Поиск по сайту: 
 

Архив
 январь 
 2022 
пн вт ср чт пт сб вс
     12
3456789
10111213141516
17181920212223
24252627282930
31      

 
 

 

Наши мокшанские сыновья и дочери

СЕДИЕЦ ПАНЖАДОЛЬ СЕМБОНДИ

Сятненди, кие содазе И.Е.Автайкинонь, юкстамс сонь аш кода. Тя ульсь афкуксонь педагог, учёнай, пси седи и панжада вайме ломань. Сон сембонь мархта мушендоль корхтама и историять, и тячиень политикать, и экономикать, и тяниень пингонь журналистикать и литературать колга. Иван Егоровичень сембоса крхкатольхть содамошинза, келихтельхть интересонза и эряфть эзга аськолясь пара мяльса и лямбе пильгокинь кадондозь.
И.Е.Автайкин шачсь Ельниковскяй райононь Сире Каньфкужа мокшень велеса крестьянонь семьяса. Эряфсь ашезе анеля велень цёрокшть, теенза лама савсь няемс, кирдемс. Шабакскиге кельгозе трудть, содазе кши сускомнять питненц. Цють кенерсь кеподемс—ушедсь Великай          Отечественнай войнась. Алянц эстокиге сявозь фронту и васенце кизонякиге шавовсь.
1943 кизоня кемонь классонь аделамда меле сявфоль войнас Иванга. Сон ульсь разведчикокс-наблюдателькс Омбоце Белорусскяй фронтонь самоходно-артиллерийскяй полкса. Сон—фронтовой подвигонкса казьфоль Отечественнай войнань орденца, «За боевые заслуги», «За отвагу», «За победу над Германией» и лия медальса. Сембоц эздост кемонь.
Войнать аделамда меле служась танковай батальонца Польшаса Севернай группань войскаса. Аньцек 1950 кизонь сентябрьста сай куду. Сисем кизот макссь эсь странанц араламанцты.
Шачема-касома вастозонза мрдамда меле поступай тонафнема Мордовскяй пединститутонь историческяй факультету. Сонь шумордазе 1955 кизоня и курокста прважафоль работама Старошайговскяй средняй школав. Тяса Иван Егорович лама киза ульсь директоркс.
Сон башка мяль шарфнесь школать материально-техническяй базанц кемокстаманцты. Республикань Просвещениянь министерствать ширде вешсь финансовай средстват школати пристроень тиемс. Шефне лездсть кафта автомашинань рамамаса. Тифтевсть тонафнемань кафта од кабинетт. Рамавсть нагляднай пособият, книгат. Касфневсь учительхнень квалификациясна.
Сире Шайгавонь средняй школась арась методическяй центракс райононь сембе педагокненди. Тяса работамать пингста мокшалясь пуроптсь эрявикс педагогическяй опыт.
1963 кизоня И.Е.Автайкин поступай МАССР-нь Министронь Советть видеса кялень, литературань, историянь и экономикань научно-исследовательскяй институту и 1967 кизоня Москуса лац аралазе Мордовиянь периодическяй печатть коряс диссертациянц. Тоса жа, МНИИЯЛИЭ-са, 1970 кизоти  молемс работась старшай научнай сотрудникокс.
1970 кизоня Иван Егорович ётай покодема Н.П.Огарёвонь лемса Мордовскяй госуниверситету историянь кафедрав преподавателькс. Тяса музе педагогонь и учёнаень афкуксонь вастонц. Сон стаки касфнесыне эсь содамошинзон. Эсь предметонц коряс лама лувонды, тиенди аналист. Содамошинзон пачфнесыне студенттненди, конат пара мяльса кулхцонкшнесазь лекциянзон.
И.Е.Автайкин 5 кизот ульсь университетонь историко-социологическяй институтть видеса историческяй наукань кандидатонь учёнай степенень макссемань учёнай Советонь членкс.
Фкя пингть ульсь университетонь парткомонь секретарти заместителькс. 1980 кизотнень Иван Егорович работась советскяй обществань историянь кафедрань, кона меле лемонц полафтозе Россиянь народонь новейшай историянь кафедракс, заведующаень заместителькс. Доцентсь И.Е.Автайкин лувсь историять и историографиять коряс лекцият, ульсь дипломнай работань тяштихненди руководителькс.
Сон кафта монографиянь автор, кемонь крупнай исследованиянь соавтор, тяштсь      100-шка научнай и учебно-научнай работа.
Иван Егорович Автайкинонь пара тевонза апак приметак ашесть ляда. Теенза максф Мордовиянь высшай школань Заслуженнай работниконь лем, казьф МАССР-нь Верховнай Советонь Президиумть Почётнай грамотаса и лама лия казнеса.
Меколи азсаськ, Иван Егорович пяк цебярь ялгаль «Мокшень правда» и «Эрзянь правда» газетань журналисттненди. Сидеста улендсь редакциятнень эса, сёрматкшнесь тячиень темас лама мялень салай статьяда. Улемок эсь народонцты афкуксонь патриотокс, сон лама вий и эрьгя макссесь сянкса, штоба лездомс мокшэрзятненди ванфтомс и виияфнемс эсь родной кяльснон, эсь лацонь культураснон, койснон-обуцяснон.
Кемонь кизот ётась, кода аш мархтонк, аш ётксонк И.Е.Автайкин, но сон фалу минь седисонк.
И.СТЕПАНОВ.
14.01.2022

 

Тема дня

УДАЛАЗА КИЦЕ!

