Поиск по сайту: 
 

Архив
 март 
 2024 
пн вт ср чт пт сб вс
    123
45678910
11121314151617
18192021222324
25262728293031

 
 

 

Зубово-Полянскяй райононь оцюнясь В.А.Поршин:«Эрь тевсонк васенце вастса ащи ломанць!»

Зубова Полянась васенцеда лятфневи 1680 кизоста сявомок Керенскяй засечнай чертань служилай ломаттнень Зубофнень фамилияснон коряс, синь тя ширеса азорхтольхть. Лемть омбоце пяльксоц пачфни, што тяса кужель, вирьса шуфттнень эзда ароптф вастоль. Сире пинкнень тияк ётнесть Шацк-Спасск алашань кись, Зубова Полянань почтовай станциясь. Машина кить строямста посёлкась вишкста кассь. Тяниень пингть Зубово-Полянскяй районца улихть оцю предприятият, конат лезнихть виияфнемс марнек Мордовиять экономиканц. Кепотьксонди, «Плайтерра» фанерань нолдай компаниясь и Вышинскяй деревообрабатывающай комбинатсь. Лама киза Зубова Поляна посёлкаса ноляй электроннай оборудования «Радиодеталь» заводсь. Оцю тефт тиендихть наказамань ётамань учреждениятне. Пцтай эрть эса улихть стамань цехт, шуфтонь и металлонь обработкать коряс производства. Аф кржа рабочай васта максси «Талина» компаниясь, кона мольфти районца аграрнай бизнес. Инголи моли технология мархта ня предприятиятне сявондихть работама сембе ширде аноклаф, квалифицированнай ломатть, сянкса зарплатавок пандыхть цебярь.

Корреспондентоньке аф кунара васьфнесь Зубово-Полянскяй райононь оцюнять Владислав Алексеевич Поршинонь мархта и кизефнезе, кода Мордовиянь инь оцю районца ётафневихть эряфс национальнай проекттне
 

—Примсетяма участия национальнай сембе проекттнень эса, конат ётафневихть эряфс республикасонк,—мярьгсь Владислав Алексеевич.—Оцю мяль шарфнетяма «Демография» национальнай проектти. Сидеста велень идень саттнень эса аф сатнихть васттне, сяс шабатненди сашендови ламос учсемс эсь очередьснон. Тядде райцентраса Черемушки микрорайонца панжевсь идень од сад. 90 вастонди тяниень пингонь дошкольнай учреждениять вельде тейнек ули кода примамс сяда лама шаба.

«Образование» национальнай проектть мяльса кирдезь меля оцюста петеськ средняй образованиянь 7 учреждениятнень. Тя тевонди карьхцяфоль 30 миллионда лама цалковай. Тяддевок тиеви капитальнай ремонт Явасскяй школаса.

«Ломаттнень ташта и калада эряма вастста ётафтомасна» проектть коряс меля Зубово-Полянскяй райононь Явас, Озёрный, Молочница и Сосновка посёлкатнень эса строяфоль лама квартирань 18 куд. Аварийнай эряма вастста 75 од квартирас ётась 184 ломанць. Тядде ёратама поладомс тя программать и строятама 23 од куд, коза калада и ташта куттнень эзда цебярь условияс ётай 110 семья. Од квартирань максомань объёмть коряс минь васенцетне сембе республикать эзга, а 2023 кизонди планоньке нинге сяда оцюфт—арьсетяма строямс лама квартирань 60 куд.

Миньцонк ётафневи эряфс «Комплексное развитие сельских территорий» программась. Получаф средстватнень лангс строявихть социальнай оцю объектт и сяда ёмлат, тяфтамот кода налхксемань, спортивнай, ваймосемань площадкат. Ётай кизоть тя программать видеса колма объектоньке сяськсть конкурсса, кона ётафневсь марнек республикаса. Велезем велеса строяме идень площадка Культурань од кудть каршес. Иттненди налхксема васта тифоль и Явас посёлкань микрорайонца. Тядде «Комплексное развитие сельских территорий» программать коряс, Зубова Полянаса нолдавихть эряфс нинге 2 грантт.

