ИДЬКС ПИНГСНОН НЕЛЬГОЗЕ ВОЙНАСЬ

Инсарскяй райононь Навлей велеса эряйхть-ащихть Николай Иванович и Раиса Андрияновна Шичкиттне. Синь касфтсть 6 итть: кафта стирьхть и ниле цёрат. Эряфоньберьф полатне покодсть колхозса. Тячи кафцьконди ни кафксогемоньда лама киза. Шумбрашисна лафчемсь, кой-коста мялямтьке лангс пеняцяйхть, кле, юкснесаськ, мезе исяк ульсь. А вов сянь, кода ётась идькс пингсна, мяляфтсазь тячемс, хуш ётась ни лама киза. Кали юкстави сон, вдь идень кизосна мирттнень-рьвятнень прасть войнань стакадонга стака кизотненди.…

—Алязень, ужяленди, шамаска аф содаса, фотокарточкац фкявок ашезь ванфтов. Тядязти, Любовь Ивановнанди, савсь ськамонза кеподемс ниле иттнень. Войнать ушедоманц аф мяляфтса, сянкса сяда товолдонь шитне лядсть мялямозон—аф нардавихть. Велеса азорондась вачашись. Минь, шабатне, касоме тише лангса. Порендеме кутюда, почкта, умбравда. Мзярда кенерькшнесть кстыхне, нормальхне да панкне, арсесь сяда тёждя. Топафнеськ пеконьконь. Нинге яксеме пяше лопань кочксема. Эздост тядяньке пицесть-панцесть кши.  Ялгань келеса кизонда яксеме паксяв сёра прянкса, а сёксенда, мзярда ни ушеткшнесть якшапне, кочксеме перетнень-паксятнень ланга эи модамарьхть. Тяфта тряме пря. Пяк лама сашендовсь покодемс и аватненди, и шабатнендивок. Кодак аньцек кядьсонк эвондакшнесь вийня, кучсемазь тишень урядама, тише капань марама. Сисем кизоса ни арань постуфокс—ванондонь учань стадат. Тядязе марса лия аватнень мархта яксекшнесь машина кинь станцияв—Хованщинав. Тя комозьшка вайгяльбе веленьконь эзда. Тоза лафтубрясост кандыхть сёра мархта кяскафт, меки—сёронь видьмот и сал.

Веленьке хуш и ичкозель фронтть эзда, сембе сяка, кой-коста вельхкссонк ветемба лиендсть самолёттне. Тейнек максфтольхть указаният: аньцек кулезеви самолётонь рнамась, эстокиге эрявсь мезьсовок паннемс-кяшендемс вальмятнень, штоба афоль няев тол валдсь. Аф кенерьхтяда—сязьсазь кудонтень…

Стакаль идькс пингоньке, мезе тяни корхтамс. Тяниень шабатненди, павазонди, аф шарьхкодеви, мезе стамсь вачашись. Аф содасазь синь, конашкава танцти розень почфста паньф кши сускомнясь.

Николай Ивановичень сельмованфоц азондомста лоткась фкя вастти. Сон бта тага няезе ся акша пря, паймошкотф пеке Коля цёранять. Няезе, и летькомсть сельмонза. Мзяра стака-сталма прась эста ломаттнень лангс, но синь семботь кирдезь.

аиса Андрияновна Шичкинати войнать ушедомста ульсь аньцек сисем кофт. Сон, шарьхкотьф, аф мяляфтсыне ся толу кизотнень. Мяляфтсы аньцек сянь, мезе азондсь тядяц. Сонцень васенце лятфнеманза войнада мельденнет ни. Да и эстовок эряфсь аф тёждяль.

—Тядязе, Прасковья Ивановна Кильмяшкина, войнада ингольдень кизотнень мирденц, Андриян Степановичень мархта тушендсть эряма Казахстану, Алма-Ата ошу. Эста шачфоль ни Нюра аказе. Мзярда ушедсь войнась, алязень сявозь фронту. Тядязе лядсь кафта атнай шаба мархта. Эрясь, кода маштсь. Кшинь нормать, конань       макссезь семьяньконди, оцюшканц мишендезе, эстейнек кадондсь аньцяй печфкат. 1942 кизонь февральста алязе шавовсь. Мезе тиема, кода эряма… Мордовияста сафне срхкасть мрдамс  шачема ширезост. Срхкась мархтост тядязевок. 

Войнань и войнада мельдень кизотнень эряфсь аф тёждяль. Сембе стака тефне прасть аватнень и шабатнень лангс. Эста пяк ламоль врьгазда. Синь апак пельхть  сашенкшнесть велетненди. Учатнень сашендовсь ванфтомс аш ни кода. Тядязе—осалня, серес аф оцю од авась, покодсь тяфтама ванфтыкс. Колхознай учань кирдема васттне кодафтольхть илиста и ватьфтольхть сёвоньца. Вальмянясна мезьсовок ашесть сёлгондов. И вов тядязе веньгучкать ащекшнесь кардса, кядьсонза байдеколь и ванондсь.  Весть сякокс лиссь зиян. Повсесь врьгазсь мзяра-бди уча. Аварди тядязе, миньге Нюра аказень мархта урокоттама—сась пеньке, пякстасазь тядяньконь тюрьмав. Но пара ломаттне ашемазь када, якафтозь тевть. Максоськ повафнень вастс минцень учаньконь.

Ярмак колхозса работаманкса кивок ашезь панне—аньцек трудодетть.  Коряваст сёксенда сёроня явондсть. А коста сявомс ярмак, кда аш зарплата? Лезнель кудонь хозяйствась. Парной лофцть таньфонц эста минь ашеськ сотце, симондеме обратта. А кочкаф вайвелескять эзда пихнельхть вайня и каннелезь мишендемс Инсаронь базару. Тядязе тя тевть куломшка ашезе кельгонде. Кле, лихтьсак вайняцень, ошеряйхне ётайхть—сурса варжасась и «тьфу» тюхадихть. Аф цебярь, няк. Сон идензон кургста тя вайнять таргазе, штоба налокнень пандоманкса ярмаконя добувамс, а синь тюхиихть. Тяфта жа базару каннефтольхть алхневок, мичксь и боранонь сивольнясь. Минць ярхцсекшнеме модамарень кшида. Коса модамарьсь—крахмалонь лихтемда меле лятф пувордафкст. Тяфтама кшись аньцек пидефста танцти. А ши ётазь кургс сявомска афоль кондясте—срадоль, вдь почф эсонза пцтай ашель. Кинь сяда ламоль «кургтост» кудса, ярхцсесть пяше лопань и марожень кшида.

Кизонда аватне покодсть паксяса, касфнесть фронту кши. Эста хуш и ульсь стака, но ломаттне кода-бди сяда весялатольхть. Ванат, аватне келесост молихть ичкоздень паксяти лядема, а синць морайхть и кувака мокшень морот, и рузоннет. Ётксост ульсь пяк цебярь явсиня, киньге калмамста сонь най тернелезь. Аватне эняльгодыхть—явсек. Ся ушедсы. Сембе авартькшнихть топодемс, ароптсазь ваймоснон и тага кярьмодихть тевс. А тяни, няк, сембе вастоньке ули: эрятама лямбе, валда кудса, ведсь кранцта шуди, пеконьке топодьстот, лангоньке щафт-каряфт, а кеняртькшнема аф машттама. Моротненьге сембонь юкстаськ…

И.ФАДЕЕВА.