Эрь велеть улихть смузю и кодамовок тевса асу ломаненза. Вов и Краснослободскяй райононь Сире Синдру велеса эряйхть и покодихть тяфтама ломатть, конат аф аньцек эсь асушиснон, но и ваймонь эрьгаснон и кядень тифснон вельде мазопнесазь и вельмофнесазь велень эряфть тюсонзон. Кит ина ня ломаттне? Нят, васендакиге, Сире Синдру велень Культурань кудонь покодихне. Синь афкукс художественнай самодеятельностень мастерхт: маштыхть сцена лангса гармошка или баян инголе артистонь лаца кштима-морама, сценкань налхкома. И нинге, кда эрявксты, илештень кятть кярьмодемс плотниконь тевти. И нят аф шава валхт.
Кепотьксонди, 2020 кизоня тястоконь велень администрациять кядьста эняльдезь аназь веле кучкаса ащи шава (кода корхнихть, азорфтома) каладома-наксадома  ушетф шуфтонь кудть и эсь кядь вийснон вельде петезь-тиезь (велень меркас коре) цють ли аф дворецокс. Да, ланга ванозь тя кудсь сельмос аф пови, но, мзярда суват потмозонза—дивандазеват. Дивандафтсазь тя куду суваф инжить аф пиндолды-вандолды тюсне, а сонць кудботмонь паршись, кона мрдафнесамазь-сувафнесамазь минь, тячиень эряйхнень, ся аф сяшкава ни кунардонь эряфти.
Кодак крыленця лангста аськолдат кудынголи, няят предметт-экспонатт, конат эрявкснесть мокшэрзятненди эрь шинь кудъётконь тевонь тиемста: плотниконь инструментт, ямксонь томбамс шовар, стенати повфтаф вест, скомня лангса—шуфтонь ведаркат, почфонь ванфтомс шуфтонь парь, нюрьгихть баняса парендакшнемс аноклаф тяльмот и нинге кой-месть. Куду сувамста кержи кядь ширде няят пянакуд, конань потмоса тястонь азораватне пидихть-панихть инжиень каванямс эрь-кодама национальнай ярхцамбяль. Види кядь ширде ширмаса кяшфкаста ащи шуфтонь кровать, лангозонза озаф мокшава-баба (муляж), конань инголе поталаку итьф нюрям, коза матф шаба (няка). Шарьхкодеви, бабась ванни-басяй унок. Сяда фтала вальмять ваксса ащи шра. Шрать ваксс озаф атя (муляж), кона кундаф пихтембарть шумоняс (мутовка). Тяфта жа шарьхкодеви, кодама кудъётконь тевса заняф. Атять вельхксса лапаняланга, коза путфт сяканят, кукшетть, сифтепт… Тяса жа няят паршиень прдамс-сявомс арзя, шкай уженя-палецькя. И стак тов и стак тов. Инжихненди-конакненди кудазорхе няфтьсазь, кода учань понаста кштирдемс сюре, кода мазы сюреста кодамс перьф сотомс каркс, кода пянакудса пидемс пачат, копшат.
Кудть омбоце пяльксоц—горенцясь, кона тяфта жа азонды эсь урядонц вельде  мокшэрзянь ломаттнень эряфснон-ащефснон колга. Вов кода тянь колга корхтась тястонь велень Культурань кудть азороц В.Г.Романовась:
—Шаржу пингста сявомок, векста векс Сире Синдру велеть фкя песонза эрясть мокшет, омбоцесонза—руст. Да и аф аньцек руст. Нинге бта аф  кунара ётафневсть менельс куци вайгяльса свадьбат, коса серцек кштисть-морасть и мокшет, и руст.
14.01.2022

 

МР-нь Оцюнять Мордовскяй автономиянь пуроптомань шить мархта поздравленияц

Республикань кельгома эряйхть!
Седи ваксста поздравляндатядязь тинь Мордовскяй автономиять пуроптомань шить мархта!
Мордовиять историяц сембе пингс сотф Российскяй государствать судьбанц мархта. Лама веконь пингста минь марса нароттнень мархта, конат тяса эряйхть, строяськ, араласьк и кемокснеськ Отечестваньконь.
Мордовскяй округть автономнай областекс тиемац путсь ушеткс республикать экономиканц и социальнай сферанц сяда тов  ладяманцты-виияфтоманцты, арась оцю толхмадемакс национальнай кяльхнень, мокшэрзянь народть эсь лацонь культуранц и коензон-обуцянзон виияфтомаснонды.
Мордовиясь тячи—тя инголи моли, оцю производственно-техническяй, культурнай, научнай и кадровай потенциал мархта эряманди цебярь территория. Регионть сембе сатфксонза—республикань эряень лама поколениянь эрь шинь трудонь результатсна. Минь мяляфтсаськ и кирдьсаськ седисонк российскяй оцю деятельхнень и марятама гордость земляконьконь инкса, конат путсть оцю путкст Мордовиять виияфтоманцты.
Инголи минь учсесамазь ломаттнень эряфснон качестванц цебярьгофтоманц, республикать ошензон и велензон эса социальнай инфраструктурать кемокстаманц, странати важнай национальнай проекттнень эряфс ётафтомаснон коряс оцю работа. Содаса, марса тейнек вийс коре решандамс эрь кодама стака задачатнень.
Седи ваксста арьсян теенть, тинь радня и мала ломанентенди шумбраши, паваз, козяши, профессиональнай и личнай сатфкст.
Мордовия Республикань Оцюнясь А.Здунов.
14.01.2022

 

МОКШЭРЗЯНЬ КРАЙТЬ ИСТОРИЯЦ—РОССИЯТЬ ИСТОРИЯСА

Кода пуроптовсь мокшэрзянь народть национальнай государственностец? Кие ащесь сонь ушеткссонза? Кода минь республиканьконь историяц сувась странать историяс?
Тянь колга азонды выставкась, кона панжевсь И.Д.Воронинонь лемса Республиканскяй краеведческяй музейса.
Стенттнень эса кочкафт Российскяй государственнай архивста, РФ-нь кинофотодокументонь государственнай архивста и МР-нь центральнай   госархивста материалхт.
 Документтне и фотографиятне азондыхть Мордовскяй автономиять 92 кизонь историянь кинц колга.
—Мокшэрзянь народть национальнай государственностенц пуроптоманц коряс мяльсь азфоль 1921 кизоня коммунистонь I Всероссийскяй съездса,—мярьгсь  республиканскяй госархивонь отделть оцюняц Наталья Терешина.—Кода содаф, сяда инголе мокшэрзятнень государственностьсна ашель, а этническяй эрзятне и мокшетне эрясть марнек Россиять келес. Но советскяй властть васенце кизотнень кемокстаманц пингста ни кепсевсь Мордовскяй национальнай автономиять пуроптоманц коряс кизефкссь.
1928 кизонь майста Средне-Волжскяй областть составса тифоль Саранскяй округсь, сяда тов лемоц полафтфоль Мордовскяйкс. А 1930 кизонь 10 январьста округть официальнайста ладязь Мордовскяй автономнай областекс. Тя решениясь кандсь лама цебярьда территориять сяда тов виияфтоманцты, кона инголи лувондовсь экономическяй ширде фталу лядыкс.
Автономиянь пуроптомада меле кармасть эвондакшнема велень хозяйствань предприятият и промышленнай производстват, велетнень эса панчсевсть школат, коса тонафнемась мольфтевсь мокшень и эрзянь кяльса.
Архивнай экспозицияса няфтьфт Мордовиять васенце государственнай символонзон эскизсна—гербсь, флагсь и Основной законть—Мордовскяй автономнай республикать Конституциянц текстоц, кона примафоль 1937 кизоня.
14.01.2022

 