Меля «Минстрой России» цифровой площадкаса ломаттне макссезь эсь вайгяльснон общественнай ся территориятнень инкса, конатнень мяльсноль няемс одкстоптфста. Тяфта, миньцонк сяськсь Зубова Полянань Культурань и ваймамань парксь. Тядде сонь петеманкса нолдави пцтай 15 миллион цалковай. Сяс, арьсян, маластонь пингть парксь райцентраса полафты цебярь шири.

Социальнай сфераса аф кржа и лия проектта. Оцю мяль шарфневи Зубово-Полянскяй районца китнень цебярьгофтомаснонды. Тяса тейнек лезды «Безопасные и качественные автомобильные дороги» национальнай проектсь. 2021 кизоня тифоль Явас—Лесное—Озёрное кись. Ня посёлкатнень эса эряй аф кржа ломань, оцюшкасна работайхть УФСИН-нь системаса. Аф кунара тифоль кись и Анаево—Вадовские Селищи направлениять коряс. Ня велетневок эряйхть и вииякшнихть. Анаеваса ули велень хозяйствань оцю предприятия, кона лама киза максси рабочай вастт маластонь велетнень эса эряйхненди. Вадовскяй Селищаса эрь кизоня ётафневи «Акша Келу» оцю илась. Надиятама, тяддевок ётафтсаськ сонь пандемиянь вешфкснень мяльса кирдезь.

Федеральнай проектта башка, меля тифтольхть-петьфтольхть китне Потьминскяй, Анаевскяй, Зубово-Полянскяй поселениятнень пачк. Но улихть Зубово-Полянскяй районца и стама кит, конат кунара вешихть петема, сявомс, кепотьксонди, Пичпанда велети ардома кить. Сонь кувалмоц—30 вайгяльбеть малава. Сяс эстокиге тяфтама кувака кить тиемс аф лиси. Кочкаськ эрявикс сембе документтнень, надиятама, Мордовиянь Правительствать лезсонц вельде 2023-2024 кизотнень марнек кись одкстоптови.

Оцю мяль районцонк шарфневи «Культура» нацпроектти. Вельденза тя кизоня Велезем велеса панжевсь Культурань од кудсь. Эсь лангозонза мялень шарфты зданияса улихть библиотека, актовай зал, кружоконь ётафтоманди кабинетт. Велеземонь Культурань кудсь тякось республикаса, коса тяфтама оцю функционалсь. Тя национальнай проектсь вятеви районцонк тяддевок. Оцю ремонт тиеви Умётонь Культурань кудти. Посёлкась содаф аф аньцек Мордовияса, но и марнек Россияса. Сонь вельденза М5 кить эзга сембе ардыхне содафнихть Мордовиянь кухнять и инжиень примамань койхнень мархта.

Кунара ни веши оцю петема Зубова Поляна посёлкаса Культурань кудсь. 3000 квадратнай метрань тии объектсь строяфоль нинге 1986 кизоня, и тяда меле теенза вестевок ашезь тиендев капитальнай ремонт. Анокламе и кучеме Россиянь Культурань министерствав проект, конань коряс районнай Культурань кудти ремонтонь тиемс эрявксты 150 миллионда лама цалковай. Надиятама, маластонь кизотнень сонь сувафтсазь программати.

—Владислав Алексеевич, мезьса, койсот, Зубово-Полянскяй районть инь вии ширенза?

—Васенцесь, конешна, ломаттне—тевонь кельги, пара вайме, инжиень васьфти, эрьгав ломаттне. Тя эсь лацонь ширетнень лангс шарфни мяль эрь инжись, кона сашенды Зубунь масторозонк. Сянкса старандатама тиемс семботь, штоба ломаненьке няелезь эсь тевснон афкуксонь результатснон.

Районць моли инголи и экономикань ширде. Мордовиянь инь оцю районть эса лама вирьда, велень хозяйствань значениянь модада, лама шава площадкада инвестиционнай проектонь эряфс ётафтоманкса. Старандатама тиемс семботь районть виияфтоманкса.

Райононьке салси мяль культурно-духовнай козяшинц, туризмать ширде. Миньцонк козя и мазы перьфпяльсь. Мяльце—мольхть вири, мяльце—ваймак ляйня трваса, мяльце—сувак церькаву. Эздост Зубово-Полянскяй районца аф кржа. Эрь велеть сонцень эсь лацонь культурац и историяц.

