Поиск по сайту: 
 

Архив
 апрель 
 2024 
пн вт ср чт пт сб вс
1234567
891011121314
15161718192021
22232425262728
2930     

 
 

 

МОРДОВИЯТЬ ПРЯНЬ ШНАФТОМА ВАСТОЦ

Сюреса и ожнаняса сёрмадыть, Мордовия Республикань  культурань Заслуженнай работникть, машты кядь мокшавать  Мария Ивановна Бикеевать ламотне кунара ни лемнесазь аф аньцек Лемдяй велень, Старошайговскяй райононь, а марнек Мордовиянь «визитнай карточкакс», гордостень марямань и прянь шнафтома вастокс. И тя афкукс тяфта. Вов ни лама кемотть киза мастерицась сюреса и ожнаняса сёрмады афкуксонь шедеврат—мокшавань и мокшалянь панархт, нардамат, каркст, пряруцят… И кода тяйть шна синь валса, кодама удалаф валрисьмот тят латце колгаст кагод лангс тяштемста, сембе сяка тя мазышить няема сельмоса. Аньцек эста и шарьхкодьсак, мзяра труд, маштомоши, асу путни Мария Ивановна эрь изделиянцты.

 

«Эрь панарсь, каркссь, пряруцясь, нардамась—тя бта идь, конань ламос каннесак седицень ала, а сяльде максат теенза эряф»,—вов кода корхни сон маштыень кядензон мархта ноляви сембе тя мазышить колга.

 

М.И.Бикеева шачсь-кассь Старошайговскяй райононь Лемдяй мокшень велень семьяса, коса ульсь лама идь. Нинге нилеце класса тонафнемста ушедсь сюреса сёрмадома. Тя тевти кельгомась ётась теенза учительницанц эзда. И ся пингста сявомок Мария Ивановна ашезь явонда салмоксть и сюретнень мархта. Тяда башка, меле кярьмодсь ожнаняста сёрмадомати. И тя тевсовок сафтозе.

 

«Инголи велеса ульсь тяфта: стирнясь нинге ёфси ёмланякс тонафтоволь сюреса сёрмадома, кодама. А лиякс кода? Мезе щаят лангозт? Мезьса лисят ялгатнень ёткс? Сят, кит ашесть уле ялгакс салмоксть мархта, лувовсть нола ломанькс»,—лятфни Мария Ивановна.

 

Касомок, арамок удалаф, эрь тевса машты сафтома мокшень стирькс, Мария лиссь рьвакс эсь велень мокшень цёранди Николай Гаврилович Бикеевонди. Лама киза М.И.Бикеева работась нормировщицакс. Мирдец машты кядь сварщиколь. Мирттне-рьвятне эрясть фкя-фкянь шарьхкодезь, ужяльдезь, лезнезь.

 

Бикеефнень шачсть сисем шабасна, эздост вететне цёрат и кафта стирьхть. Сисемксне кассть цебярь ломанькс, тяни синцень семьясна, но кельгома тядяснон аф юкснесазь, сашендыхть ширезонза, лезнихть.

 

Ужяль, Н.Г.Бикеев пингта инголе тусь эряфста, трагическяйста сязевсь эряфонь сюрекиц. Удавакс лядсь Мария Ивановна, но кядензон вестевок ашезень ноля.  Иденза и уноконза тернезь ширезост эряма, но кали кадоволь М.И.Бикеевати ёмла родинац—Лемдяйсь, коста кда и весть тушендсь сон Горький ошу работама, то ёфси аф ламос.

 

Лемдяйти кельгоманц, кода маштсь, няфтезе тя велеть колга стихотворенияса:

 

Лемдяй веленяй, лемце пяк

 

                                   мазы,

 

Колгат цебярь валхт

 

              ломаттне азыхть.