Панчфт идень кафта сатт

МР-нь Правительствать Председателец Владимир Сидоров и Саранск ошень округонь оцюнясь Игорь Асабин ванондозь социальнай объекттнень эса, конат строявихть республикать столицаса, строительнай работатнень мольфтемаснон.
Юбилейнай 4-це микрорайонца идень садсь строяф, строительнай работатне тяса шумордафт марнек. Январть пенцты тяза пачфтеви мебель, подрядчиксь кярьмоди сонь кочкаманцты и ладяманцты, урядавихть лядыкс кархчне, аруяфтовихть помещениятне. Идень садсь строяф 240 вастонди. Тяса кармай 12 группа: кафттне ясельнайхть, старшай дошкольнай и подготовительнай группат, колма дошкольнай и колма средняй дошкольнай группат. Тя объектсь строявсь «Жильё» федеральнай и региональнай проекттнень рамкаса.
Аделафт нинге идень фкя садонь строямать коряс работатне Саранскяйса—Набережнай 1 ульцяса. Тяза сувафтф мебель, лядсь сонь кочкамс, тиемс аруши помещениятненди. 24 январти сембе ня мероприятиятне кармайхть пяшкотьфт марнек. Тя садсь строяф 250 вастонди. Строямась мольфтевсь «Развитие образования» РФ-нь государственнай программать эряфс ётафтомань рамкаса.
Мольфтеви идень садонь строямась Кировонь лемса ульцяса. Работатне тяса арьсекшневихть шумордамс 2022 кизоть васенце пялестонза.
Владимир Сидоров и Игорь Асабин тяфта жа ванозь 1450 вастонди школать строяманц коряс работатнень Юбилейнай 4-це микрорайонца.
14.01.2022

 

Саранск ошень округонь оцюнякс кочкаф Игорь Юрьевич Асабин

И.Ю.Асабин шачсь 1968 кизоня Казахскяй ССР-нь Уральск ошса. 1995 кизоня Саранскяйса шумордазе потребительскяй кооперациянь Московскяй университетть, 2004 кизоня—отличия мархта П.А.Столыпинонь лемса государственнай службань Поволжскяй академиять. 2002 кизоста сявомок 2006 кизоти молемс ульсь аспирантокс Мордовия Республикань Правительствать видеса гуманитарнай наукань научно-исследовательскяй институтса. 2009 кизоня аралась диссертация.
2021 кизонь майста шумордазе ЕМРМ-нь программать коряс государственнай управлениянь Высшай школаса Российскяй Федерациянь Президентть видеса народнай хозяйствань и государственнай службань Российскяй академиять—руководительхненди государственнай управлениянь Мастер. Трудовой кинц ушедозе 1988 кизоня М.В.Фрунзень лемса (Самара) Куйбышевскяй моторостроительнай производственнай объединенияса механосборочнай работань слесарькс. 1992 кизонь августста сявомок 2004 кизонь октябрти молемс занцесь руководящай должностть коммерческяй структуратнень эса. 2005 кизонь апрельста сявомок 2013 кизонь мартти молемс работась «Торговый Дом АМО ЗИЛ» ЗАО-са васенда федеральнай ведомстватнень мархта работать коряс отделонь начальникокс, сяльде—федеральнай ведомстватнень и региональнай структуратнень мархта работать коряс директоркс.
2013 кизонь мартста сявомок 2021 кизонь февральти молемс Игорь Асабин покодсь Государственнай транспортнай лизинговай компанияса Аппаратонь руководителькс—генеральнай директоронь заместителькс. 2007 кизоста сявомок 2021 кизоти молемс ульсь Российскяй Федерациянь Государственнай Думань депутатонь помощникокс. Рьвяяф, кафта иденза.
14.01.2022

 

Кие сась? Кие тусь?

Ня шитнень Инсар ошса ётась Инсарскяй муниципальнай райононь депутатонь Советть ветеце сессияц. Тяса азфоль, што районть вятиец Камиль Мангутов эсь мяльс коре пингта инголе валхтозень эсь лангстонза оцюнянь полномочиятнень. МР-нь Оцюнять и МР-нь Правительствать Администрацияснон руководителенц заместителец Дмитрий Борисов региононь Оцюнять Артём Здуновонь лемста азсь благодарность Камиль Мангутовонди лама киза лац покодеманкса и макссь теенза Мордовия Республикань местнай самоуправлениянь органонь Заслуженнай работниконь удостоверения. Камиль Аминович эсь ответнай валсонза азсь сюкпря депутаттненди, райононь сембе эряйхненди лама кизонь марстонь работать инкса, кона водендафоль Инсарскяй районть сяда тов виияфтоманцты.
Инсарскяй райононь оцюнянь аф лама пингс тевонь тиендикс фкя мяльса кочкаф Харис Якуббаев.
* * *
28 декабрьста ульсь Чамзинскяй муниципальнай райононь депутатонь Советть аф очередной котоце сессияц. Сонь эсонза примась участия МР-нь Правительствать Председателенц заместителец—жилищно-коммунальнай хозяйствань, энергетикань и населениянь гражданскяй защитань министрсь Игорь Чадов.
Депутатонь районнай Совету сась заявления Чамзинскяй райононь оцюнять Вячеслав Цыбаковонь эзда пингта инголе лангстонза оцюнянь полномочиятнень валхтомаснон колга. Игорь Чадов Мордовиянь Оцюнять Артём Здуновонь лемста азсь благодарность Вячеслав Цыбаковонди и пачфтсь теенза «Мордовия Республикань местнай самоуправлениянь органонь Заслуженнай работник» почётнай лемонь максомать колга.
Депутаттне эсь пуромкссост Чамзинскяй райононь оцюнянь аф лама пингс тевонь тиендикс кочказь Руслан Батеряковонь.
* * *
Аф очередной сессия ётафтфоль и Ковылкинаса, коса ванфоль райононь оцюнять Николай Комусовонь пингта инголе полномочиянзон валхтомаснон колга кизефкссь. Сессияса улемстонза МР-нь финансонь министрть тевонзон тиендисна Сергей Тюркин региононь Оцюнять Артём Здуновонь лемста азсь благодарность Николай Комусовонди работанц инкса и максозе теенза Мордовия Республикань Почётнай грамотать.
Ковылкинскяй райононь оцюнять аф лама пингс тевонзон тиендикс кочкаф Игорь Бутяйкин.
Игорь Бутяйкин шачсь 1975 кизоня Лямбирь велеса. 1998 кизоня шумордазе Н.П.Огарёвонь лемса Мордовскяй госуниверситетть «Экономика и управление в отраслях АПК» специальностть коряс, а 2011 кизоня—РФ-нь юстициянь министерствань Российскяй правовой академиять «Юриспруденция» специальностть коряс.
14.01.2022

 

В Кадошкинском районе проходят выездные профилактические обследования


 

В Ромоданвоском районеотремонтировали детскую школу искусств

В рамках национального проекта «Культура» в п. Ромоданово был осуществлен капитальный ремонт детской школы искусств.