—Спасиба, Владислав Алексеевич.

О.Белкина.


 

 
НОВОСТИ
 

МОРДОВИЯСА ЛОТКАФТФ МАСКАНЬ КАННЕМАНЬ РЕЖИМСЬ

09.06.2022  № 22
 

НАЦПРОЕКТТНЕНЬ—ЭРЯФС!

Мордовиянь Правительствась сяда тов мольфтьсы работать национальнай проекттнень эряфс ётафтоманкса, конатненди ки макссь странань Президентсь Владимир Путин. Республикань Оцюнять ширеса совещанияса корхтафоль основной федеральнай и республиканскяй программатнень эряфс ётафтомаснон колга. Мольфтеви работать квалма азондсть вице-премьерсь Игорь Чадов, МР-нь строительствань и архитектурань министрсь Алексей Гришакин, МР-нь транспортть и дорожнай хозяйствать коряс Госкомитетть председателец Валерий Кандрин, МР-нь велень хозяйствань и продовольствиянь министрсь Александр Кечайкин, МР-нь вирень, охотничьяй хозяйствань и природопользованиянь министрсь Алексей Ларькин.

 

Мордовиянь Оцюнясь путсь задача кирдемс кеме контроль ала строямань графикнень пяшкотькшнемаснон. Васендакиге корхтамась мольфтевсь социальнай инфраструктурань объекттнень колга. Тяфта, ванфтольхть кизефксне, конат сотфт Саранскяйса Кировонь ульцяса 250 вастонди идень садть и Тавлинскяй набережнайса 1450 вастонди школать строямаснон шумордамасна.

 

09.06.2022  № 22
 

ЁТАФТОВСЬ АНТИКРИЗИСНАЙ ШТАБТЬ ЗАСЕДАНИЯЦ

2 июньцта Мордовияса ётафтовсь экономикать ширенц кирдеманц и кемошинц ванфтоманц коряс антикризиснай штабть заседанияц, коса ванондовсть республикаса уликс тефне. Азфоль, што Россиянь Правительствась сяда тов мольфти работа санкциятнень эзда экономикать араламанц коряс законодательнай базань тиеманкса. Региоттнень ширень кирдемасна и синь финансовай кемошиснон кемокстамасна—главнай направлениятнень эзда фкясь. Путф подпись РФ-нь Правительствать постановлениянц алу, кона максси возможность кирьфнемс пандоматнень бюджетнай кредиттнень коряс, конат сявфт дефицитть пяшкодеманкса.

 

Майста нолдаф тевс важнай продукциянь импортёрхнень специальнай льготнай кредитованиянь программасна. Тянкса федеральнай бюджетста нолдаф 37 миллиардта лама цалковай. Тяфтама ширень кирдемать сюнеда бизнести ули кода меки  ладямс товаронь рамсемать, конат мзярс аф нолявихть Россиять территорияса, и сяда тов мольфтемс сембе пингонь работать.
 

09.06.2022  № 22
 
 

Одкстоптови общественнай транспортсь

28 майста Саранскяйса Советскяй площадьса Мордовиянь Оцюнясь Артём Здунов ванозень пассажирскяй од автобуснень, конат работайхть газса. Мордовияти тя общественнай од видонь транспорт, кона арьсекшневи нолдамс тевс республикань транспортнай предприятиятнень подвижнай составснон одкстоптоманкса.

Автобусонь ноляйхне няфтезь средняй и оцю классонь техникать. Артём Здунов ванозень автобуснень эса тяниень пингонь салонть и водителень кабинаса оборудованиять.

«Газса работай техникась сяда ванфтсы экологиять и аф веши оцю карьхцьт. Тяфтама транспортть эвондамац максы инфраструктурати касома-виияма—ков сяда лама тяфтама видонь транспортта, тов сяда лама кармай заправочнай станцияда. Тянь мельге сай пингсь»,—китькстазе Мордовиянь Оцюнясь.

Сембе автобусне стане жа тифт усксемс физическяй ширде ограниченнай возможность мархта ломаттнень. Тяниень пингть Саранск ошса ули автомобильнай газонаполнительнай компрессорнай фкя станция.

