Поиск по сайту: 
 

Архив
 март 
 2024 
пн вт ср чт пт сб вс
    123
45678910
11121314151617
18192021222324
25262728293031

ПРОТОИЕРЕЙТЬ В.А.РАССКАЗОВОНЬ КОЛГА ЛЕВЖАСА МЯЛЯФТЫХТЬ ТЯНЕМС

Протоиерейсь Василий Андреевич Рассказов шачсь 1863 кизонь 1 августста Пензенскяй губерниянь Наровчатскяй уездонь Лухна велеса пономарень семьяса. Колма кизода меле семьясь етась эряма тяниень Мордовияв—Краснослободскяй району Селищи вели. 1870 кизоня Василий поступась тяка велень церковно-приходской школав, а 1873 кизоня примафоль Краснослободскяй духовнай училищав. Сяльде шумордазе Пензенскяй духовнай училищать, Пензенскяй духовнай семинарияса—богословскяй наукань курсть. Рьвяясь. 1885 кизонь 11 августста Преосвященнейшай Епископсь Антоний II макссь теенза священниконь сан и кучезе работама Пензенскяй губерниянь Саранскяй уездонь Левжа мокшень велень Никольскяй церькаву. Эстокиге В.А.Рассказов кярьмодсь тефненди. Сяка кизоня Левжаса панчсь церковно-приходской школа. Тиезе тянь эсь кудсонза, сонць законть коряс учителель, вятезень ламоц лия предметтнень. Кельгома тевонцты палозь паломанкса Преосвященнейшай Антоний II казезе набедренникса.
1890 кизонь 22 мартста теенза мярькфоль лезнемс Сузгярьге велень сяряди священникти, а работама катфоль Левжав.
Кафта кизонь етазь шачсь васенце стирец Александра, а 1893 кизоня—Ольга.
В.А.Рассказов 1893 кизоня етафтфоль старшай священникокс Пензенскяй губерниянь Чембарскяй уездонь Колоны вели.
Сембе ня кизотнень Василий Андреевичень ламоксть казендезь цебярьста служаманкса, сон примсесь участия ламоц пуромкснень эса, заведующаель Святой Землять квалма чтениятнень мархта, тиендсь пожертвованият, лезнесь ашуфненди, вачедотненди. Лама вий макссь Грязнухи велеса молитвеннай кудть строямста. 1913 кизоня казьфоль Священнай Синодть лемста Наперснай Крёзса.
Чекисттне арестовандазь В.А.Рассказовонь 1918 кизоня и еразь сонь ляцемс контрреволюционнай тевонзон инкса. Сяльде сявфоль марнек паршиец, плхтафтольхть книганза. 1920-1925-це кизотнень теенза аф весть мярькфоль атказамс священническяй санонц эзда и тумс эряма лия вастс. Тянь колга мяляфтсь емла стирец. Но сон тяфта ашезь тие. 1927 кизонь 8 июньцта В.А.Рассказовонь арестовандазь. Грязнухинскяй церькаву якайхне (сембоц 300 ломанель) састь мяльс нолдафтомс духовнай аляснон. Августста тифоль обвинительнай заключения, сяльде протоиерейсь Рассказов нолдафоль козовок аф тумать квалма подпискать коряс. 1928 кизоня следствияти путфоль пе, подпискась азфоль вийфтомокс. 1930 кизонь августти сон коль ульсь благочиннайкс, но декабрьста кудсонза тись обыск ОГПУ-нь Чембарскяй РАО-сь.
В.А.Рассказов паньфоль кудстонза, мезецка ашель, сявфоль алашац, упряжец, ведражец. Муворгофтовсь антисоветскяй контрреволюционнай группировкань пуроптомаса. Пякстафоль Пензенскяй исправительнай куду. Вятнезь допросс, очнай ставкас. Прважафоль вете кизос Северу концлагери. Этапса вятьфоль Комив Усть-Куломскяй райононь Вочинскяй велень советонь Нижняя Вочь вели. 1933 кизоня кулось ссылкаса. Калмаф Нижняя Вочь велень калмотненди. 1989 кизоня В.А. Рассказовонь реабилитировандазе Пензенскяй областень прокуратурась.
Рузаевскяй райононь Левжа мокшень велеса васенце настоятельть, священнослужительть, духовникть, протоиерейть В.А.Рассказовонь мяляфтсазь. Сон, кле, еню, смузю, видешинь кельги ломанель. Фалу аноколь лездомс зиянц повфненди. Но аф ламос удалась велень эряйхненди кулхцонкшнемс проповедензон. Тянемс Шкаень валсь «кулеви» Левжа велень Никольскяй церькавонь прихожаттненди ичкоздень Северста—Нижняя Вочь велеста.
Т.ВЛАДИМИРОВА.
 