 

Фронт работ строительной компании включал внешнюю и внутреннюю отделку здания, полностью обновлен фасад и кровля. Также работы проводились и в филиале школы искусств, который располагается в жилом микрорайоне Сахарного завода. После ремонта в здании филиала, площадь которого 246 кв. м. появилось 7 новых классов, актовый зал, и санузлы. В преддверии Нового года  состоялось торжественное открытие учреждения с праздничным концертом.

 

«Школа после ремонта приобрела современный облик. Для наших детей  это стимул к новым достижениям, новым высотам в получении знаний. Мы стараемся предоставить всё самое лучшее детям, чтобы они обучались в комфортных условиях», - отметила заведующая отделом культуры администрации района Л.Н. Рудакова.

 

Напомним, что Президентом России Владимиром Путиным были объявлены 12 нацпроектов: «Демография», «Культура», «Здравоохранение», «Образование», «Жилье и городская среда», «Экология», «Безопасные и качественные автомобильные дороги», «Производительность труда и поддержка занятости», «Наука», «Цифровая экономика», «Малое и среднее предпринимательство и поддержка индивидуальной предпринимательской инициативы», «Международная кооперация и экспорт». Главная задача национальных проектов – реальные позитивные изменения в жизни каждого российского гражданина и каждой семьи. Мордовия участвует в 56 федеральных проектах, которые являются частью национальных.

 

14.01.2022

 