 

Лявляй ляйсь шуди

 

            Лемдяйть ланганза,

 

Оцю кись ётай Лемдяйть

 

                       фталганза…

 

Кода шарьхкодесть, мокшавась аф аньцек салмоксса, но и пераса сёрмады. Вов инь мала ломанти—тядяти лемтьф стихотворениястонза валрисьмотне:

 

Вай, аваняй-тядяняй,

 

Ляпе лямбе сединяй,

 

Седи алдот прафтомайть,

 

Мекольдень идькс

 

                    шачфтомайть.

 

Мон вдь очка нардафксан,

 

Паваз карксса карксафан.

 

Аф ваномок васьфневи стакатнень-сталмотнень лангс, мокшавась лувсы эсь прянц павазу ломанькс.  А кинь, кле, эряфса стакат-сталмот  ашельхть?

 

Лама киза ётась ся пингста, мзярда Мария Ивановна васенцеда сявозе кядезонза салмоксть и ушедсь сюреса, а сяльде и ожнаняса сёрмадома. Но тя нинге аф сембе. Мокшавась кодай вндерняса, кячкаскаса, шарьхкодьсы котфонь кодама тевть. Но шарьхкодемада и маштомошида башка, мастерицась эрь узорти путнесы ваймонь лямбонц, кой-коста несколька ве аф уды арьсемстонза.

 

Авань и алянь панархт, пряруцят, нардамат, тодулангакст, каркст и стак тов. Мария Ивановнань работанзон ули кода лемдемс пяк и пяк оцю коллекциякс, конань аф ёмла пяльксонц казезе ломаттненди. Улихть праздниконь стама щамонза, конатнень тиемста-анокламста ётафтфоль аф фкя килограмма (!) ожнаня. Арьседа тинць: аф эрти сафтови тя тевса,  а вельф асуфненди, стака трудта аф пелихненди.

 

Аф стак Мария Ивановна Бикеевать мокшень панаронза улихть марнек Россияса. Синь Мордовия Республикать эзда казьфтольхть СССР-нь Народнай артистти, СССР-нь и Российскяй Федерациянь Государственнай премиянь лауреатти О.П.Табаковонди, СССР-нь Народнай артистти, П.И.Чайковскяень лемса Оцю симфоническяй оркестрть главнай дирижеронцты и руководителенцты В.И.Федосеевонди, актёрти Ж.Депардьенди мокшэрзянь масторса улемстост.

 

Тя материалть анокламста, сяда видеста азомс—газетаньконь кунардонь ялганц, тяштьфниенц и морафниенц Мария Ивановна Бикеевать мархта телефонца корхнемда меле арьсезевонь: кда марс поладомс сембе ся сюретнень, конатнень сон сёрмадозень и фкя  крганяс кярьксамс кядензон мархта тевс нолдаф ожнанятнень, то мзяра вайгяльбе ули синь кувалмосна? Тянь стака азомс, но пяк и пяк лама.

 

Мокшавась стирензонды, рьвянянзонды и стирня-уноконзонды аноклась платьят, цёранзонды, овонзонды и цёраня-уноконзонды—мокшень панархт. Вов ёфси аф кунара шумордазе рьвянянцты, Надежда Васильевнанди, панарть тиеманц, а нинге сюреса сёрмадсь, ожнаняса мазоптсь кувака и кели нардама.

 

Выставкатнень, фестивальхнень эса участиянь примсеманкса М.И.Бикеева ламоксть казендевсь грамотатнень и диплопнень мархта. Ширесонза аф весть улендсть и омба масторста инжихть.

 

Тяддесь странасонк—Россиянь нароттнень культурнай наследияснон кизосна. Пингстонза башка мяль шарфтови сюреса, ожнаняса сёрмадомати. А Лемдяй велень мокшавась-мастерицась Мария Ивановна Бикеева тянди лемдезе марнек эряфонц. И сонь путксоц мокшэрзянь сюреса сёрмадомать ванфтоманцты пяк и пяк оцю.

 

Т.Альшина.

 


 

 
НОВОСТИ
 

МОРДОВИЯСА ЛОТКАФТФ МАСКАНЬ КАННЕМАНЬ РЕЖИМСЬ

09.06.2022  № 22
 

НАЦПРОЕКТТНЕНЬ—ЭРЯФС!