 
 
УСПЕНИЯНЬ ПОСТСЬ
Успениянь постсь фалу ушеткшни 14 августста. Тя шиня праздновандави «Происхождение честных древ Животворящего Креста Господня» праздниксь.
Успениянь постсь—строгай, калда ярхцамс можна аньцек весть—19 августста. Шумордави постсь 28 августста—Пресвятой Богородицать Успениянц шиня. Ваи ярхцамбяльда можна ярхцамс праздничнай богослуженияда меле.
 
 
 
 
ВАСЬФТЬСАСЬК АНГЕЛОНЬ ШИНЬКОНЬ
Ломаттне, конат каннесазь святойхнень лемснон, сидеста эльбятькшнихть, арьсемок, што кизоти синь уленди несколька Ангелонь шидост. Но аф сембось тяфта. Лемсь макссеви ломанти, кирдемок мяльса кодамовок фкя святойть. Инголи шабати макссезь ся святойть лемонц, кона сяда мала шабать шачема шинцты.
Именинань шиня эряви шобдава молемс церькаву, путомс штатол шумбрашицень инкса, штатол святойти, конань лемонц каннесак.
 
 
 
МЗЯРДА ПОВФТАМА КРЁСКЯСЬ
Шабати крескясь щафтома аньцек снярда, мзярда сон сяда эзрайгоды и кармай шарьхкодема, што тя аф налхкш. Мзярс идсь пиженя, сяда пара повфтамс крескять удома вастонц вельхксс или путомс шкайнятнень ваксс. Но, мзярда кандсасть шабать причастияс, крескясь улеза кргасонза.
Васенцеда прьхчещандафтомс идсь можна кстиндамдонза меле. Мзярс шабати аф топоди колмошка киза, можна вятнемс сонь аф сембе службати, а прьхчещандамда цють сяда инголе.
 
 
 
Кизефкс-ответ
Кизефкснень лангс отвечай Сретенскяй алянь монастырень иеромонахсь Иов (Гумеров).
 
АВОЗЕНЬ СЮДОМА
—Мирдезень аляц тусь семьяста, но сон сембе сяка васьфни мархтонза. Мзярда тянь кулезе авозезе, сон сюдозе марнек семьяньконь. Мезе тиемс, штоба тядянь сюдомась туль эздонк? Корхтайхть, бта сон пяк вии.
Т.ПЕТРОВА.
 
—Сюдомс властец аньцек Шкайть. Тядятненди и алятненди максф башка духовнай и нравственнай вий идьснон лангс. Аш кода алять или тядять валснон лувомс магическяйкс.
Кда иттне эряйхть аф грехса, пяшкотькшнесазь Шкайть заповедензон, ванцазь тядяснон и аляснон мяльснон, Шкайсь аф аньцек аф кульсыне шачфтыхнень-касфтыхнень кальдяв валснон, но и араласыне шабатнень. Но, кда сембе сяка тядясь или алясь кяженьбачк сюдость, эряви пяк озондомс семьяса цебярь эряфть инкса. Сюдофненди молема исповедьс.
 
 
 
МИРДСЬКЕ МУВОРУ
—Рьвясь якась абортс, но каендась тя грехса. Ули-аш грехоц мирдть, кона ашезь аще каршек абортти?
Г.НИКОЛАЕВ.
 
—Семьясь—эряфонь союз, конань основаса аф аньцек фкя-фкянь кельгомась, но и марстонь ответственностсь. Сяс абортонь тифтеманкса стака грех прашенды кода рьвять, стане и мирдть лангс. Алясь, кода семьянь оцюня, канды нинге сядонга оцю ответственность. Ужяль, но ламоц мирттне тя стака грехть аф шарьхкодьсазь и аф каендайхть.
 
 
 
ФКЯ СЕМЬЯСА КОЛМА МИХАИЛХТ
Атязень лемоц—Михаил, алязе Михаил Михайлович. Алязе шавовсь. Церазеньге лемдине Михаилкс и тя мезть атязе тусь эряфста.
Тякось лиссь и радня ломаннень мархта. Щаказе (нинге церазень шачемда инголе) шачфтсь цераня и мялецоль лемдемс брадонц, монь алязень лемса. Но цераняц кулось эстокиге. Семьясонк аньцек фкя Миша лядсь—церазе. И тяфта  уленди аф аньцек  алятнень, но и аватнень мархта. Сазорозе лемдезе стирнянц бабазень лемса—бабазе кулось. Мон лемдине стирезень омбоце бабаньконь лемса—сонга тусь эряфста. Лисенди, што иттне аф эрявихть лемнемс раднянь лемса?
К.Шиберина.