Национальная тематика

НАРОДОНЬ ЭРЯФТЬ МОРАЕЦ

А.М.Кудашкин М.И.Безбородовонди лемтьф «Портрет» стихотворениясонза сёрмадсь:
Ваны лангозон
Стенаста портретсь.
Мокшетнень эзда
Васенце поэтсь.
Кеме вайгяленц
Ламос аф юкстамс,
Книганц морафтомс
Инголен путан.
Морай моронзон
Миньцонк сиресь, одсь,
Кельгсы, морафтсы,
Шнакшнесы народсь.
Андрей Матвеевич Михаил Ильичень лувондсы эстеенза учителькс. Кой-кона стихонзон аф аньцек лувондозень, но и тонафнезень наизусть. Синь кепсесть мяль, макссесть пацят, вийхть тяштемань тевса. Михаил Ильичень произведениянзон вельде кассь лама содаф поэт. А.М.Кудашкинда башка М.И.Безбородовонь лувондозь эстеест учителькс А.С.Малькин, М.А.Бебан, М.Г.Имяреков, И.Н.Кудашкин, С.В.Кинякин, ламотне лиятне. Синь лемдсть мокшень васенце поэтти стихт, сёрмадсть эряфонц и творчестванц колга.
Содаф учёнайсь, литературоведсь М.Г.Имяреков М.И.Безбородовонди лемдсь аф фкя работа. «Велесь лятфнесы эсь ломаненц», «Фольклоронь традициятне М.Безбородовонь творчестваса», «Афкуксонь поэтсь—народнай»—тяфтама лем ала лисендсть материалонза «Мокшень правдаса». А «Улендсь шобда сире велесь» лем ала мекольце очеркоц лиссь газетаса 2007 кизонь 11 январьста и аноклафоль сон содаф земляконц 100 кизонь юбилеенцты.
—Лац содайне М.И.Безбородовонь произведениянзон эса морави         васттнень, вирьхнень, лугатнень, Сире Пиченьгужть перьфке козя и мазы перьфпяльть,—сёрмады Михаил Герасимович.—Поэтть веленц эзда ниле вайгяльбень вастса ащи монь Лепченка велезе. Ня кафта велетне сотфт фкя-фкянь мархта оцю вирьса, конанди мярьгихть Карпунь шяй. Велетнень крайге шуди Мокша ляйсь.
Гордостень марязь азса,  монга улень ня васттнень эса. Конашкава синь мазыхть, кеподихть мяль. Афкуксонь ёфксонь, поэтонь уженя. Ламоль тяса стихонь сёрмадыда, моронь латцида. Аф сембе синь арасть содафокс мокшэрзянь крайса. Но мезе кадсь М.И.Безбородов, кона сембоц эрясь 28 киза, ся мзярдовок аф юкстави, аф нардави мокшэрзянь литератураста. И мзяра нинге сёрмадоль, кда афоль ту ёфси одняста лия эряфс.
Васенцеда Сире Пиченьгужса, Лепченкаса, Мокшень Мазканяса улень 1985 кизонь июль ковста. Улеме М.Г.Имярековонь мархта фольклорнай практикаса. Михаил Герасимовичень пяк мялецоль няфтемс тейнек, студенттненди, эсь шачема-касома уженянц, Ельниковскяй районть. Лепченкаса шачсь-кассь сонць, Сире Пиченьгужса—М.И.Безбородов, Мокшень Мазканяса—А.М.Кудашкин, И.Н.Кудашкин. Лоткама вастокс тейнек ульсь Сире Пиченьгужсь.
Нинге Саранскяйста Ельникав ардомстонк автобусса васьфтеме эряфкшу мокшава. Содазе Имярековонь.
—Тон аф Герасимонь цёрацат?—кизефтезе преподавателеньконь.
—Герасимонь,—отвечась тона.—Лепченканнят, што ли?
—Аф Лепченкань, Сире Пиченьгуженнян.
—А минь велезонт арттама фольклорнай практикас. Мялезе студентоненди няфтемс Сире Пиченьгужть, Безбородовонь калмалангонц, васьфтемс сонь велеряензон, одкс пингонь ялганзон мархта.
—Мзяра ни киза кулоф Офтонь Миша, а тянемс мяляфтсазь. То ученикт сайхть калмонянц лангс, то студентт, няк, ускат.
—А тон мяляфтсак сонь?
—Кинь? Мишань? Кода ина. Марса вачашить и нужатнень сяськондеськ, вень ульцяв якаме.  Кода эряме эста: ашель мезьда ярхцамс, ашель мезе лангозонк щамс.
—Да нинге, корхтайхть, кулакне кедьстост лисендсть, велеряйхнень эса обжасть.
—Лисендсть ни… Ашезь сода коза пряснон кяшемс. Вихца колхозу сувафнезь, сявондезь паршиняснон. Ульсть лангозост мутендайхть, сельмонь каяйхть. А кинь мялезонза тя туй. Офтонь Мишавок сёрмадсь колгаст. Кяж кирдсть лангозонза, но, штоба обжалезь. Мон тянь квалма вестевок ашень куленде. Фалу марсолеме. Кда мезевок улель, кулеволь-маряволь.
—А мес ни ашесть ванфта ялгантень? Тяшкава рана кулось.
—Ашезь ванфтов. Туберкулёзсь эзонза педсь. И аделазе. Архтока, 28 кизоса тусь равжа модати.
Ашеме фатя, кода пчкодеме Ельникав.
—А Сире Пиченьгужу мезьса мольхтяда?—кизефтезе мокшавась.
—Васьфтемонк сайхть. Аф ли грузовой машина надияфтсть инксонк кучемс.
—Моньге ни сявомасть мархтонт. Мезьса пачкодян вели?
Авась тердемазь ширезонза. И якаме. Мон аф мяляфтса ни тяни тя ломанть лемонц. Но Михаил Герасимович сёрматкшнезень М.И.Безбородонь сембе ялганзон лемснон. Нят П.Ф.Кирдяшкин, А.П.Ахтиманов, А.В.Вельмискина, ламотне лиятне. Миньге улеме лама велеряень ширеса. Сембе лятфнезь Михаил Ильичень лямбе валса. Ломанць пяк цебярель, лезнесь велеряензонды, кирнезе обжафнень ширеснон, но эсь пряц ашезь ванфтов. Сяс и поэтонь тяштецка мадсь пяк рана.
Ашеме кенере пачкодемс Сире Пиченьгужи, Михаил Герасимович сявомазь поэтть калмонц лангс. Тясовок ульсь Безбородов ушедыкс. Синцень велеса калмосна ашельхть. Кулыхнень ускселезь Сире Девцяи. Михаил Ильич шарьхкотькшнезе, што теенза  лядсь аф лама. Раднянзонды указовась, штоба калмалезь эсь велезост пиченалть трвас, губорть пряс. Тя пиче вирть озафнезе сонць Михаил Ильич ялганзон мархта.
Эняльдеманц пяшкодезь. Но ламоц велеряйхне кода калмосезь кулыхнень Сире Девцяи, стане и калмосесазь. Лама пинге поэтть калмоняц губорть пряса ащесь ськамонза. Ланганза якасть тракст,  лия жуватат. Тоса велеряйхне ушедсть калмосема Сире Пиченьгужи.
