Поиск по сайту: 
 

Архив
 октябрь 
 2018 
пн вт ср чт пт сб вс
1234567
891011121314
15161718192021
22232425262728
293031    

 
 

 

Тема дня

Панчфт и казнет—республикань учительхненди

Торжественнай мероприятияс, кона лемтьфоль Международнай учителень шити, И.М.Яушевонь лемса музыкальнай театрав пуромкшнесть учительхне марнек республикаста. Профессиональнай праздник мархта синь поздравляндазень Мордовиянь Оцюнясь Владимир Волков.
—Учительсь—тя аф аньцек профессия, тя ваймонь венемома, аф тёждя, ответственнай и оцюдонга оцю труд,—мярьгсь Владимир Дмитриевич.—Афкуксонь учительсь максси иттненди сяда лама азф школьнай программать коряс. Сон лезды ученикти шарьхкодемс эсь прянц, няфтемс ломанень цебярь ширензон, мумс эсь кинц эряфса.
Республикань Оцюнясь азсь кафта важнай цельхть, конат ащихть отечественнай образованиянь системать инголе. Васенцесь—сувамс мирса инь цебярь кемоттнень лувксс. Омбоцесь—тиемс воспитаниянь система. Тянди водендаф «Образование» од национальнай проектсь.
11.10.2018 №40

 

Мордовиянь волонтёрхнень оцю путкссна 2018 кизонь футболть коряс Миронь чемпионатть пингста


 

Национальная тематика

ФКЯ-ФКЯНЬ МАРХТА ЛАДЯМАТЬ ПАРОЦ

Мордовия Республикань Пресс-центраса
Мордовия Республикань Социально-экономическяй мониторингонь научнай центрась 2018 кизонь майста «Качество жизни населения Республики Мордовия» лем ала ётафтсь социологическяй оцю исследования, конань коряс кизефневсь Мордовиять столицаса и муниципальнай райоттнень эса 1000 ломанць.
Исследованиять пингста ломаттне тяфта жа макссть ответт ся кизефкснень лангс, конатнень эзда содавсь, мезе синь содайхть Мордовия Республикань Культурань, национальнай политикань, туризмань и архивнай тевонь министерствать работанц квалма.
Социологическяй оцю исследованиять тя пяльксонц итогонзонды лемтьфоль брифингсь, кона 2 октябрьста ётафтовсь республикань Пресс-центраса. Пингстонза республикань государственнай властень и Социально-экономическяй мониторингонь научнай центрань представительхне азондозь журналисттненди эсь мяльснон ня итокнень колга.
11.10.2018 №40

 

М.А.Алямкина:«МОКШЕНЬ ПРАВДАСЬ» ЛЕЗДЫ ВАНФТОМС РОДНОЙ ВАЛТЬ»


 

ЭРЯФОНЦ ЛЕМДЕЗЕ ИТТНЕНДИ

Ельниковскяй райононь Мольцанав велеса шачф-касф мокшавать Ольга Осиповна Кулаевать содаса лама киза ни и тячемс аф лотксян дивандакшнемда сонь смузьшинцты, оржа ёненцты, ломаттненди панжадокс улеманцты. Корхнят-тият мархтонза и лад арай седиезт, стама сон валда и пара вайме ломанць. Эряфонц оцюшка пяльксоц Ольга Осиповнань ётась ошса, но, аф ваномок тянь лангс, сон тянивок лядонды велень ломанькс—трудонь кельгикс, тевда-сталмода аф пеликс.
Идькс  пингсь  инь мяляфтовись
О.О.Кулаевась кассь оцю семьяса. Кота шабатнень ёткста сон омбоцекссь. Оцють эзда, шарьхкотьф, и вешевсь сяда лама. Тядянцты кудъётконь, перень тевса лезнемада башка Ольгати нинге сашенкшневсь ваннемс ёмла дуганонзон-сазорнянзон. Сембонди содаф, мзяра тевда-заботада велеса. Кафтонь-крда сяда лама эздост оцю семьяса. Кода лятфнесы Кулаевась, куд пирьфсна фалу пяшксель жуватада. Кирнесть тракст, тувот, сараст, учат. Теест эрявсь и тише сязендемс-косьфтамс, и лия корма анокламс. И тяса тядятненди-алятненди васенце лездыкс ульсть Ольга стирьсна и корязонза оцю брадоц. Тяда башка, мзярс шачфтысна-касфтысна колхозса трудендакшнесть, братт-сазорхт пенгат лазондсть, карду сувафнезь, меле куду ведь каннесть. Ольга Осиповна лятфнесы, кода яксекшнесь веденкса пялешка вайгяльбень вастса ащи лихтибряти. Ведсь тоса танцтидонга танцти улендсь. Пяшкоди колма ведаркат, кафттнень крьхця лангс повфтасыне, а колмоцеть кядь песонза кандсы. Шабравасна, эряфкшу кизоса авась, коль сюцекшнесь-ужялякшнесь эсонза тяшка оцю сталмонь каннеманкса. А Ольгась сяда курокста пяшкодьсыне веденди аноклаф кядьготнень и эряскоды стирня ялганзонды. Шабада эста велеса ламоль, эрь семьяса инь кржась ветень идь касфтовсь. Пуромихть марс—ульцясь пяшкоди.
11.10.2018 №40