Новости

https://mokshapr.ru

10.06.2022   №
МОРДОВИЯСА ЛОТКАФТФ МАСКАНЬ КАННЕМАНЬ РЕЖИМСЬ

2 июньцта коронавируснай инфекциять инголдаманц и келемоманцты кить персеманц коряс региональнай оперативнай штабть заседанияса примафоль решения—лоткафтомс Мордовияса маскань каннемань режимть. Кода азозе вице-премьерсь Галина Лотванова, республикаса эпидемиологическяй ситуациясь лувондови цебярькс и ащи контроль ала. Мекольдень шитнень коронавирусса урмаськодсь 19 ломань, стационархнень эса пчкси 160 пациент.
 

 
Тяконь мархта азфоль, што ковидсь ашезь пота, сяс хуш и валхтф маскань каннемань обязательнай режимсь, общественнай транспортса  и лама ломанень ёткса улемста мярьгондеви нолямс тевс араламань средстватнень. Общественнай питаниянь предприятиятненди мярьгондеви каннемс маскат сотрудникненди, конат работайхть оцю лувксса ломаттнень мархта.

 

09.06.2022   № 22
НАЦПРОЕКТТНЕНЬ—ЭРЯФС!

Мордовиянь Правительствась сяда тов мольфтьсы работать национальнай проекттнень эряфс ётафтоманкса, конатненди ки макссь странань Президентсь Владимир Путин. Республикань Оцюнять ширеса совещанияса корхтафоль основной федеральнай и республиканскяй программатнень эряфс ётафтомаснон колга. Мольфтеви работать квалма азондсть вице-премьерсь Игорь Чадов, МР-нь строительствань и архитектурань министрсь Алексей Гришакин, МР-нь транспортть и дорожнай хозяйствать коряс Госкомитетть председателец Валерий Кандрин, МР-нь велень хозяйствань и продовольствиянь министрсь Александр Кечайкин, МР-нь вирень, охотничьяй хозяйствань и природопользованиянь министрсь Алексей Ларькин.

 

Мордовиянь Оцюнясь путсь задача кирдемс кеме контроль ала строямань графикнень пяшкотькшнемаснон. Васендакиге корхтамась мольфтевсь социальнай инфраструктурань объекттнень колга. Тяфта, ванфтольхть кизефксне, конат сотфт Саранскяйса Кировонь ульцяса 250 вастонди идень садть и Тавлинскяй набережнайса 1450 вастонди школать строямаснон шумордамасна.

 

09.06.2022   № 22
ЁТАФТОВСЬ АНТИКРИЗИСНАЙ ШТАБТЬ ЗАСЕДАНИЯЦ

2 июньцта Мордовияса ётафтовсь экономикать ширенц кирдеманц и кемошинц ванфтоманц коряс антикризиснай штабть заседанияц, коса ванондовсть республикаса уликс тефне. Азфоль, што Россиянь Правительствась сяда тов мольфти работа санкциятнень эзда экономикать араламанц коряс законодательнай базань тиеманкса. Региоттнень ширень кирдемасна и синь финансовай кемошиснон кемокстамасна—главнай направлениятнень эзда фкясь. Путф подпись РФ-нь Правительствать постановлениянц алу, кона максси возможность кирьфнемс пандоматнень бюджетнай кредиттнень коряс, конат сявфт дефицитть пяшкодеманкса.

 

Майста нолдаф тевс важнай продукциянь импортёрхнень специальнай льготнай кредитованиянь программасна. Тянкса федеральнай бюджетста нолдаф 37 миллиардта лама цалковай. Тяфтама ширень кирдемать сюнеда бизнести ули кода меки  ладямс товаронь рамсемать, конат мзярс аф нолявихть Россиять территорияса, и сяда тов мольфтемс сембе пингонь работать.
 

09.06.2022   № 22
Одкстоптови общественнай транспортсь

28 майста Саранскяйса Советскяй площадьса Мордовиянь Оцюнясь Артём Здунов ванозень пассажирскяй од автобуснень, конат работайхть газса. Мордовияти тя общественнай од видонь транспорт, кона арьсекшневи нолдамс тевс республикань транспортнай предприятиятнень подвижнай составснон одкстоптоманкса.

Автобусонь ноляйхне няфтезь средняй и оцю классонь техникать. Артём Здунов ванозень автобуснень эса тяниень пингонь салонть и водителень кабинаса оборудованиять.

