль, регионца ванфтови ковидса одс сярядихнень лувксснон киремац—ётай недялять тя ульсь 30 ломань шити.

«Эряви сяда тов мольфтемс ломаттнень вакцинацияснон и ревакцинацияснон коряс работать. Тянь мельге ванома кода муниципальнай образованиянь оцюнятненди, стане и предприятиянь и бизнес-структурань руководительхненди. Тяниень пингть ётафтовихть ЕГЭ-тне, сяс инфекцияда инголдамань мератненди эряви шарфнемс башка мяль»,—мярьгсь региононь руководительсь.

МР-нь Правительствать Председателенц заместителец Галина Лотванова азозе, што республикань медицинскяй учреждениянь стационархненди тона недялять эрь шиня пачфневсь 20 малава ломань. Сёлкф нинге 50 ковиднай койка-вастсь, стационарса пчкси 203 ломань, конатнень эзда пялесна—60+ кизосот.

02.06.2022  № 21
 

Экономикать виияфтоманцты—башка мяль

Мордовиянь Оцюнясь Артём Здунов 27 майста ётафтозе республикань экономикать ширень кирдеманц и кемошинц ванфтоманц коряс антикризиснай штабть заседаниянц.
Региононь руководительсь мярьгсь, што Россиянь Правительствась сяда тов примси решеният, конат эрявкснихть тячиень аф тёждя пингть экономикать работанц лац ладяманцты.
 
«Васенце очередень тевонь мольфтемань федеральнай планти сувафтф нинге 23 кизефкс. Фалу эвондакшнихть од механизмат, од возможностть. Тейнек эряви синь сяда лац нолямс тевс,—мярьгсь Артём Здунов.—Кепотьксонди, Россиянь Правительствась дополнительнайста нолдай 3 миллиартт цалковай региоттнень эса спортивнай инфраструктурать виияфтоманкса. Эряви кенеремс тиемс заявка ня программатненди и получамс финансирования».

Тяфта жа арьсекшневихть отечественнай программнай обеспечениянь ширень кирдемань од механизмат. Республикань цифровой виияфтомань министерствати и региональнай IT-компаниятненди мярькф активнайста примсемс участия ня процесснень эса.

02.06.2022  № 21
 
 

Артём Здунов встретился с многодетными семьями

Глава Мордовии Артём Здунов провел встречу с многодетными семьями республики – её приурочили к Международному дню защиты детей.

Встреча состоялась в Доме Республики в теплой, почти семейной обстановке, за чашкой чая. В ней участвовали вице-премьер Галина Лотванова и министр социальной защиты, труда и занятости населения РМ Игорь Князьков.

«Я хочу от всей души поблагодарить всех многодетных родителей за ваш нелегкий труд, достойный глубокого уважения и общественного признания, - сказал Артём Здунов. – Вы взяли на себя большую ответственность. Понимаю, сколько дел в большой семье, какая у вас загруженность, но прошу вас, чтобы за этими делами вы не забывали разговаривать со своими детьми. Обсуждайте с ними, что происходит в мире, что было много лет назад. Нам важно, чтобы дети выросли настоящими людьми, чтобы любили свою семью и свою Родину. Это наша с вами общая задача. Вы выполнили и перевыполнили свою демографическую программу, спасибо вам за это, теперь дело за нами».

В Мордовии около 8 тысяч многодетных семей, в которых воспитываются более 25 тысяч детей.

25 мая Президент России Владимир Путин на заседании президиума Государственного Совета, посвящённого вопросам социальной поддержки, подчеркнул, что многодетная семья должна быть ценностным ориентиром для всего общества и поддерживаться государством. Президентом поставлена задача сделать всю систему поддержки семьи целостной, последовательной, понятной и эффективной.
02.06.2022
 

 

 

Яндекс.Метрика Яндекс цитирования Rambler's Top100
Учредительхие:
Главнай редакторсь: И. С. Лушкин