Минь улемстонк велень калмалангсь перяфоль. Но колазе мяленьконь ся, што М.И.Безбородовонь калмонянц мельге кивок ашезь вана. Сон ваяфоль палакс, сор тише потмос. Кшнинь памятниконясь шямонюволь, наксадоль. Мордовия Республикань Писателень союзть эзда аф оцю плитанясь ваяфоль модати. Минь урядаськ, петеськ калмонц, а меле М.Г.Имяреков ушедсь азондома кельгома мокшень поэтонц колга. Ся пингста ётась лама киза. Мзярда шисоль Михаил Ильич, афкукс улендсь шобда Сире велесь. Да эстонь кизотнень тяфта эрясть сембе мокшень велетне.
Улендсь шобда Сире велесь
Сире пинкнень, кода весь.
Нужась якась велеть келес,
Кяжи вармакс морась-кштись.
Тяфта сёрмадсь поэтсь ётай веконь колмогемонце кизотнень. Тяни, конешна, эряфсь полафтсь. Велеське аф шобда, куттневок оцюфт, валтт. Аньцек эряйхть эсост аш.
М.И.Безбородовонь содаф земляконза М.Г.Имяреков, И.Н.Кудашкин фалу пеняцякшнесть, мес Ельниковскяй районца кржа шарфнихть мяльда поэтть творчестванц лангс.
—Сон вдь сувси мокшэрзянь поэзиянь ушедыхнень ёткс,—корхнесь и тяшнесь М.Г.Имяреков.—Сонь поэзиянц вельде кассть А.С.Малькин, И.М.Девин, А.М.Кудашкин и лиятне. Малькинонь лемс эрь кизоня ётафневихть лувомат, оцю литературнай илат. А Безбородовонь афи лятфнесазь.
Мекольдень кизотнень ётафневихть илат школатнень, библиотекатнень эса и М.И.Безбородовонь лемс. Сонь поэзиянцты кельгомась кизоста кизос аньцек касонды. Пцтай эрь мокшень ломанти содаф «Вирь» стихотворенияц:
Кизонда, вирняй,
Пиже лопаняй,
Пси мани шиня
Шида кяшиняй.
Яксян потмоват,
Шуфттнень ёткова.
А пингонь-пингонь,
Ляйге, лоткова…
Тя стихотворениять тонафнеськ школаса наизусть. Н.В.Кошелевась сёрмадсь тя стихотворениять лангс музыка, тиевсь морокс. Тя мороть морсесы Мордовия Республикань Заслуженнай артисткась Инна Учватова. Соньфтомонза аф ётни фкявок концерт, ила. Мяляфтса, мзярда шисоль М.Г.Имяреков, тя мороть инкса учёнайсь якась и концертс. И эрь концертта меле ашезь мушенда эстеенза васта. И шнась, и азондсь содафонзонды Михаил Ильичень колга.
М.И.Безбородов кенерсь нолдамс кафта аф оцю книганят: «Паксять морасан», «Матовсь кяжец». Кой-кона стихонза и поэманза лисендсть «Колхозонь эряф» журналса. Лядыкс книганза лисендсть мокшень и рузонь кяльса куломдонза меле. Мордовскяй книжнай издательстваса 1939 и 1941 кизотнень лиссть кафта томса сочинениянза. Тяда меле лисендсть стихонь и поэмань пусмоц, «Видиян, сокаян», «Ульсь пинге…» книганза, конатнень кочказь А.В.Алёшкин, А.П.Тяпаев. Колма книганянза лиссть рузонь кяльса. Поэтть стихонзон, поэманзон ётафтозь рузонь кяльс И.Пиняев, И.Рыжиков, В.Щепотев.
Пяк лама рецензия М.И.Безбородовонь творчестванц колга сёрмадсть содаф учёнайхне, литературнай критикне Ж.А.Конакова, В.В.Горбунов, Н.И.Черапкин, В.М.Макушкин, А.Г.Борисов, И.Д.Воронин и лиятне. Ашель стама киза, штоба афольхть сёрмада колганза содаф поэтоньке, писателеньке, журналистоньке.
Лувити лац содафт А.П.Тяпаевонь, Г.И.Пинясовонь, Ю.Ф.Кузнецовонь, Я.М.Пинясовонь, М.А.Бебанонь, И.Н.Кудашкинонь и лиятнень работасна. Аш стама тонафнемань книга, коза афоль сувафтов М.И.Безбородовонь творчествац, поэзияц. Кода ни азыне, сонь тонафнесазь вузса, педагогическяй колледжса, школаса. Студенттне сёрмадыхть рефератт, курсовой, дипломнай и лия работат, учёнайхне—творчестванц колга  кандидатскяй и докторскяй диссертацият. Поэтть стихонза ётафтфт лама кяльс. А вдь сонь биографияц тяльги фкя кагод лопаняс. Шачсь М.И.Безбородов 1907 кизонь 10 январьста. Эряфсь пяк стакаль. Мольсть революцият, классовай тюремат, фкя-фкянь аф шарьхкодемат. Эрь вастса вешендсть и мушендсть муворуфт. Аф ваномок стакатнень-сталмотнень лангс, ашу крестьянскяй семьяста цёранясь, Миша Безбородов, 1919 кизоня аделазе эсь велесост начальнай школать. Нинге шабакс оцю мяль шарфнесь мокшень фольклорти, сире пингонь моротненди, койхненди-обуцятненди. Тя лездсь теенза сёрмадомс мокшень кяльса стихт и поэмат. 1929 кизоня аделазе Саранскяйса  Совпартшколать. Тяда меле работась Сире Пиченьгужень начальнай школаса учителькс, морафтома кудса заведующайкс, тяшнесь районнай газетав стихт, велень эряфть колга аф оцю статьят, коса шнакшнезе од эряфть. Сёрмадсь эряфса шоряйть каршес. Вов и сембе биографияц мокшень поэзиять ушедыенц. Сонь поэзиянц колга вов ни пцтай сяда киза споряйхть учёнайхне, литературнай критикне, аф фкя лацонь, но оцю питне макссихть сёрматф стихонзонды, поэманзонды. Сембодонга лама аф фкя лацонь рецензияда сёрматфоль «Ёфкс, кона ульсь»       (1929 к.), «Матовсь кяжец»            (1933 к.), «Волянкса»      (1935 к.) поэманзон, «Кафта ширет» стихса пьесанц лангс. Эсост няфтеви революцияда ингольдень эряфсь, коллективизациять пингста классовай эряфсь, азондови мокшень велень ломаттнень колма революциятнень эса участиянь примамаснон колга. Тяни пингсь полафтсь. Учёнайхне ёфси лия сельмоса ваныхть эстонь пингонь событиятнень лангс. Эвондакшнихть од работат, коса ёфси лиякс няфтевихть классовай тюремась, коллективизациясь.
10 январьста М.И.Безбородовонь шачема шистонза топодель 115 киза. 87 киза ётась, кода содаф поэтоньке аш минь мархтонк. Но эряйхть сонь стихонза, поэманза. И видецоль М.Г.Имярековонь, Безбородовскяй лувомат, лия оцю литературнай илат эрявольхть ётафнемс. Михаил Ильичень поэзияц козя, интереснай, сонь вельденза кассь лама содаф поэт. Безбородовскяй лувоматне крьвястельхть аф фкя од поэтонь тяште.
Илья ВЕШКИН,
Россиянь Писателень
союзонь член.
14.01.2022

