Саранск ошень П.С.Кирилловонь лемса Краеведческяй библиотекань заведующайсь Н.М.БОЯРКИНА: «МОКШЭРЗЯНЬ КУЛЬТУРАТИ СУВСИХТЬ МОКШЕНЬ И ЭРЗЯНЬ КЯЛЬХНЕ, ЛИТЕРАТУРАСЬ, ФОЛЬКЛОРСЬ…»

—Нина Михайловна, кода содаф, тяддень кизось азф Россиянь нароттнень народнай искусствань и аф материальнай культурнай наследиянь кизокс, сяс мяленьке содамс, кодама работа тядде мольфти Саранск ошень П.С.Кирилловонь лемса краеведческяй библиотекась мокшэрзянь национальнай культурать ванфтоманкса-виияфтоманкса и сонь тевс нолямань сферанц келептеманкса?

—Тяса, васендакиге, эряви азомс: мокшэрзянь национальнай культурати сувсихть мокшэрзянь кяльхне, фольклорсь, литературась, национальнай щамбяльхне, промыслань и ремёслань паршихне. И семботь тянь библиотекасонк  минь старандатама ванфтомс-виияфтомс и келепнемс  тевс нолямань сферанц.

Тиендеви тя аф фкя лацонь мероприятиянь вельде, конат тячи библиотекасонк лувихненди ётафневихть очнай и онлайн форматса. Интернетонь ресурснень вельде мероприятияньке тяфта жа пачфневихть странань лия региоттненди, коса компактнайста эряйхть мокшэрзят. Тяфта жа, нолямок тевс интернетонь ресурснень, минь латцетяма культурань сфераса соткст Россиянь финно-угорскяй  лия нароттнень мархта.

Койсон, пяк тусь лувихнень и ваныхнень мяльс zoom-конференциясь, конань минь ётафтоськ Коми Республикань поэтть и драматургть, Россиянь Писателень союзонь членть Н.А.Обрезковать мархта. Мероприятияса, кона лемтьфоль Тядянь-алянь кялень Международнай шити, Нина Александровна лувсь стихт коми народонь и рузонь кяльса, азондсь пуромфненди поэзиянь и драматургиянь од проектонзон колга. Сон тяфта жа пачфтезень пуромфненди эсь мялензон-арьсеманзон финно-угорскяй народонь литературатнень сай пингснон колга.

Минь ширденк тя мероприятияса пуромфненди мокшэрзянь поэзиять тяниень и сай пингонц колга эсь мялензон азондозень Мордовиянь Заслуженнай поэтсь Р.К.Орлова. Сон тяфта жа лувозень пуромфненди эсь стихонзон, конат сёрматфт мокшень и рузонь кяльса.

Тяфта жа очнай и онлайн форматса минь ётафтоськ мероприятиятнень, конат лемтьфтольхть Мокшэрзянь кялень Всероссийскяй и Победань шитненди. И, конешна, тяниень пингс кочкаф тяфтама рабочай опытсь ноляви тевс мокшэрзянь писательхнень, поэттнень, драматуркнень,    артисттнень, композиторхнень юбилейснонды и творчестваснонды лемтьф мероприятиянь ётафтомста.

—Кодама мероприятият ётафтсь краеведческяй библиотекась Великай Победать лемс?

—Тядде Великай Победать лемтьф сембе мероприятияньке ётафтовсть очнай и онлайн форматса. Койсон, лац ётафтовсь «Победать вайгялец» патриотическяй акциясь. Пингстонза школатнень, колледшнень и республикань вуснень эса тонафнихне сёрмадсть-тисть видеороликт, коса синь лувозь Мордовиянь и странань лия региононь поэттнень-фронтовикнень стихснон. Тяда меле ня роликнень синь путнезь «Победань вайгяль» хештег мархта библиотеканьконь и эсь сайтозост «ВКонтакте» и лия социальнай сетьтнень эса.

Тя акциясь мольфтевсь тяддень 29 апрельста сявомок и 9 майти самс.

Тяфта жа, койсон, удалафста ётась «Сёрмат, конат сашендсть войнаста» онлайн-марафонць, коса лувихне лувозь эсь радняснон сёрмаснон, конатнень синь кучсезь фронтста куду. Тя марафонца работань монць и библиотекань сембе лия сотрудникне.

Тяфта жа минь работаме «Георгиевскяй лентаня» Всероссийскяй акцияса. Пингстонза Саранск ошень Октябрьскяй районца, коса библиотеканьке, минь явондоме ломаттненди Георгиевскяй лентанят. Кода содаф, ня лентанятне Великай Победать символоц!

Арьсян, од лувихнень мяльс тяфта жа тусть мужествань урокне, конат лемтьфтольхть Советскяй Союзонь Геройть, легендарнай лётчикть М.П.Девятаевонь и Мордовиянь лия фронтовикнень подвигснонды.

Тяда башка, минь, краеведческяй библиотекань сотрудникне, ётаме эсь радняньконь, конат воявасть Великай Отечественнай войнаса, портретснон мархта «Бессмертный полк» шествияса.

—Кодама мероприятият маластонь пингть арьсекшнетяда ётафтомс библиотекаса мокшэрзянь литературань классикнень лемс?

—Сембе мероприятияньке, конат лемтьфт мокшэрзянь литературань и культурань деятельхнень творчестваснонды, ётафневихть «Наследия» республиканскяй программать вешфксонзон коряс.

Лиякс мярьгомс, сембе ня мероприятиятнень цельсна фкя—кемокстамс соткснень тяда ингольдень и тяниень пингонь национальнай литературать и культурать ёткса. И, конешна, содафтомс синь мархтост тяниень пингонь од поколениянь ломаттнень.

Ётафтовсть литературнай васедемат «Якстерь тяштеня» идень журналть главнай редакторонц В.И.Брындинать, Мордовиянь Заслуженнай и Народнай артисттнень Галина Макшевать и Анна Атласовать, республикань Заслуженнай поэтть Геннадий Гребенцовонь и творческяй лия содаф ломаттнень мархта.

Но главнайкс тя сфераса работаньконди, койсон, тядде  арай «Вешендеда эсь Синемасонтень» лем ала литературно-музыкальнай илась. Сон лемтьф Мордовиянь Народнай поэтть И.М.Девинонь шачема шиста 100 кизонь топодеманцты.

Илась арьсекшневи ётафтомс тяддень 20 июльста, мокшэрзянь литературань классикть шачема шистонза!

Конешна, ётафтовихть лия мероприятиятка, коса минь няфтьсаськ мокшэрзянь национальнай литературать и культурать эрявиксшиснон тяниень пингонь од и эряфкшу ломаттненди.

—Удалаза арьсефонте, Нина Михайловна.

—Сюкпря!

В.Нестеров.