Мордовиянь Правительствась сяда тов мольфтьсы работать национальнай проекттнень эряфс ётафтоманкса, конатненди ки макссь странань Президентсь Владимир Путин. Республикань Оцюнять ширеса совещанияса корхтафоль основной федеральнай и республиканскяй программатнень эряфс ётафтомаснон колга. Мольфтеви работать квалма азондсть вице-премьерсь Игорь Чадов, МР-нь строительствань и архитектурань министрсь Алексей Гришакин, МР-нь транспортть и дорожнай хозяйствать коряс Госкомитетть председателец Валерий Кандрин, МР-нь велень хозяйствань и продовольствиянь министрсь Александр Кечайкин, МР-нь вирень, охотничьяй хозяйствань и природопользованиянь министрсь Алексей Ларькин.

 

Мордовиянь Оцюнясь путсь задача кирдемс кеме контроль ала строямань графикнень пяшкотькшнемаснон. Васендакиге корхтамась мольфтевсь социальнай инфраструктурань объекттнень колга. Тяфта, ванфтольхть кизефксне, конат сотфт Саранскяйса Кировонь ульцяса 250 вастонди идень садть и Тавлинскяй набережнайса 1450 вастонди школать строямаснон шумордамасна.

 

09.06.2022  № 22
 

ЁТАФТОВСЬ АНТИКРИЗИСНАЙ ШТАБТЬ ЗАСЕДАНИЯЦ

2 июньцта Мордовияса ётафтовсь экономикать ширенц кирдеманц и кемошинц ванфтоманц коряс антикризиснай штабть заседанияц, коса ванондовсть республикаса уликс тефне. Азфоль, што Россиянь Правительствась сяда тов мольфти работа санкциятнень эзда экономикать араламанц коряс законодательнай базань тиеманкса. Региоттнень ширень кирдемасна и синь финансовай кемошиснон кемокстамасна—главнай направлениятнень эзда фкясь. Путф подпись РФ-нь Правительствать постановлениянц алу, кона максси возможность кирьфнемс пандоматнень бюджетнай кредиттнень коряс, конат сявфт дефицитть пяшкодеманкса.

 

Майста нолдаф тевс важнай продукциянь импортёрхнень специальнай льготнай кредитованиянь программасна. Тянкса федеральнай бюджетста нолдаф 37 миллиардта лама цалковай. Тяфтама ширень кирдемать сюнеда бизнести ули кода меки  ладямс товаронь рамсемать, конат мзярс аф нолявихть Россиять территорияса, и сяда тов мольфтемс сембе пингонь работать.
 

09.06.2022  № 22
 
 

Одкстоптови общественнай транспортсь

28 майста Саранскяйса Советскяй площадьса Мордовиянь Оцюнясь Артём Здунов ванозень пассажирскяй од автобуснень, конат работайхть газса. Мордовияти тя общественнай од видонь транспорт, кона арьсекшневи нолдамс тевс республикань транспортнай предприятиятнень подвижнай составснон одкстоптоманкса.

Автобусонь ноляйхне няфтезь средняй и оцю классонь техникать. Артём Здунов ванозень автобуснень эса тяниень пингонь салонть и водителень кабинаса оборудованиять.

«Газса работай техникась сяда ванфтсы экологиять и аф веши оцю карьхцьт. Тяфтама транспортть эвондамац максы инфраструктурати касома-виияма—ков сяда лама тяфтама видонь транспортта, тов сяда лама кармай заправочнай станцияда. Тянь мельге сай пингсь»,—китькстазе Мордовиянь Оцюнясь.

Сембе автобусне стане жа тифт усксемс физическяй ширде ограниченнай возможность мархта ломаттнень. Тяниень пингть Саранск ошса ули автомобильнай газонаполнительнай компрессорнай фкя станция.