«Газса работай техникась сяда ванфтсы экологиять и аф веши оцю карьхцьт. Тяфтама транспортть эвондамац максы инфраструктурати касома-виияма—ков сяда лама тяфтама видонь транспортта, тов сяда лама кармай заправочнай станцияда. Тянь мельге сай пингсь»,—китькстазе Мордовиянь Оцюнясь.

Сембе автобусне стане жа тифт усксемс физическяй ширде ограниченнай возможность мархта ломаттнень. Тяниень пингть Саранск ошса ули автомобильнай газонаполнительнай компрессорнай фкя станция.

02.06.2022   № 21
Ревакцинация COVID-ть эзда эряви ётамс сембонди

Мордовиянь Оцюнять Артём Здуновонь председательстванц ала 27 майста ётафтовсь Мордовияса коронавируснай инфекциять инголдаманц и келемоманцты кить персеманц коряс оперативнай штабть заседанияц.

Отмечафоль, регионца ванфтови ковидса одс сярядихнень лувксснон киремац—ётай недялять тя ульсь 30 ломань шити.

«Эряви сяда тов мольфтемс ломаттнень вакцинацияснон и ревакцинацияснон коряс работать. Тянь мельге ванома кода муниципальнай образованиянь оцюнятненди, стане и предприятиянь и бизнес-структурань руководительхненди. Тяниень пингть ётафтовихть ЕГЭ-тне, сяс инфекцияда инголдамань мератненди эряви шарфнемс башка мяль»,—мярьгсь региононь руководительсь.

МР-нь Правительствать Председателенц заместителец Галина Лотванова азозе, што республикань медицинскяй учреждениянь стационархненди тона недялять эрь шиня пачфневсь 20 малава ломань. Сёлкф нинге 50 ковиднай койка-вастсь, стационарса пчкси 203 ломань, конатнень эзда пялесна—60+ кизосот.

02.06.2022   № 21
Экономикать виияфтоманцты—башка мяль

Мордовиянь Оцюнясь Артём Здунов 27 майста ётафтозе республикань экономикать ширень кирдеманц и кемошинц ванфтоманц коряс антикризиснай штабть заседаниянц.
Региононь руководительсь мярьгсь, што Россиянь Правительствась сяда тов примси решеният, конат эрявкснихть тячиень аф тёждя пингть экономикать работанц лац ладяманцты.
 
«Васенце очередень тевонь мольфтемань федеральнай планти сувафтф нинге 23 кизефкс. Фалу эвондакшнихть од механизмат, од возможностть. Тейнек эряви синь сяда лац нолямс тевс,—мярьгсь Артём Здунов.—Кепотьксонди, Россиянь Правительствась дополнительнайста нолдай 3 миллиартт цалковай региоттнень эса спортивнай инфраструктурать виияфтоманкса. Эряви кенеремс тиемс заявка ня программатненди и получамс финансирования».

Тяфта жа арьсекшневихть отечественнай программнай обеспечениянь ширень кирдемань од механизмат. Республикань цифровой виияфтомань министерствати и региональнай IT-компаниятненди мярькф активнайста примсемс участия ня процесснень эса.

02.06.2022   № 21
Артём Здунов встретился с многодетными семьями

Глава Мордовии Артём Здунов провел встречу с многодетными семьями республики – её приурочили к Международному дню защиты детей.

Встреча состоялась в Доме Республики в теплой, почти семейной обстановке, за чашкой чая. В ней участвовали вице-премьер Галина Лотванова и министр социальной защиты, труда и занятости населения РМ Игорь Князьков.

«Я хочу от всей души поблагодарить всех многодетных родителей за ваш нелегкий труд, достойный глубокого уважения и общественного признания, - сказал Артём Здунов. – Вы взяли на себя большую ответственность. Понимаю, сколько дел в большой семье, какая у вас загруженность, но прошу вас, чтобы за этими делами вы не забывали разговаривать со своими детьми. Обсуждайте с ними, что происходит в мире, что было много лет назад. Нам важно, чтобы дети выросли настоящими людьми, чтобы любили свою семью и свою Родину. Это наша с вами общая задача. Вы выполнили и перевыполнили свою демографическую программу, спасибо вам за это, теперь дело за нами».

В Мордовии около 8 тысяч многодетных семей, в которых воспитываются более 25 тысяч детей.

25 мая Президент России Владимир Путин на заседании президиума Государственного Совета, посвящённого вопросам социальной поддержки, подчеркнул, что многодетная семья должна быть ценностным ориентиром для всего общества и поддерживаться государством. Президентом поставлена задача сделать всю систему поддержки семьи целостной, последовательной, понятной и эффективной.
02.06.2022   №