 

Культура

Галина Макшева: «Катк Тигрань кизось канды сембонди сатфкст и цебярь полафткст!»

Галина Макшева:
«Катк Тигрань кизось канды сембонди сатфкст и цебярь полафткст!»
Вов и тусь историяв 2021 кизось. Инголенк панжевсь историянь тага фкя лопаня, минь аськолдаме 2022 кизоти. Кода фалу, тя пингть путнетяма инголенк од задачат, арьсекшнетяма од тефт, тияк варжакснетяма и фталу, тиенттяма итокт ётафти. Кодамкс ульсь ётай кизось Мордовия Республикань Заслуженнай артисткати, Г.И.Сураевонь-Королёвонь лемса «Келу» ансамбльса морсити Галина Николаевна Макшевати и мезе сон ученды Тигрань кизоть эзда? Тянь колга мокшавась азондсь корреспондентоньконь мархта корхнемста.
—Галина Николаевна, Од киза мархта тонь! Кеме шумбраши, паваз и творческяй сатфкст тейть!
—Сюкпря!
—Кодама мяльса-арьсемаса васьфтить Тигрань кизоть? —Кода фалу, пара настроенияса и аньцек цебярьс надиязь. Койсон, мезть кирдьсак мяльсот, ся и лисенди эряфса. Надиян, Тигрань кизось ули сяда тёждя, сяда удалаф, канды сембонди тейнек сатфкст и цебярь полафткст.
—Аф сцена лангса сатодязь куранттнень шавомасна?
—Илать васьфтине кудса инь мала ломаннень—иднень, уноконень мархта. Но улендсь и стане, што Од кизоть сашендовсь васьфнемс покодема вастсовок. Тяфтама ни минь артистонь тевоньке, васенце вастса тейнек тиемс праздник лиятненди. Весть, мяляфтса, Од кизоста веньберьф кштиме-мораме ошень фкя кафеса. Азороц мокшаляль, мялецоль, штоба заведениязонза пуромфнень инголе выступандаль национальнай коллектив. И вов минь кеняртьфнеськ кафень инжихнень мокшень и эрзянь мороса. Куду повоме шобдава шири.
—Кода семьяце ваны сянь лангс, мзярда кирневат покодема вастса или тушендат гастрольс?
—Синь тонадсть ни тянди. Стирезень и цёразень касфтыне ськамон. Шабакс, улендсь, сявондине мархтон, аф шуроста кадондыне ськамостка. Шабане, рузкс мярьгомс, самостоятельнайхть, синць и пидельхть-панельхть эстеест, и кудботмоса порядка кирдельхть. Тячивок стряпшамань тевса сафтсазь. А цёразе мянь профессияндивок эстеенза кочказе—покоди ресторанца поваркс.
—Галина Николаевна, кодамкс мяляфтовсь Од кизонь илась идькс пингстот?
—Шабакс сембе праздникне учендовсть седиень оцю таколдома мархта, а Од кизось —сядонга пяк. Аноклама теенза ушеткшнеме ламода тяда инголе, тонафнеме стихотвореният, морот, сценкат. Лувондоськ шитнень, мзярда школаса стяфтоволь кузня и минь кярьмоттяма мазоптомонза. Тя ульсь кодама-бди ёфксонь пинге. Тядязе сташендсь тейне карнавальнай костюпт, улендень и Нумолнякс, и Офтонякс, и Врьгазкс, и нльне Цыганавакс. А конашкава учендоме Од кизонь ламбама казнетнень эса. Эста аф кода тяни, стак шиста конфетат-месть ашесть повонда шабатненди, сяс кулёкне ульсть тейнек оцю кеняртьксокс. Оцюфт, тифтольхть кагодста и конфетатне эсост ёфси лия таньф мархтольхть. Сон тянемс кяльбрясон.
—А тяни кудса кузня наряжакшнят?
—Конешна, кузняфтома илась аф ила.
—Мезьса  мяляфтовсь 2021 кизось  «Келу» ансамбльти?
—Кизось аф тёждяль, но работамда ашеме лотксе. Путнеме од программат, од номерхт. Ичкози гастрольс ашеме яка, сянкса аф кржа концерт максфоль республикань райоттнень эса. Улеме иласа и шабрань регионца—Самарскяй областьса. Лама инжида васьфнема аэропортса. Кеняртьфти, мес ширезонк сашендыда уленди коль сяда и сяда лама. Мялень салай программа аноклафоль Од кизонь илати. Колма кяльса—мокшекс, эрзякс и рузкс мораськ «Вирьса шачсь кузня» Од кизонь инь содаф и кельгови моронять. Тя ульсь кода театрализованнай номер, сценать лангс лисендсть и Якшам Атясь, и вирень звернятне.
—Иласта ладяф казендемс фкя-фкянди казнет. Тон, Галина Николаевна, мезть сяда кельгсак, каземацень или казнень получамацень?
—Тейне сяда кельгови казендемась. Лад арси седиезон, мзярда каннян ломанти кенярдема. Тя пингть бта пацяне шачендыхть, мялезе эрямс, кельгомс, тиендемс оцю тефт.
—Галина Николаевна, эрь лятфтасаськ лувиеньконди, костоннят тон шачемас-касомас коре, кит тядятне-алятне?
—Ёмла родиназе Старошайговскяй райононь Красная Уржа посёлкась. Касонь колхозниконь семьяса. Алязе, Николай Яковлевич, эряфоньберьф трудендась колхозса, ульсь фермань заведующайкс. Тядязе, Валентина Ивановна, работцесь дояркакс. Родительне шачфтсть-касфтсть сисем итть, мон ёткстост сембода оцюсь. Эзрайть эзда, шарьхкотьф, вешфксське сяда оцюволь: мон и кудонь, и перень тевса васенце лездыселень, и ёмла сазоронь-дуганонь ванниелень. Уржаса аделайне начальнай школать, а меле тонафнень Краснай посёлкаса. 9-10   класснень шумордайне Вертелимса. Велесь эздонк ащесь кемонь вайгяльбень вастса. Цебярь погодаста ялгань келеса пачкотькшнеме велосипедса, а мзярда ушеткшнельхть сёксень пизепне-рдасне, а меле—тялонь фальхне, эряме интернатса.
—Тяни улендят шачема велесот?
—Пяк ужяль, но Уржась срадсь-каладсь нинге лама кизода инголе. Тядязе и алязе 1985 кизоста сявомок эряйхть Саранскяйса. Лацост стане жа тушендсть кие коза и лия велеряйхне. Инголи веленьке пяк оцюволь, тяса ульсь оцю хозяйства. А кодама мазы вастса ащесь сон, перьфпяле туста вирьхть, кели паксят. Тя мазышись тячемс шоворькшни онозон. Сяс, улема, и касонь вирень кельги ломанькс.
Тячи пачкодемс Уржав пяк стака. Ки ёфси аш. Но седиезе сембе сяка уски эсон тя аймаку. Мон сидеста улендян Старошайговскяй райононь Сарга велеса, коса шачсть-кассть ялгане, якан ширезост инжикс.
—Тячи тон содаф артисткат. Кинь лаца туть тяфтама вайгялюкс?
—Родсонк-плямасонк аф кржаль морайда. Морсесть щавазе, бабазе, мазы вайгялец алязень. Эздост, улема, и ётась тейне морамань асушись. Школаса фалу морсекшнень ётафневи пуромкснень, илатнень эса.
—Пара улель содамс кода повоть «Келу» ансамбльти?
—Эста мон аньцек-аньцек шумордайне школать. Ся пингть мокшэрзянь содаф композиторсь Г.И.Сураев-Королёв сась мяльс пуроптомс профессиональнай коллектив, коса морсикс мялецоль няемс велень простой ломаттнень. Георгий Иванович якась велетнень эзга, кочксесь морсихть. Кулхцонтфолень монга, вайгялезе тусь мялезонза и примафолень коллективу. Тя ульсь тейне аф азовомшка оцю кенярдемакс. «Келуть» творчестванц колга содань тяда инголе ни. Артисттне улендсть велесонк, морамаснон сидеста кулендине радиоса. Повомс ёткозост ульсь оцюдонга оцю и тяка пингть аф верондафты павазкс. «Деряй, сафтови тейне синь лацост?»—арьсень. Но тевозе лиссь. Нильгемонь кафтува киза ни морсян «Келуса».
—Артистонь тевсь, шарьхкотьф, аф тёждя, выступлениятне, гастрольхне сявондихть лама пингта. А мзярда эвондакшни ётка пингце, мезьса занцесак сонь?
—Кода ни азыне тяда инголе, пяк кельгса вирть, афи лисенделень тоста. Нльне урмане-сярятьфоне сетьмосихть шуфтонятнень ёткова якамста. Пара мяльса кочксян панкт, имошт. Меле эздост тиендян лама мезе танцтиня, каванякшнесайне семьязень, ялганень.
—Спасиба, Галина Николаевна, седикс-ваймокс корхнеманкса! Тага весть Од киза мархта тонь! Катк пяшкодеви сембось, мезе арьсеть!
—Спасиба!
О.ЕВДОКИМОВА.
14.01.2022

 

Люди и дела

СТАЛМОДА АФ ПЕЛИХТЬ, КОЛЬ ИНГОЛИ КЯЛИХТЬ

Азонттама республикасонк содаф предпринимательть Р.И.Тишкинать и сонь фермерскяй хозяйстванц колга
Мекольдень кизотнень минь республиканьке велень хозяйствань тефнень вятемаса путневи примеркс Россиянь лия региоттненди. Тяни Мордовиясь сяда лама мишенди лофцта, сивольда, сёрода, теплицаса касфневи продукцияда. И тяса оцю путкссна кода оцю агрохолдинкнень, МАПО-тнень, велень хозяйствань ООО-нь предприятиятнень, стане и крестьянскяй (фермерскяй) хозяйстватнень, велень тевса заняф лия коллектифнень.
Раиса Ивановна Тишкинать—Рузаевскяй райононь индивидуальнай предпринимательть сатфксонза дивандафтыхть ковста-ковс. Тя хозяйстваса арась правилакс, эрь шиня сатнемс од сатфкст, тиендемс аськолкст инголи.
—Минь аноклафста васьфтеськ и ётафнесаськ тялонь кофнень фермаса, жувататне лац андовихть, сяс лофцта государствати мишенттяма пцтай кафксть сяда лама ётай кизоть коряс,—азонды крестьянскяй (фермерскяй) хозяйствань оцюнясь Раиса Ивановна Тишкинась.—Тянкса улихть сембе условиятне. Тишеда, сенажда, силоста аноклаф сняра, што корматне сатыхть нльне нинге фкя тялонди. Жуватаньке сембе плямань породань, эрь прясь сявф учётс, мельгаст ваттама сембе зоотехническяй и ветеринарнай вешфкснень мяльс сявозь. Кой-кона траксне шити макссихть 40-45 литра лофца. Тядде мяленьке потямс нинге сяда лама.
14.01.2022

 

 
 
 

 
НОВОСТИ

Зубово-Полянскяй райононь оцюнясь В.А.Поршин:«Эрь тевсонк васенце вастса ащи ломанць!»