 

Саратовскяй областень Чугунка велеса Ётась «Шумбрат» фестивальсь

«Мокшень правда» газетаньконь кельгсазь и лувондсазь Россиянь ламоц региоттнень эса, тяконь лувксса и Саратовскяй областьса. Аф кунара тостонь Ершовскяй райононь Чугунка велеса ветецеда ётафтфоль «Шумбрат» мокшэрзянь национальнай культурань фестивальсь.
Сембе нароттнень улихть эсь национальнай иласна. Ламоцне ня праздникнень эзда эвондасть нинге кунардонь пинкнень—несколька сядот, а кой-конат и тёжятть кизода инголе. Ламось эряфсонк полафни: ошне, велетне, профессиятне, щапне, перьфпяльсь, аф полафнихть аньцек народнай илатне, конат эрект снярс, мзярс эряйхть ломаттне. Национальнай илатне—тя народть ваймоц. Ершовскяй районць аф стак кочкафоль «Шумбрат» фестивальть ётафтоманкса. Тястонь аф аньцек Чугунка, но и Шаховка, Чкалово, Ковелинка велетнень эса эряй аф кржа мокшень и эрзянь ломань. Ламошкасна састь тя шири  1950-це кизоня комсомольскяй путевкас коре. Тяфта, целиннай модатнень тевс нолдаманкса Краснослободскяй райононь Колопино велеста Чугунка и Чкалово велетненди сась 30 од семья. Тяниень пингть несколька поколения ни лувондсазь ня велетнень ёмла родинакс. Но эсь юрснон колга синь мзярдовок аф юкснихть. Ершовскяй райононь велетнень и Мордовиять ёткса ладяфт кеме соткст. Региоттнень представительсна сидеста улендихть фкя-фкянь ширеса, ётафнихть марстонь илат. Мордовияста Ершовскяй району пачфневихть мокшэрзянь книгат и журналхт, конатнень земляконьке оцю мяльса учендсазь и лувондсазь.
11.10.2018 №40

 

Юмор и сатира

КДА УЛЕЛЕНЬ СЯДА КОЗЯНЯ

Михаил Иванович шачсь мокшень ашу семьяса. Шабакскиге отькорель, ёнюволь, венемсь содамошитненди. Озай курнянь алятнень ёткс, нолдай эсь паньфкять эзда кафтошка стопканя, ляпоми, ушеды азондома эсь аф тёждя эряфонц колга.
—Кда улелень сяда козяня, аф тинь вакссонт улель монь вастозе,—корхтай алятненди.
—А коса ина, Иваныч?—кизефнесазь сят.
—Кодамовок акша кудса.
—Тянивок кудце акша. Ётак сембе ульцять, лия лацонза аф муят.
—Мон аф тянь кирдине мяльсон. Кодамовок министерстваса или оцю ошень больницяса покоделень.
—И видекс, сюлеканявок афолеть сява, мархтонк афолеть копорда.
—Ктор-ктор..,—рахай Михаил Иванович.—Тинь мархтонт  да стопканя аф нолдамс. Тя аф алякс.
—Лац калякондат, Иваныч. Тянкса сави нинге фкя стопканя нюрьхтямс.
«Сяпинясь» гастясы алять, ушеды лятфнемост одонь кизонзон.
—Мзяра гуленя, цёрат, порьф, вай-вай-вай…
—Кали ни тяшкава вачедолеть?
—Кода ина. Студентолень вдь.
11.10.2018 №40

 

 
 
 

 
НОВОСТИ
 
 

ВАЛЕНТИН ВАСИЛЬЕВИЧ КОНАКОВ

2019 кизонь 27 январьста 80 кизонц лангса стакаста сярядемда меле тусь эряфста Валентин Васильевич Конаков—содаф государственнай и общественнай деятельсь, образованиянь и наукань пуроптысь, ученайсь.
Валентин Васильевич Конаков шачсь 1939 кизонь      9 июньцта Мордовскяй АССР-нь Атяшевскяй райононь Кулясово велеса крестьянонь семьяса.
Армияса служамда меле 1961 кизоня В.В.Конаков работась автомеханикокс Атяшевскяй «Сельхозтехникаса», а сяльде поступась Мордовскяй государственнай университету. Аделамок 1966 кизоня тонафнеманц, Валентин Васильевич кармась покодема образованиянь сфераса, 1966 кизоста сявомок 1979 кизоти молемс работась Мордовскяй государственнай университетса ассистентокс, старшай преподавателькс, металлонь технологиянь и машинань петемань кафедрань доцентокс, велень хозяйствань механизациянь факультетонь деканонь заместителькс. 1978 кизоня В.В.Конаков аделазе Московскяй лесотехническяй институтонь аспирантурать, теенза максфоль техническяй наукань кандидатонь лем.

