Кядьса тифсонза—пефтома маштомоши и ваймонь лямбе

Шачемас коре Мария Константиновна Зубово-Полянскяй райононь Зарубкина велеста.

Шумордамок сисем кизонь школать, поступась Зубово-Полянскяй педагогическяй училищав, коса тонафнесь ваймонь путозь, сувсесь училищань ВЛКСМ-ть комитетозонза, сембе тефнень эса ульсь цебярь кепотьксокс ялганзонды. Училищать Мария Константиновна аделазе 1953 кизоня и эстокиге поступась Мордовскяй пединституту, конань реорганизациядонза меле М.К.Вишняковать ётафтозь Мордовскяй государственнай университетть филологическяй факультетозонза. Дипломонь получамда меле, а тя ульсь 1958 кизоня, тердезь работама шачема районозонза—Зубово-Полянскяй педагогическяй училищав (тяни колледж) сай пингонь учительхненди мокшень, рузонь кялень и литературань учителькс. Ули кода азомс, што эряфс ётафтовсь ся, мезень колга Мария Константиновна арьсесь ламос—сон сотозе эряфонц мокшень кяльть мархта.

Эрь шиц пяшксель виень аф ужяльдезь работамада: урокне, сочинениянь, изложениянь проверсематне, общественнай тефне, пуромксне, занятиятненди анокламатне…

Соавторхнень мархта мокшавась М.К.Вишнякова аноклась «Азбука» иттненди и тонафнемань пособия васенце классу якайхненди, сон—тонафнемань аф фкя книгань автор и соавтор.

Тя ломанть квалма, кода педагогонь колга, ули кода азондомс пяк и пяк лама. Но, тяда башка, Мария Константиновна нинге пяк асу мастерица кодай ожнаняста и сёрмады сюреса.

Кда лятфтамс Мария Константиновнань идькс пингонц, сюреса сёрмадома сон ушедсь нинге 6 класса тонафнемста—тядянц мархта кизонь кофнень сёрмадсть панар рьвакс туй стиренди. Сяда стака узорхнень сёрмадозень тядяц, тёждятнень—Мария. Ся пингста сявомок ашезь явонда сюретнень и салмоксть мархта.

И арась афкуксонь мастерицакс. Мялезонза фалу тушендсть мокшень щапне-каряпне. Кельгозь ванондозе эсь кядьса стаф, сюреса сёрматф мокшень авань панарть и тияк прясонза шарозь-шарсть мяльхне сонь сядовок мазыкс тиеманц колга.

«А кда нинге фкя узор нолдамс, поладомс—ёфси лиякс кармай няфтема»,—арьсесь сон. Но лац-ряц апак аноклак тя тевти ашезь кярьмотькшне. Книгатнень, газетатнень, журналхнень эзда крхкаста тонафнезень узорхнень и орнаменттнень. Синь мархтост работайхть кода сюреса сёрмадомста, стане и ожнаняста кодамста.

Аф кунара М.К.Вишнякова кучсь «Мокшень правдав» фотографият. Лемдезень синь «мокшень тяштенякс». 1990 кизоня, Зубово-Полянскяй педагогическяй училищаса работамстонза, сон—класснай руководительсь—группастонза стирнятнень мархта састь мяльс тиемс педучилищати казне Мордовияти 60 кизонь топодемать мяльса кирдезь. Эрь группати эрявсь мезе-бди анокламс. И вов Мария Константиновна и стирнятне кочказь мокшень сёрматкс мархта вымпелть. Узорхнень сявозь Новые Выселки велеста. Тостонь аймакса сюреса тяфтама сёрмадомати мярьгихть «нилень сюре». Узорхне ульсть пяк ташта, сязентьф-калада панарста. Тяни, Мария Константиновнань валонзон коряс, тяфтама панархт кивок аф сёрматкшни и аф сташенды. Но Зубово-Полянскяй районца лама машты кядь авада и стирьда, конат кельгсазь тя тевть и пуроптсть ни башка коллекцият.

Вымпелонь аноклайхне эста панарста кочказь инь мазы тяштенятнень и сёрмадозь синь «двойникснон». Тя казнесь тянемс ванфтови Зубово-Полянскяй педагогическяй колледжть музейсонза.

Мзярда эвондасть ожнанятне (бисер), мастерицась эстокиге шарфтсь лангозост мяль. Хуш и мархтост работамась—тевсь ёфси аф тёждя, Мария Константиновна тиезе васенце аськолксть. Сяда тов кядялдонза лиссть Анаю велень каркссь, сюлгамсь, Зарубкинань крёз мархта гайтянць, крганьберьфсь и лама мезсь лиясь. Эрь мезне сашендовсь арьсемс-смекамс, кочксемс узорть эса ряттнень, тюснень. Мокшавась эсь кядьса тиендсь шуваня пролопкаста ожнанятненди салмокст. Асушиц ашезь лядонда апак няйхть. Эсь ульцястонза, да и целайнек педучилищаста стирнятне эняльдсть тонафтомс синь аф тёждя, но эрявикс тевти. Ламотне эняльтькшнесть мастерицати тиемс мезевок заказс коре. Нльне пеетьфти случайхть улендсть.

«Сась весть шабра ульцяста эряфкшу аля и эняльди: «Тик тейне крганьберьф». Дивандань, сяс мес ашине шарьхкоде, мезенди сон теенза. Молень ширезонза и рьвац семботь азондозе. Одста, кле, мзярда васенцеда няеме фкя-фкянь, щафолень мокшавакс, и тунь мялезонза. Рьвяямдост меле марсотольхть ни нильгемонь киза. Улема, мирдец тяфта сась мяльс мрдафтомс одонь эряфснон»,—пеедезь лятфни Мария Константиновна.

Мария Константиновна, кода ни азфоль сяда вяре, пяк кельгсыне тядянь-алянь родной кяльть, мокшэрзянь литературать. Фалу морафнесы «Мокшень правдать». Кеняртькшни, мзярда мушенды мокшень щапненди-каряпненди, сюреса сёрмадомати, ожнаняста кодамати лемтьф материалхт.

Лама кемотть кизоста Мария Константиновна Вишнякова сюреса сёрмадсь, ожнаняста кодась пяк и пяк лама. Зубово-Полянскяй педагогическяй училищаса мокшавась вятсь кружок, коза оцю мяльса сюреса сёрмадома и ожнаняса кодама тонафнема сашендсть студенткатне. Ламоц работанзон явондозень, казендезень.

2022 кизось странасонк азф Россиянь нароттнень народнай искусствань и аф материальнай культурнай наследиянь кизокс. Мария Константиновна надияй: ожнаняста кодамать и сюреса сёрмадомать лангс тядде шарфтови сядовок оцю мяль. Мастерицась тя тевти тняра кизоста тонафтозень пяк и пяк ламотнень, сяс кемай, што кармайхть улема ня тефнень поладысна, сяда тов мольфтисна, а од ломаттнень ваймоса синь заняйхть башка васта.