Зубова Полянась васенцеда лятфневи 1680 кизоста сявомок Керенскяй засечнай чертань служилай ломаттнень Зубофнень фамилияснон коряс, синь тя ширеса азорхтольхть. Лемть омбоце пяльксоц пачфни, што тяса кужель, вирьса шуфттнень эзда ароптф вастоль. Сире пинкнень тияк ётнесть Шацк-Спасск алашань кись, Зубова Полянань почтовай станциясь. Машина кить строямста посёлкась вишкста кассь. Тяниень пингть Зубово-Полянскяй районца улихть оцю предприятият, конат лезнихть виияфнемс марнек Мордовиять экономиканц. Кепотьксонди, «Плайтерра» фанерань нолдай компаниясь и Вышинскяй деревообрабатывающай комбинатсь. Лама киза Зубова Поляна посёлкаса ноляй электроннай оборудования «Радиодеталь» заводсь. Оцю тефт тиендихть наказамань ётамань учреждениятне. Пцтай эрть эса улихть стамань цехт, шуфтонь и металлонь обработкать коряс производства. Аф кржа рабочай васта максси «Талина» компаниясь, кона мольфти районца аграрнай бизнес. Инголи моли технология мархта ня предприятиятне сявондихть работама сембе ширде аноклаф, квалифицированнай ломатть, сянкса зарплатавок пандыхть цебярь.
 
 

Корреспондентоньке аф кунара васьфнесь Зубово-Полянскяй райононь оцюнять Владислав Алексеевич Поршинонь мархта и кизефнезе, кода Мордовиянь инь оцю районца ётафневихть эряфс национальнай проекттне.

12.05.2022  № 18
 
 
 
 

МОРДОВИЯНЬ ОЦЮНЯСЬ ПОЗДРАВЛЯНДАЗЕНЬ ВЕТЕРАТТНЕНЬ

Шуваланяста, 5 майста, Артём Здунов васетькшнесь Мордовиянь ветеранскяй активть мархта. Васедемаса примасть участия республикань райононь ветеранскяй организациянь председательхне и члеттне.

 

Тяддень мартста организацияти топодсь 35 киза. Мордовиянь Оцюнясь азозе, што Ветеранонь советть оцю значенияц регионца, сон путни сатомшка оцю путкс од поколениять воспитандаманцты. Корхтафоль памятниконь тиемать коряс Военно-историческяй обществать мархта марстонь работать и Сурскяй рубежень строяйхненди музеень панжемать колга.

 

«Кда аф тинь советонте, тейнек улель стака ламоц важнай задачатнень пяшкодемста. Башка мяль тячи, конешна, эряви шарфнемс од ломаттнень воспитандамаснонды, сянди, мезе тиендеви школатнень эса. Интернетса лама аф видексонь информацияда, конань вельде ули кода тиемс кальдяв од ломаттненди, сяс кадондомс мялень апак шарфтт тя категориять аш кода»,—мярьгсь Артём Здунов васедемать панжемста.
 

12.05.2022  № 18
 

СЕДИЕНЬ ТАКОЛДОМА И ОЦЮ КЕНЯРДЕМА КАННИ ТЕЙНЕК 9 МАЕНЬ ШИСЬ!

Победань шиня Саранскяйса и Мордовиянь райоттнень эса ётафтовсть мероприятият, конат лемтьфтольхть 1941-1945 кизотнень Великай Отечественнай войнаса Сяськомать 77 кизонь топодеманцты.

 

Саранскяйса Победань площадьса ётафтовсь торжественнай митинг. Ся кизонь пелькс событиянь участникненди и свидетельхненди сюконяма, сяськиень поколенияти спасибань азома, сембонь сятнень лятфтама, кит тяни ашет мархтонк, сашендсть ошеряйхне и Мордовиянь столицань инжихне.

 

Торжественнай митингть панжемста Мордовиянь Оцюнясь Артём Здунов поздравляндазень пуромфнень странаньконь историяса Великай шить мархта: 

 

«77 кизода тяда инголе Советскяй народсь аралазе родной Отечестваньконь,  нолдазе воляс фашизмать  эзда ламоц странатнень и нароттнень. Республикасонк шачф-касф ломаттне тиендсть героень тефт сембе фронттнень эса: Брестскяй крепостть араламста, Москуть, Ленинградть, Севастопольть инкса ащемста, Сталинградть ала и Курскяй дугать лангса тюремста, Украинань, Белоруссиянь союзнай республикатнень и сембе Европать воляс нолдамста. Тылонь труженикне, аф ваномок ашушить и вачашить лангс, сатнезь Победать станокнень ваксса, паксяса, Сурскяй рубежса и госпитальхнень эса. Марса аватнень и сире ломаттнень мархта тылса стакат-сталмот кирдсть шабатне. Вечнай толть ваксса минь сюконяфнесаськ пряньконь сембонь сятнень лятфтаманкса, кие ашезь мрда войнаста, кие эреклафнезе народнай хозяйствать войнада меле. Сембось тя тиф минь инксонк, шабаньконь, сяськиень сай пингонь поколениятнень инкса!»

 

 
12.05.2022  № 18
 

«Бессмертный полк России» ООД-ть Мордовия Республикань региональнай отделениянц штабонц руководителец Н.А.КРУЧИНКИН: «ТЯДДЕ "БЕССМЕРТНЫЙ ПОЛК" ШЕСТВИЯСЬ КАРМАЙ АСЬКОЛЯМА МАРНЕК СТРАНАТЬ ЭЗГА!»

05.05.2022  № 17
 
 

Касы коронавируснай инфекцияса сярядихнень лувкссна

29 апрельста ётафтовсь коронавируснай инфекциять инголдаманц и келемоманцты кить персеманц коряс региональнай оперативнай штабть  заседанияц. Сонь работасонза примась участия Мордовиянь Оцюнясь Артём Здунов.

 

«Коронавируснай инфекцияса урмаськодомать мархта тефне Мордовияса ашесть полафта—300-та лама пациент пчксихть ковиднай госпитальхнень эса. Ваномс, штоба Маень праздникнень пингста массовай пуромксне афольхть ара урмаса сярятькстыхнень лувксснон касомаснонды туфталкс»,—мярьгсь регионть руководителец.

 

МР-нь Правительствать Председателенц заместителец Галина Лотванова азондсь эпидемиологическяй  тяниень пингонь ситуациять и коронавируснай инфекциять эзда населениять вакцинациянц мольфтеманц колга.

 

Ётай недялять коряс 19 процентта кассь госпитализированнайхнень лувкссна, сяда лама арась стационарса пчкафневи идьта. Коллективнай иммунитетсь кирсь и тячиень шити сон арась 52,7 процент.

 

05.05.2022  № 17
 
 

 

 

Яндекс.Метрика Яндекс цитирования Rambler's Top100
Учредительхие:
Главнай редакторсь: И. С. Лушкин