02.06.2022  № 21
 

Ревакцинация COVID-ть эзда эряви ётамс сембонди

Мордовиянь Оцюнять Артём Здуновонь председательстванц ала 27 майста ётафтовсь Мордовияса коронавируснай инфекциять инголдаманц и келемоманцты кить персеманц коряс оперативнай штабть заседанияц.

Отмечафоль, регионца ванфтови ковидса одс сярядихнень лувксснон киремац—ётай недялять тя ульсь 30 ломань шити.

«Эряви сяда тов мольфтемс ломаттнень вакцинацияснон и ревакцинацияснон коряс работать. Тянь мельге ванома кода муниципальнай образованиянь оцюнятненди, стане и предприятиянь и бизнес-структурань руководительхненди. Тяниень пингть ётафтовихть ЕГЭ-тне, сяс инфекцияда инголдамань мератненди эряви шарфнемс башка мяль»,—мярьгсь региононь руководительсь.

МР-нь Правительствать Председателенц заместителец Галина Лотванова азозе, што республикань медицинскяй учреждениянь стационархненди тона недялять эрь шиня пачфневсь 20 малава ломань. Сёлкф нинге 50 ковиднай койка-вастсь, стационарса пчкси 203 ломань, конатнень эзда пялесна—60+ кизосот.

02.06.2022  № 21
 

Экономикать виияфтоманцты—башка мяль

Мордовиянь Оцюнясь Артём Здунов 27 майста ётафтозе республикань экономикать ширень кирдеманц и кемошинц ванфтоманц коряс антикризиснай штабть заседаниянц.
Региононь руководительсь мярьгсь, што Россиянь Правительствась сяда тов примси решеният, конат эрявкснихть тячиень аф тёждя пингть экономикать работанц лац ладяманцты.
 
«Васенце очередень тевонь мольфтемань федеральнай планти сувафтф нинге 23 кизефкс. Фалу эвондакшнихть од механизмат, од возможностть. Тейнек эряви синь сяда лац нолямс тевс,—мярьгсь Артём Здунов.—Кепотьксонди, Россиянь Правительствась дополнительнайста нолдай 3 миллиартт цалковай региоттнень эса спортивнай инфраструктурать виияфтоманкса. Эряви кенеремс тиемс заявка ня программатненди и получамс финансирования».

Тяфта жа арьсекшневихть отечественнай программнай обеспечениянь ширень кирдемань од механизмат. Республикань цифровой виияфтомань министерствати и региональнай IT-компаниятненди мярькф активнайста примсемс участия ня процесснень эса.

02.06.2022  № 21
 
 

Артём Здунов встретился с многодетными семьями

Глава Мордовии Артём Здунов провел встречу с многодетными семьями республики – её приурочили к Международному дню защиты детей.

Встреча состоялась в Доме Республики в теплой, почти семейной обстановке, за чашкой чая. В ней участвовали вице-премьер Галина Лотванова и министр социальной защиты, труда и занятости населения РМ Игорь Князьков.

«Я хочу от всей души поблагодарить всех многодетных родителей за ваш нелегкий труд, достойный глубокого уважения и общественного признания, - сказал Артём Здунов. – Вы взяли на себя большую ответственность. Понимаю, сколько дел в большой семье, какая у вас загруженность, но прошу вас, чтобы за этими делами вы не забывали разговаривать со своими детьми. Обсуждайте с ними, что происходит в мире, что было много лет назад. Нам важно, чтобы дети выросли настоящими людьми, чтобы любили свою семью и свою Родину. Это наша с вами общая задача. Вы выполнили и перевыполнили свою демографическую программу, спасибо вам за это, теперь дело за нами».

В Мордовии около 8 тысяч многодетных семей, в которых воспитываются более 25 тысяч детей.

25 мая Президент России Владимир Путин на заседании президиума Государственного Совета, посвящённого вопросам социальной поддержки, подчеркнул, что многодетная семья должна быть ценностным ориентиром для всего общества и поддерживаться государством. Президентом поставлена задача сделать всю систему поддержки семьи целостной, последовательной, понятной и эффективной.
02.06.2022