02.06.2022  № 21
 

Ревакцинация COVID-ть эзда эряви ётамс сембонди

Мордовиянь Оцюнять Артём Здуновонь председательстванц ала 27 майста ётафтовсь Мордовияса коронавируснай инфекциять инголдаманц и келемоманцты кить персеманц коряс оперативнай штабть заседанияц.

Отмечафоль, регионца ванфтови ковидса одс сярядихнень лувксснон киремац—ётай недялять тя ульсь 30 ломань шити.

«Эряви сяда тов мольфтемс ломаттнень вакцинацияснон и ревакцинацияснон коряс работать. Тянь мельге ванома кода муниципальнай образованиянь оцюнятненди, стане и предприятиянь и бизнес-структурань руководительхненди. Тяниень пингть ётафтовихть ЕГЭ-тне, сяс инфекцияда инголдамань мератненди эряви шарфнемс башка мяль»,—мярьгсь региононь руководительсь.

МР-нь Правительствать Председателенц заместителец Галина Лотванова азозе, што республикань медицинскяй учреждениянь стационархненди тона недялять эрь шиня пачфневсь 20 малава ломань. Сёлкф нинге 50 ковиднай койка-вастсь, стационарса пчкси 203 ломань, конатнень эзда пялесна—60+ кизосот.

02.06.2022  № 21
 

Экономикать виияфтоманцты—башка мяль

Мордовиянь Оцюнясь Артём Здунов 27 майста ётафтозе республикань экономикать ширень кирдеманц и кемошинц ванфтоманц коряс антикризиснай штабть заседаниянц.
Региононь руководительсь мярьгсь, што Россиянь Правительствась сяда тов примси решеният, конат эрявкснихть тячиень аф тёждя пингть экономикать работанц лац ладяманцты.
 
«Васенце очередень тевонь мольфтемань федеральнай планти сувафтф нинге 23 кизефкс. Фалу эвондакшнихть од механизмат, од возможностть. Тейнек эряви синь сяда лац нолямс тевс,—мярьгсь Артём Здунов.—Кепотьксонди, Россиянь Правительствась дополнительнайста нолдай 3 миллиартт цалковай региоттнень эса спортивнай инфраструктурать виияфтоманкса. Эряви кенеремс тиемс заявка ня программатненди и получамс финансирования».

Тяфта жа арьсекшневихть отечественнай программнай обеспечениянь ширень кирдемань од механизмат. Республикань цифровой виияфтомань министерствати и региональнай IT-компаниятненди мярькф активнайста примсемс участия ня процесснень эса.

02.06.2022  № 21
 
 

Артём Здунов встретился с многодетными семьями

Глава Мордовии Артём Здунов провел встречу с многодетными семьями республики – её приурочили к Международному дню защиты детей.

Встреча состоялась в Доме Республики в теплой, почти семейной обстановке, за чашкой чая. В ней участвовали вице-премьер Галина Лотванова и министр социальной защиты, труда и занятости населения РМ Игорь Князьков.

«Я хочу от всей души поблагодарить всех многодетных родителей за ваш нелегкий труд, достойный глубокого уважения и общественного признания, - сказал Артём Здунов. – Вы взяли на себя большую ответственность. Понимаю, сколько дел в большой семье, какая у вас загруженность, но прошу вас, чтобы за этими делами вы не забывали разговаривать со своими детьми. Обсуждайте с ними, что происходит в мире, что было много лет назад. Нам важно, чтобы дети выросли настоящими людьми, чтобы любили свою семью и свою Родину. Это наша с вами общая задача. Вы выполнили и перевыполнили свою демографическую программу, спасибо вам за это, теперь дело за нами».

В Мордовии около 8 тысяч многодетных семей, в которых воспитываются более 25 тысяч детей.

25 мая Президент России Владимир Путин на заседании президиума Государственного Совета, посвящённого вопросам социальной поддержки, подчеркнул, что многодетная семья должна быть ценностным ориентиром для всего общества и поддерживаться государством. Президентом поставлена задача сделать всю систему поддержки семьи целостной, последовательной, понятной и эффективной.
02.06.2022