31.01.2019  № 4
 

ДИПЛОПТ И ПРЕМИЯТ—АСУ ЛОМАТТНЕНДИ

Ётай недялять, 25 январьста, Российскяй студенчествань шиня Мокшэрзянь государственнай национальнай драматическяй театраса етась торжественнай пуромкс, конань пингста МР-нь Оцюнясь В.Д.Волков макссь казнет асу од ломаттненди. Мероприятияс пуромкшнесть аф фкя лацонь конкурсонь и олимпиадань сяськихне и призерхне, а стане жа  синь тонафтысна и тядясна-алясна.
Республикань Оцюнясь азозе, што асу од ломаттнень ширеснон кирдеманкса меля примафоль решения ладямс од премият школьниконь международнай и всероссийскяй олимпиадань сяськихненди и призерхненди.
«Международнай уровеньца сатфксонь сатоманкса премиять лувксоц 100 тежянь цалковайста сявомок 300 тежянь цалковайти молемс. Всероссийскяй олимпиадань мекольце этапонь сяськихне и призерхне получайхть 60 и 30 тежянень цалковай,—азозе Мордовиянь Оцюнясь.—Тядде лауреатокс арасть 43 школьниконьке. Тяда башка, казнет получайхть нинге 40 стирсь и церась, конат лац няфтезь пряснон  исследовательскяй тевса, социальнай и общественнай работаса, научно-техническяй творчествань и  профессиональнай мастерствань конкурснень эса».
31.01.2019  № 4
 

МОРДОВИЯНЬ ОЦЮНЯСЬ ВАНОНДОЗЕНЬ САРАНСКЯЙСА ОПТОВОЛОКОННАЙ ПРОИЗВОДСТВАТЬ ВИИЯФТОМАНЦ КОРЯС КИЗЕФКСНЕНЬ

Мордовиянь Оцюнясь Владимир Волков 22 январьста ётафтсь рабочай васедема «Оптиковолоконные системы» АО-ть генеральнай директоронц Андрей Николаевонь мархта. Ванондовсть предприятиять 2018 кизонь работань итогонза, а стане жа 2019 кизонди платтне. Ня кизефкснень ваномаса примась участия Правительствать Председателенц заместителец—промышленностень, наукань и од технологиянь министрсь Александр Седов.
Лятфтасаськ, оптическяй волокнань Саранскяй заводсь—фкясь и сякось странаса. Сон нолдафоль колма кизода инголе. Тя эсь лацонь производствать виияфтомань сембе этапонза етасть Россиянь промышленностень и торговлянь министрть  участиянц мархта. Владимир Волков аф весть васетькшнесь Денис Мантуровонь мархта, получсемок тя проектть, конанди вийс коре ладямс оптическяй волокнань производствать замкнутай цикланц марнек странать вешфксонзон мяльс сявозь, эряфс етафтоманц коряс республикать инициативанзонды ширень кирдема.
31.01.2019  № 4
 

МОКШЭРЗЯНЬ МАСТОРСЬ ТАГА ПУРОПТСЫНЕ ЭСЬ СТИРЕНЗОН И ЦЁРАНЗОН

Мордовскяй (мокшень и эрзянь) народть vii съездоц ётай тяддень
23-25 октябрьста республиканьконь столицаса
Мордовиянь Оцюнясь Владимир Волков 22 январьста Саранскяйса етафтсь мордовскяй (мокшень и эрзянь) народть VII съездонц, кона кармай тядде 23-25 октябрьста, етафтоманцты анокламать коряс совещания.
Совещанияса примасть участия Россиянь финно-угорскяй народонь Ассоциациять председателец Петр Тултаев, а тяфта жа мордовскяй народонь общественнай организациять Межрегиональнай представителенза, тяконь лувксса РФ-нь лия     субъекттнень эзда.
Владимир Волков мярьгсь, што мордовскяй народть съездоц работать важнай пяльксоц, кона мольфтеви властень оргаттнень и общественнай институттнень мархта традициятнень и межэтническяй ладямать ванфтоманц и ламолгофтоманц коряс—тя задачать путнесы странань Президентсь. Сай пингонь съездть инь главнай темац—«Мордовскяй (мокшень и эрзянь) народсь лама нациянь Россиять единай культурнай кодса».
31.01.2019  № 4
 
 

Мордовиянь Оцюнясь Владимир Волков Ётафтсь национальнай проекттнень эряфс етафтомаснон коряс рабочай совещания

17.01.2019  № 2
 
 
 

 

 

Яндекс.Метрика Яндекс цитирования Rambler's Top100
Учредительхие:
Главнай редакторсь: И. С. Лушкин